Ezipt Lɔ Tulɛ'n 18 - NYANMIƐN NDƐ'N 1998

Moiz nin i sia Zetro

¹ Moiz i sia Zetro b'ɔ ti sraka yifuɛ Madian lɔ'n tili junman nga Anannganman Nyanmiɛn'n dili mannin Moiz nin Izraɛl b'ɔ ti i nvle'n be ndɛ'n. Ɔ tili i kɛ Anannganman fali Izraɛlfuɛ mun Ezipt lɔ bali.

² Moiz i sia Zetro bɛli i sin, ɔ nin Moiz i yi Sefora b'ɔ sɛli i sin i si wun lɔ'n, yɛ be bali-ɔ.

³ Sefora i wa nnyɔn'm be kusu be bali wie. Moiz tɔnnin kpɛnngbɛnfuɛ'n i dunman kɛ Gɛrsɔm. I bo'n yɛlɛ kɛ: M'an Fia Wa. Afin i waan: «M'an kaci aofuɛ nvle wie nun.»

⁴ Ɔ tɔnnin kasiɛnfuɛ'n i dunman kusu kɛ Eliezɛr, afin i waan: «Mín si i Nyanmiɛn'n bali min delɛ, nan ɔ'a de min Ezipt famiɛn bɔ i waan ɔ ´kun min'n i sa nun.»

⁵ Zetro nin Moiz i yi'n, ɔ nin Moiz i mma mun be toli Moiz aawlɛ flɛnnɛn'n nun lɔ Nyanmiɛn i oka'n i wun lɔ kan be kpɛli be ngblaliɛ'n lɛ'n.

⁶ Ɔ sunmannin sran kɛ be ko se Moiz kɛ: «N bɔbɔ min Zetro, ɔ sia'n yɛ n su ba ɔ́ wun wunlɛ-ɔ. Min nin ɔ́ yi nin ɔ mma nnyɔn mun yɛ e ba-a.»

⁷ Nan Moiz ɔ'a ko kpa be atin. Ɔ kotoli Zetro nyrun nan ɔ'a tɔ be nun. Moiz tili be jasin, yɛ be bo kleli i-ɔ, yɛ Moiz kɛnnin i liɛ'n kle be-ɔ. I sin be ɔli Moiz i tannin sua'n nun lɔ.

⁸ Moiz kannin sa nga Anannganman fa yili i Ezipt famiɛn'n nin Eziptfuɛ'm be su Izraɛlfuɛ'm be dunman nun'n kwlaa. Ɔ kannin nyrɛnnɛn nga be wunnin i atin nun'n, ɔ nin delɛ nga bɔ Anannganman fa deli be'n.

⁹ Zetro klun jɔli, sa kpakpa nga bɔ Anannganman yoli mannin Izraɛlfuɛ mun, ɔ nin delɛ nga ɔ deli be Eziptfuɛ'm be sa nun'n ti.

¹⁰ Kpɛkuun i waan: «Man manmanlɛ'n yo Anannganman b'ɔ deli amun Ezipt famiɛn'n nin Eziptfuɛ'm bé sa nun'n i liɛ! Man be manman Anannganman b'ɔ deli i sran mun Eziptfuɛ'm be sa nun'n!

¹¹ Siɛn liɛ'n, m'an si kɛ Anannganman ti dan tra amuɛn'm be kwlakwla. Ɔ yili i dan b'ɔ ti'n i nglo blɛ bɔ Eziptfuɛ'm be ´kle Izraɛlfuɛ'm be nyrɛnnɛn'n.»

¹² Zetro yili tɛ nga be yrɛ i nnɛn'n kɔlikɔli'n ɔ nin bo kun yolɛ i su tɛ mun. Ɔ yili be mannin Nyanmiɛn. Yɛ Zetro, nin Moiz, nin Aarɔn, ɔ nin Izraɛl kpɛnngbɛn'm be kwlaa be wa dili like Nyanmiɛn nyrun lɛ-ɔ.

Moiz i kpɛnngbɛn bɔ be ukɛ i di jɔlɛ'n be kpalɛ

¹³ Kɛ i aliɛ cɛnnin'n, Moiz trannin i bia'n su kɛ ɔ ´di nvlefuɛ'm be jɔlɛ mun. Kɛ ɔ fɛ i nglɛmun lele b'ɔ ´fa ju nnɔsua'n, wuun sran wie'm be tɛ minndɛ kɛ Moiz kan be ndɛ liɛ'n.

