Ezipt Lɔ Tulɛ'n 15 - NYANMIƐN NDƐ'N 1998

Moiz i jue b'ɔ nin Izraɛlfuɛ'm be toli i blɛ sɔ nun'n yɛ

¹ Moiz nin Izraɛlfuɛ'm be toli jue ng'ɔ o yɛ'n be manmannin Anannganman: «N ´to jue m ´manman Anannganman, afin kwlalɛ nga ɔ'a kwla yɛ'n, ɔ lɛ-man wunsu. Ɔ toli nnɛn kpanngɔ'm be nin bé su fufuɛ mun yili jenvie'n nun lɔ.

² Min wunmiɛn nga n lɛ i'n fin Anannganman. Anannganman ti yɛ n to jue nin-ɔn. I yɛ ɔ deli min-ɔn. Ɔ ti min Nyanmiɛn, m ´mɛnmɛn i. Ɔ ti min si i Nyanmiɛn, m ´mɛnmɛn i sakpa.

³ Anannganman ti alɛ kunfuɛ, ɔ ti safunyrɛn. I dunman'n yɛlɛ Anannganman.

⁴ Ɔ toli Ezipt famiɛn'n i alɛ kakaklolo mun nin i sonja kpakpa mun guali be jenvie'n nun.

⁵ Be mlɔnnin nzue'n nun piɔɔ kpa kɛ yɛbuɛ wie mun sa, kpɛkuun nzue'n katali bé su sa kplu.

⁶ Anannganman, ɔ́ sa fama'n lɛ wunmiɛn o! A bubuli ɔ kpɔfuɛ'm be nun sa kpokpokpo.

⁷ Ɔ dan bɔ a ti'n ti, be nga be jaso ɔ́ wun'n, be tu be langa be nyin aanga lɔ. Kɛ ɔ ya'n jue kɛ sin sa'n, ɔ yra be kɛ ijre sa.

⁸ Kɛ a fitali ɔ bue'n nun sa'n, kpɛkuun nzue'm be tiannin bé nuan, nzue ng'ɔ bo'n keteli kɛ talɛ sa, yɛ jenvie'n i bunman'm be keteli.

⁹ E kpɔfuɛ'm be waan: ‹E ´fuan be lele e ´to be kpɔ, e ´cɛcɛ bé bo ninnge'm be nun, e ´fɛ i kwlaa nga e klo'n, e ´fa tratra su, e ´cuɛn e tokofi mun nan e ´nunnun be.›

¹⁰ Sanngɛ wɔ Anannganman a fitali wɔ aunngban'n, kpɛkuun jenvie'n katali bé su kplu. Be mlɔnnin kɛ sunmun sa nzue sroesroe sɔ'n nun.

¹¹ ?Anannganman, amuɛn'm be nun'n, onin yɛ ɔ ti kɛ wɔ sa-a? ?Wan yɛ ɔ ti kɛ wɔ sa b'ɔ yo-man sa tɛ fi mlɔnmlɔn-ɔn, b'ɔ yo sro-ɔ, b'ɔ nin manmanlɛ fata-a, b'ɔ kwla yo abonuan sa mun kɛ wɔ sa-a?

¹² A mannin ɔ́ sa fama'n su, kpɛkuun asiɛ'n ɔ'a mɛn be nga be fuan ye mun.

¹³ A deli ɔ sran mun wɔ aunnvuɛ silɛ dan'n ti, ɔ nin ɔ tinmin bɔ a lɛ i'n ti. A su tinngɛ be nan a ´fa be kɔ mɛn ng'ɔ ti ɔ liɛ klonglo'n, bɔ a kan kleli be kɛ a ´fa man be'n i nun lɔ.

¹⁴ Kɛ nvlefuɛ nga be mantan lɛ'n be ti jasin sɔ'n, bé wun usu be. Srɛ dan kpa kun Filistifuɛ mun.

¹⁵ Srɛ'n kun Edɔm lɔ kpɛnngbɛn mun kpo. Srɛ b'ɔ kun Moab sran dandan mun'n ti'n, be usu sa tututu. Kanaanfuɛ'm be kwlaa bé wla'n boli bé wun mlɔnmlɔnmlɔn.

