Ezipt Lɔ Tulɛ'n 17 - NYANMIƐN NDƐ'N 1998

Masa nin Mɛriba nzue'n

¹ Izraɛlfuɛ'm be nvle wunmuan'n, be tuli be bo Sin aawlɛ flɛnnɛn'n nun lɛ, be jaso lika kun nun, be kɔ uflɛ nun, be jaso lika kun nun, be kɔ uflɛ nun kɛ Anannganman kan kleli be'n sa. I sin be ko yoli be ngblaliɛ Refidim lɔ, be nyan-man nzue be nɔn-man.

² Be kunndɛli Moiz i utre, be seli i kɛ: «Man e nzue, man e nɔn.» Moiz usali be kɛ: «?Nzu ti yɛ amun kunndɛ min utre nin-ɔn? ?Nzu ti yɛ amun sa Anannganman be nian nin-ɔn?»

³ Nzue we'n b'ɔ kun be dan'n ti be trikili Moiz su ekun, be waan: «?Nzu ti yɛ a fali e Ezipt lɔ bali wa-a? ?A fali e bali kɛ nzue we'n kun ye nin e mma mun, ɔ nin e nnɛn mun?»

⁴ Moiz sun flɛli Anannganman kɛ: «?Nguɛ yɛ n ´yo m man sran nga mun-ɔn? Ɔ cɛ kan be ´toto min yɛbuɛ be ´kun min.»

⁵ Anannganman tɛli Moiz su kɛ: «Sin sran'm be nyrun lɔ, kpa kpɛnngbɛn be nun sran wie mun kɛ be ko sunman wɔ. Kɛ a ´kɔ'n, man kpɔnman nga a fa finnin Nil nzue ba'n i nyin su'n ɔ tran ɔ́ sa nun.

⁶ Min kusu, n wa jran ɔ nyrun lɛ Orɛb oka'n i yɛbuɛ'n kun su. Fa kpɔnman fin yɛbuɛ sɔ'n, yɛ nzue wa fin nun fite, kpɛkuun be ´nɔn.» Moiz fali Nyanmiɛn i ndɛ ng'ɔ kannin'n su, kpɛnngbɛn'm be nyin ta nun.

⁷ Be tɔnnin lika sɔ'n i dunman kɛ: Masa nin Mɛriba, i bo'n yɛlɛ Sa Nianlɛ nin Utre, afin Izraɛlfuɛ'm be kunndɛli Moiz i utre, kpɛkuun be sali Anannganman be niannin, be usali kɛ: «?Anannganman o e afiɛn annzɛ ɔ nun-man e afiɛn?»

Amalɛkfuɛ mun

⁸ Amalɛkfuɛ'm be wa tɔli Izraɛlfuɛ'm bé su Refidim lɛ.

⁹ Moiz seli Zozie kɛ: «Kpa sran yasua kpakpa mun, nan amun nin Amalɛkfuɛ'm be ko kun. Ainman, n ko jran kpɔlɛ'n su lɔ. Nyanmiɛn i kpɔnman'n, ɔ ´tran mín sa nun.»

¹⁰ Zozie nin i sran mun be ɔli kɛ be nin Amalɛkfuɛ mun be ko kun alɛ kɛ Moiz seli i kɛ ɔ `yo'n sa. Kɛ ɔ ´yo sɔ'n, wuun Moiz, nin Aarɔn, ɔ nin Ir be o kpɔlɛ'n su lɔ.

¹¹ Kɛ Moiz mɛn i sa'n su'n, Izraɛlfuɛ'm bé sa ti Amalɛkfuɛ mun, sanngɛ kɛ ɔ kɛn i sa'n i ase'n, Amalɛkfuɛ mun yɛ bé sa ti be-ɔ.

¹² Kɛ Moiz i sa nnyɔn'm be kpɔli'n, Aarɔn nin Ir be fali yɛbuɛ be sieli i bo nan ɔ'a tran su. Aarɔn nin Ir, kun jin i bue kun wa, kun jin i bue kun wa, be trɛtrɛ i sa'm be nun. I sa sɔ'm be kali nglo lele san wia'n tɔli.

¹³ Zozie nin i sran mun be kwlali Amalɛk alɛ kunfuɛ mun tɛtɛ kpa.

¹⁴ Anannganman seli Moiz kɛ: «Klɛ i kwlaa sɔ'n fluwa'n nun nan bé wla ɔ'a fi-man su. Kan kle Zozie kɛ n wa nunnun Amalɛkfuɛ mun. Sran fi wla su kpɛn-man bé su asiɛ'n su wa kun .»

¹⁵ Moiz kplannin Nyanmiɛn sɔwlɛ kun, ɔ tɔnnin i dunman kɛ: Alɛ Nun'n, Anannganman Ti Min Nyrun Mmua Dunfuɛ.

¹⁶ Kɛ bɔ Amalɛkfuɛ'm be jasoli Anannganman i famiɛn bia'n i wun ti'n, Anannganman nin be ´kun alɛ tititi.