Ezipt Lɔ Tulɛ'n 16 - NYANMIƐN NDƐ'N 1998

Mani nin aoko'm be ndɛ'n

¹ Izraɛl nvle wunmuan'n tuli i bo Elim lɔ. Kɛ be tuli Ezipt lɔ'n i anglo nnyɔn su'n i cɛn ba blu-nin-nnun su'n, be juli Sin aawlɛ flɛnnɛn ng'ɔ o Elim lika nin Sinai oka'n be afiɛn'n nun lɔ.

² Aawlɛ sɔ'n nun lɛ'n, Izraɛlfuɛ'm be wa plannin Moiz nin Aarɔn bé su.

³ Izraɛlfuɛ'm be waan: «Sɛ ɔ ti kɛ Anannganman kunnin ye Ezipt lɔ i nun bɔ e ti nnɛn sɛ'm be sin'n, bɔ e nyan aliɛ kpa e di'n, wuun ɔ yoli kpa. Kpɛkuun amun fali e bali aawlɛ flɛnnɛn nga nun wa kɛ awe'n nunnun e ngba.»

⁴ Anannganman'n seli Moiz kɛ: «N wa yo nan kpaun ´fin nglo lɔ gua man amun. Cɛn kun sran'm be ko isa ng'ɔ ju bé cɛn kun dilɛ'n. N wa sa amun n nian sɛ amun ´fa min mmla'm bé su o, sɛ kusu amun su fa-man bé su o.

⁵ Cɛn ba nsiɛn su liɛ'n, kɛ amun wa tɔn nga amun isali'n, amun wa wun i kɛ ɔ ´ju cɛn nnyɔn liɛ.»

⁶ Moiz nin Aarɔn be seli Izraɛlfuɛ'm be kwlaa be kɛ: «Ndɛ nnɔsua amun wa wun i wlɛ kɛ Anannganman yɛ ɔ fali amun Ezipt lɔ bali-ɔ.

⁷ Ainman nglɛmun kusu amun wa wun Anannganman i nyrun nyannyan'n, afin ɔ tili trikilɛ nga amun trikili i su'n. ?Wan yɛlɛ e bɔ amun triki e su-ɔ?»

⁸ Moiz waan: «Anannganman wa man amun nnɛn amun ´di ndɛ nnɔsua. Ainman nglɛmun kusu'n, ɔ ´man amun kpaun nga ɔ ko ju amun dilɛ'n. Anannganman tili trikilɛ nga amun trikili i su lɛ'n. ?Afin waan yɛlɛ ye? Nán e su yɛ amun trikili-ɔ, sanngɛ Anannganman i su yɛ amun trikili-ɔ.»

⁹ Moiz seli Aarɔn kɛ: «Kan kle Izraɛlfuɛ'm be kwlakwla kɛ be bla Anannganman nyrun, afin ɔ tili trikilɛ nga be trikili i su'n.»

¹⁰ Kɛ bɔ Aarɔn i nuan tɛ o ndɛ ng'ɔ ´kan kle Izraɛlfuɛ'm be kwlakwla'n i su'n, be kpɛli bé nyin aawlɛ flɛnnɛn lika liɛ'n nun lɔ. Be ´nian-an, Anannganman i nyrun nyannyan'n yɛ ɔ o sin wɛnsrɛn'n nun yɛ.

¹¹ Yɛ Anannganman seli Moiz kɛ:

¹² «N tili Izraɛlfuɛ'm be trikilɛ nga be trikili'n. Kan ndɛ nga kle be man min, se be kɛ: ‹Ndɛ nnɔsua amun ´di nnɛn, ainman nglɛmun kusu amun ´nyan kpaun ng'ɔ ko ju amun'n, kɛ ɔ ko yo sɔ'n, amun ´wun i wlɛ kɛ min yɛ n ti Anannganman amun Nyanmiɛn nin-ɔn.› »

¹³ Nnɔsua nun'n, aoko'm be bali be wa trantrannin ngblaliɛ'n i lika'n kwlaa nun, yɛ nglɛmun kusu'n, bɔlɛ ufue'n guali sin yiali ngblaliɛ'n.

¹⁴ Kɛ bɔlɛ ufue'n i nzue'n nɔnnɔnnin, i osu nun lɛ like wie'm be ti nyɛnklɛn-nyɛnklɛn kɛ ijre mma kanngan sa, be kali asiɛ'n su lɛ.

¹⁵ Izraɛlfuɛ'm be wunnin i, sanngɛ be si-mɛn i, be usali be wiengu kɛ: «?Nzu like yɛlɛ nga?» Moiz tɛli bé su kɛ: «Aliɛ nga Anannganman fa mannin amun kɛ amun di'n yɛ ɔ o lɛ-ɔ.

¹⁶ I su mmla nga Anannganman mannin'n yɛ: ‹Man sran kun isɛ i liɛ ng'ɔ ko ju i'n i su sɛsɛsɛ. Man sran kun liɛ ng'ɔ isa'n yo kɔe litri nnan'n, kɛ sran'm bé nuan fa ti amun awlo'm be nun'n, i su yɛ amun `nian be `isa-a.› »

¹⁷ Izraɛlfuɛ'm be yoli i sɔ, wie'm be isɛli i kaka, wie'm be isɛli i kaan sa.