¹⁶ Srɛ kun be, srɛ dan kpa kun be. Kɛ be wunnin ɔ wunmiɛn'n, Anannganman, srɛ b'ɔ kun be kpo'n ti, bé nuan ´muan lele san ɔ sran nga a deli be kanga'n nun'n be ´wie sin.

¹⁷ A su fa be kɔ ɔ oka'n su nan be ko tran lɔ. Lika sɔ'n yɛ wɔ Anannganman, a siesieli i kɛ ɔ bɔbɔ a ´kplan ɔ́ sua nun nin-ɔn.

¹⁸ Anannganman, ɔ liɛ'n, a ti famiɛn titi.»

¹⁹ Blɛ bɔ Ezipt famiɛn'n i nnɛn kpanngɔ mun, nin i kakaklolo tinngɛfuɛ mun, nin be kakaklolo mun, yɛ i nnɛn kpanngɔ su fufuɛ'm be wluli jenvie'n nun'n, Anannganman yoli man nzue'n katali bé su kplu, sanngɛ Izraɛlfuɛ'm be liɛ'n, be fali bé ja be kpɛli jenvie'n.

²⁰ Kɛ ɔ yoli sɔ'n, Nyanmiɛn nuan ijɔfuɛ bla bɔ be flɛ i Mari, b'ɔ ti Aarɔn i niaan bla'n, ɔ fali klɛn ba kun. Kɛ ɔ ´bo'n, wuun Izraɛl mmla'm be kwlaa be ´si able be su i su.

²¹ Mari sɔ jue'n su kɛ: «Amun `to jue be `manman Anannganman, afin kwlalɛ ng'ɔ kwlali yɛ'n, kwlalɛ sɔ'n ɔ yoli dan sakpa. Ɔ toli nnɛn kpanngɔ nin bé su fufuɛ mun yili jenvie'n nun lɔ!»

IZRAƐLFUƐ'M BE AAWLƐ FLƐNNƐN'N NUN NANTILƐ Mara lɔ nzue'n

²² Moiz fali Izraɛlfuɛ mun ndɛma jenvie su lɔ ɔli Sir aawlɛ flɛnnɛn'n i ndɛnman. Be nantili aawlɛ flɛnnɛn'n nun cɛn ba nsan, b'a nyan-man nzue b'a nɔn-man.

²³ Kɛ be juli lika nga be flɛ i Mara'n nun lɛ'n, nzue nga be wunnin i lɛ'n, b'a kwlɛ-mɛn i nɔn i wi b'ɔ yo'n ti. I sɔ ti yɛ be tɔnnin lika'n i dunman kɛ Mara nin-ɔn. Mara i bo'n yɛlɛ: Like Wi.

²⁴ Nzrafuɛ'm be trikili Moiz su, be seli i kɛ: «?Nzu yɛ e ´nɔn-ɔn?»

²⁵ Moiz kpan flɛli Anannganman, yɛ Anannganman kleli i waka sin kan kun. Moiz toli yili i nzue'n nun, nan nzue'n ɔ'a yo fɛ. Lɛ yɛ Anannganman mannin Izraɛlfuɛ'm be mmla fanunfanun wie mun nin-ɔn. Lɛ yɛ ɔ sali be niannin nin-ɔn.

²⁶ Ɔ seli be kɛ: «Sɛ amún nyin yi min Anannganman bɔ n ti amun Nyanmiɛn'n nan amun yo like nga be ti kpa min nyrun'n, sɛ amun sie amún su min mmla'm bé bo nan amun kwlaa amun fa bé su'n, tukpacɛ nga n fa yili i Eziptfuɛ'm bé su lɔ'n, n su fa yi-man amún su wie. Afin min yɛ n ti Anannganman bɔ n yo amun juejue nin-ɔn.»

²⁷ Izraɛlfuɛ'm be juli Elim. Be wunnin nzue ti blu-nin-nnyɔn nin mme ableso lika sɔ'n nun. Be kpɛli be ngblaliɛ nzue'n i wun lɛ.