Ezipt Lɔ Tulɛ'n 14 - NYANMIƐN NDƐ'N 1998

Ezipt Famiɛn'n suli Izraɛlfuɛ'm bé su

¹ Anannganman seli Moiz kɛ:

² «Kan kle Izraɛlfuɛ'm be kɛ be sa bé sin nan be wa kpɛ be ngblaliɛ klɔ nga be flɛ i Pi-Airɔt'n i nyrun lɛ, Migdɔl nin ndɛma jenvie'n be afiɛn. Lika sɔ'n nun lɛ yɛ amun `kpɛ amun ngblaliɛ'n yɛ amun `tran-an. Amun `tran klɔ nga be flɛ i Baal-Zefɔn'n i nyrun lɛ ndɛma jenvie'n i wun lɛ.

³ Famiɛn'n wa bu i kɛ wuun amun su wlan lika'n nun daan sa nan amun ´mlin aawlɛ flɛnnɛn'n nun.

⁴ N wa kete famiɛn'n i anwlɛn'n, ɔ wa su amun su. Min kwlalɛ bɔ n ´fa kwla famiɛn'n nin i alɛ kunfuɛ mun'n ti, sran'm be wa manman min. Kɛ ɔ ko yo sɔ'n, Eziptfuɛ'm be wa si kɛ min yɛ n ti Anannganman nin-ɔn.» Izraɛlfuɛ'm be yoli nga Moiz kan kleli be kɛ be yo'n.

⁵ Kɛ Ezipt famiɛn'n tili i kɛ Izraɛlfuɛ'm b'a wanndi'n, ɔ nin i mantanfuɛ'm be akunndan'n kacili, be waan: «?Nguɛ sa li yɛ y'a yo i yɛ? ?Ɔ yo sɛ ti yɛ e yacili be lɛ be ɔli bɔ y'a tra-man be ase kɛ be yo e kanga-a?»

⁶ Famiɛn'n man be fɛli i nnɛn kpanngɔ be minndali i kakaklolo'n, ɔ yiali i sonja'm bé nuan, yɛ fuauun yɛ ɔ nin be ɔli-ɔ.

⁷ Ɔ fali Ezipt kakaklolo'n i ngba yɛ ɔ fa ɔli-ɔ. Kakaklolo sɔ'm be nun ya nsiɛn be ti kpakpa dan. Kakaklolo'm be kwlaa'n, kun lɛ i su sran liɛ mun, kun lɛ i su sran liɛ mun.

⁸ Anannganman yoli man famiɛn'n i anwlɛn keteli, kɛ bɔ Izraɛlfuɛ'm be ´kɔ'n, be jasoli Ezipt lɔ kɛ b'a dun mmua b'a nyan be ti sa.

⁹ Eziptfuɛ'm be alɛ kunfuɛ'm be fali be nnɛn kpanngɔ mun nin be alɛ kunlɛ kakaklolo mun, be nin nnɛn kpanngɔ su fufuɛ mun be suli Izraɛlfuɛ'm bé su. Be wa toli be Pi-Airɔt, Baal-Zefɔn'n nyrun ndɛnman su lɛ kan be kpɛli be ngblaliɛ'n lɛ'n, jenvie wun lɛ.

¹⁰ Kɛ Izraɛlfuɛ'm be wunnin kɛ famiɛn'n nin Eziptfuɛ'm be su be su'n, srɛ kunnin be dan kpa. Be kpan flɛli Anannganman.

¹¹ Yɛ be seli Moiz kɛ: «?Asieliɛ nun-man Ezipt lɔ-ɔ? ?Nzu ti yɛ a fali ye bali aawlɛ flɛnnɛn'n nun wa kɛ e wa wu-ɔ? ?Nzu like yɛlɛ nga a yoli e yɛ'n, bɔ a fali e Ezipt lɔ bali-ɔ?

¹² ?Nán ndɛ nga yɛ e kan kleli wɔ Ezipt lɔ nin-ɔn? ?Y'a se-man wɔ kɛ a yaci e lɛ nan e yo Eziptfuɛ'm be kanga, nan kɛ e ko wu aawlɛ flɛnnɛn'n nun lɔ'n, ɔ flunman kɛ e su Eziptfuɛ mun?»

¹³ Moiz tɛli bé su kɛ: «Nán srɛ kun amun. Amun `jran kan amun o lɛ'n, an wa wun wafa nga Anannganman wa fa de amun ndɛ'n. Afin Eziptfuɛ nga amun wun be ndɛ yɛ'n, amun su wun-man be kun mlɔnmlɔn.

¹⁴ Anannganman'n wa kun amún ti alɛ. I ti amun `gua bliin.»

Nyanmiɛn i jenvie nun kpɛlɛ

¹⁵ Anannganman usali Moiz kɛ: «?Nguɛ ti yɛ a su flɛ min kɛ n wa uka wɔ nin-ɔn? Se Izraɛlfuɛ'm be kɛ be fa atin'n.