¹⁸ Sanngɛ kɛ be sunnzunnin'n, sran ng'ɔ isali i kpanngban'n ɔ'a nyan-man wie ɔ'a tra-man su, yɛ sran ng'ɔ isali i kaan sa'n, ɔ'a kpɛ-man su. Sran kun liɛ ng'ɔ ko ju i'n yɛ ɔ nyɛn i-ɔ.

Mani i su mmla wafa-wafa mun

¹⁹ Moiz seli be kɛ: «Nán sran fi yaci wie lɛ nan aliɛ cɛn su.»

²⁰ Sanngɛ be kannin-ɔn, sran wie'm b'a fa-man su. Be sieli wie lele aliɛ cɛnnin su. Kakaa wie'm be wa loli nun, be sacili i, i ti ɔ bɔnnin sa fiaan siɛn'n. Nan Moiz ɔ'a fa bé wun ya.

²¹ Kɛ ɔ fɛli i lɛ'n, nglɛmun kwlaa'n, ng'ɔ ko ju be cɛn kun dilɛ'n, yɛ be isɛ i siɛn nin-ɔn. Kɛ wia'n ´bo'n, i onga ng'ɔ kali lɛ'n, ɔ kloli.

²² Cɛn'n i nsiɛn su liɛ'n, be isali cɛn ba nnyɔn liɛ nga be ko di'n. Sran kun ti nun liɛ'n, ɔ ju litri kɔe mɔcuɛ. Izraɛl kpɛnngbɛn'm be kwlaa be ko kannin i ndɛ kleli Moiz.

²³ Yɛ Moiz seli be kɛ: «I sɔ yɛ Anannganman waan be yo-ɔ. Ainman ti cɛn bɔ i nun yɛ be de wunmiɛn-ɔn. Ɔ ti Anannganman liɛ klonglo. I sɔ'n ti, like nga amun waan amun ´nyintɔn'n, amun `nyintɔn, yɛ like nga amun waan amun ´tɔn'n, amun `tɔn. Kpɛkuun man i onga'n ka lɛ lele aliɛ cɛn su.»

²⁴ Be yacili wie lɛ aliɛ cɛnnin su kɛ Moiz kan kleli be'n sa. Kakaa'm b'a lo-man nun kpɛkuun ɔ'a bɔn-man kusu.

²⁵ Moiz seli be kɛ: «Amun `di i ndɛkɛn, afin ndɛ ti wunmiɛn-delɛ-cɛn bɔ e fa man Anannganman, amun su nyan-man wie ngblaliɛ'n sin lɔ.

²⁶ Amun `fa cɛn ba nsiɛn be isa aliɛ sɔ'n, sanngɛ cɛn'n i nso su'n ti wunmiɛn-delɛ-cɛn, amun su nyan-man wie.»

²⁷ Ɔ nin i sɔ'n ngba, cɛn'n i nso su'n, Izraɛlfuɛ wie'm be fiteli be ɔli aliɛ'n i isalɛ, b'a nyan-man wie.

²⁸ Anannganman seli Moiz kɛ: «?Min mmla bɔ amun waan amun fa-man su'n, amun ´yo i sɔ lele cɛn onin?

²⁹ Amun si jrɛiin kɛ n fali wunmiɛn-delɛ-cɛn'n m mannin amun kɛ an fa de wunmiɛn. I sɔ'n ti yɛ cɛn'n i nsiɛn su'n, m man amun cɛn nnyɔn aliɛ nga amun ko di nin-ɔn. Cɛn'n i nso su'n, sran kun trɛn i bɔbɔ i awlo lɔ, nán sran fi fite.»

³⁰ Kɛ ɔ yoli sɔ'n, Izraɛlfuɛ'm be deli wunmiɛn cɛn'n i nso'n su.

³¹ Izraɛlfuɛ'm be flɛli aliɛ sɔ'n kɛ mani. Ɔ ti kɛ koriandri mma sa. Ɔ ti ufue, yɛ ɔ ti mlɛn-mlɛn kɛ gato bɔ wɛma nzue o nun'n sa.

³² Moiz waan: «Ndɛ nga Anannganman kan'n yɛ: ‹Amun `fa mani'n be sie like wie nun, be `sie i lɛ be sie amun mma nga amun ´wu be mun. Kɛ ɔ yo sɔ liɛ'n, be ´wun kpaun nga n fa tali amun aawlɛ flɛnnɛn'n nun lɔ'n kɛ amun fin Ezipt lɔ ba'n.› »

³³ I sin Moiz seli Aarɔn kɛ: «Fa sɛma conjronjo kun nan fa mani'n i cɛn kun dilɛ liɛ fa gua nun. Fa sie i Nyanmiɛn nyrun kɛ ɔ ´yo nan mani'n wie ɔ'a ka lɛ nan amun mma nin amun anunman'm b'a kwla wun i'n ti.»

³⁴ Aarɔn yoli i kɛ Anannganman kan kleli Moiz'n sa. Ɔ jinnin sɛma'n nin i nun mani'n Anannganman i alaka'n nyrun lɛ, nan ɔ ´ka lɛ titi .

³⁵ Izraɛlfuɛ'm be dili mani'n lele afuɛ ablanan, nan b'a ju mɛn bɔ sran'm be tran nun'n i kun nun. Mani'n yɛ be dili lele nan b'a fa ju Kanaan mɛn'n i anyialiɛ'n su lɔ-ɔ.

³⁶ Cɛn kun mani nga sran kun di'n, ɔ ti litri kɔe nnan.