¹⁴ Kɛ i sia'n wunnin junman ng'ɔ wo i su b'ɔ fata kɛ ɔ di man sran mun'n, ɔ seli i kɛ: «?Nguɛ yɛlɛ nga a nin sran mun ´yo i yɛ'n? ?Ɔ yo sɛ ti yɛ ɔ ngunmin yɛ a di be jɔlɛ bɔ man sran'm be jran ɔ nyrun lɛ be minndɛ nglɛmun lele nnɔsua kɛ a kan be ndɛ mun nin-ɔn?»

¹⁵ Moiz tɛli i sia'n su kɛ: «Sa nga ti yɛ n yo i sɔ'n yɛlɛ kɛ sran'm be ba mín sin nan be ´wun nun weiin kɛ Nyanmiɛn yɛ o bu be ndɛ mun ti-ɔ.

¹⁶ Sɛ ndɛ tɔ sran nnyɔn be afiɛn'n, be ba mín sin, n siesie be afiɛn, kpɛkuun n fa Nyanmiɛn i mmla mun nin i atin'n sie be nyrun.»

¹⁷ Moiz i sia Zetro seli i kɛ: «Like nga a ´yo i lɛ'n ɔ ti-mɛn i su.

¹⁸ Ɔ wunmiɛn'n wa wie, yɛ nvlefuɛ nga be gua yɛ'n be kusu be wunmiɛn liɛ'n wa wie. Junman'n ti dan. Ɔ tra ɔ wunmiɛn'n su, ɔ kunngba a su kwla di-man.

¹⁹ Sie ɔ́ su tie afɔtuɛ nga n wa fa man wɔ yɛ'n, man Nyanmiɛn jran ɔ́ sin. Ɔ liɛ'n jran sran'm be nuan Nyanmiɛn wun lɔ, fa be ndɛ mun nan kan kle Nyanmiɛn.

²⁰ Fa Nyanmiɛn i mmla mun nin i atin'n kle sran mun. Kle be nantilɛ ng'ɔ fata kɛ be nanti'n, ɔ nin like ng'ɔ fata kɛ be yo'n.

²¹ Kpa sran nga be lɛ nyrun'n, bɔ bé nyin yi Nyanmiɛn kpa'n, bɔ be klo nanwlɛ'n, bɔ be ti-man sika tɛ kunndɛfuɛ mun. Man wie'm be yo sran akpi su kpɛnngbɛn, wie'm be yo sran ya su kpɛn, wie'm be yo sran ablenun su kpɛn, yɛ wie'm be yo sran blu su kpɛn.

²² Man be yɛ be siesie ndɛ ng'ɔ tɔ nvlefuɛ'm be afiɛn nin-ɔn. Ndɛ nga be ti dandan bɔ be kwla-man be kan'n, man be fa be blɛ wɔ. Ndɛ nga be ti kanngan'n, man be bɔbɔ be kan be. Sɛ ɔ yo sɔ'n, ɔ junman'n i su ´kpɛ kan, afin be wa uka wɔ i dilɛ nun.

²³ Sɛ a nian su sɔ yo'n, i liɛ sɛ Nyanmiɛn kle wɔ like wie kɛ a `yo'n, ɔ wunmiɛn'n su wie-man wɔ nun. Sran'm be kusu, kɛ be ´sa bé sin be awlo'm be nun'n, wuun be afiɛn ɔ'a sɛ.»

²⁴ Moiz fɛli i sia'n i afɔtuɛ'n su.

²⁵ Ɔ kpali Izraɛlfuɛ'm be nun sran nga be lɛ nyrun mun'n, nan ɔ'a sie wie mun sran akpi su kpɛn, wie mun sran ya su kpɛn, wie mun sran ablenun su kpɛn, yɛ wie mun sran blu su kpɛn.

²⁶ Be yɛ be siesie ndɛ nga be tɔ Izraɛlfuɛ'm be afiɛn nin-ɔn. Ndɛ nga i kanlɛ ti kekle'n, be fa blɛ Moiz, sanngɛ be bɔbɔ be di jɔlɛ kannganfuɛ mun.

²⁷ Moiz yoli i sia Zetro i blandɛ nan Zetro ɔ'a sɛ sin i mɛn'n nun.