¹⁶ Ɔ liɛ'n, man ɔ kpɔnman'n su tinngɛ i jenvie'n su, kpɛ jenvie'n nun nan Izraɛlfuɛ'm be nanti aunnyan siɛ'n su be sin.

¹⁷ Min liɛ kusu, n wa kete Eziptfuɛ'm be anwlɛn'n, nan be wlu amún sin jenvie'n nun. Kwlalɛ bɔ n wa kwla Ezipt famiɛn'n nin i alɛ kunfuɛ mun, ɔ nin i nnɛn kpanngɔ su fufuɛ mun'n, yɛ sacilɛ bɔ n wa saci i kakaklolo mun'n i dunman nun ti sran'm be wa manman min.

¹⁸ Kɛ n ko kwla be'n, bɔ sran'm be ko manman min'n, Eziptfuɛ'm be wa si kɛ min yɛ n ti Anannganman nin-ɔn.»

¹⁹ Nyanmiɛn i anz ng'ɔ dun mmua be nyrun laa'n, ɔ ko trannin bé sin lɔ. I kunngba'n, sin wɛnsrɛn ng'ɔ o be nyrun'n sinnin bé sin lɔ.

²⁰ Sin wɛnsrɛn sɔ'n wo Eziptfuɛ'm be nin Izraɛlfuɛ'm be afiɛn. I bue kun ti aosin, yɛ i bue kun kusu kpaja kɔnguɛ, ɔ man be bue nnyɔn b'a kwla mantan-man be wiengu kɔnguɛ wunmuan'n nun.

²¹ Moiz tinngɛli i sa'n jenvie'n su. Anannganman yoli man aunngban dan kun b'ɔ fin wia afiliɛ lɔ'n fitali kɔnguɛ wunmuan'n nun. Ɔ suli nzue'n ɔli wa, ɔ suli ɔli wa, nan nzue'n i nun ɔ'a kpɛ, kpɛkuun i osu'n yoli wisiwisi.

²² Izraɛlfuɛ'm be nantili aunnyan siɛ'n su be sinnin, afin nzue'n i wie jrannin be sa fama su yɛ i wie jrannin be sa bɛ su kɛ talɛ wie sa .

²³ Eziptfuɛ'm be suli bé su. Famiɛn'n i nnɛn kpanngɔ'm be kwlaa yɛ i kakaklolo tinngɛfuɛ'm be nin be alɛ kakaklolo mun, yɛ i nnɛn kpanngɔ su fufuɛ'm be wluli bé sin jenvie'n nun lɔ-ɔ.

²⁴ Kɛ aliɛ'n wa cɛn'n, Anannganman b'ɔ o sin taaman nin sin wɛnsrɛn'n be afiɛn lɔ'n, ɔ niannin Ezipt alɛ kunfuɛ mun, nan ɔ'a sanngan be nun.

²⁵ Be kakaklolo'm bé ja'm b'a kpɛ-man bé wun kun, be kɔ-ɔ, ɔ yo-man ye kun. Kpɛkuun Eziptfuɛ'm be kpannin be seli kɛ: «Amun man e wanndi Izraɛlfuɛ'm be nyrun, afin Anannganman b'ɔ o bé sin'n nin e su kun.»

²⁶ Anannganman seli Moiz kɛ: «Tinngɛ ɔ́ sa'n nzue'n su nan ɔ yi sin i osu'n nun man ɔ kata Eziptfuɛ'm be nin be kakaklolo mun, ɔ nin be nnɛn kpanngɔ su fufuɛ'm be su.»

²⁷ Yɛ Moiz tinngɛli i sa'n nzue'n su-ɔ. Aliɛ njɛnniɛn su'n, jenvie'n sɛli i sin yili i osu'n nun ekun. Kɛ Eziptfuɛ'm be ´wanndi'n, be ´wun be wun-ɔn, nzue'n nin be ti kun, nan Anannganman ɔ'a kan be ɔ'a guɛ i jenvie'n i afiɛn.

²⁸ Nzue'n katali alɛ kakaklolo'm be nin famiɛn'n i alɛ kunfuɛ bɔ be fuan Izraɛlfuɛ mun'n be kwlaa bé su. Sran ba kun sa ɔ'a nyɛn-mɛn i ti.

²⁹ Sanngɛ Izraɛlfuɛ'm be liɛ be kpɛli jenvie'n bé ja nun. Be sinnin nzue ng'ɔ jrannin kɛ talɛ sa bé sa fama su nin bé sa bɛ su'n i afiɛn.

³⁰ Cɛn sɔ nun'n, Anannganman deli Izraɛlfuɛ mun Eziptfuɛ'm bé sa nun, yɛ Izraɛlfuɛ'm be wunnin Eziptfuɛ'm be fuɛn mun jenvie'n nuan lɛ.

³¹ Kɛ Izraɛlfuɛ'm be wunnin Anannganman i tinmin dan bɔ i ti ɔ kwlali Eziptfuɛ mun'n, bé nyin yili i. Be lafili i su, yɛ be lafili i sufuɛ Moiz su wie.