Ezipt Lɔ Tulɛ'n 12 - NYANMIƐN NDƐ'N 1998

Delɛ-cɛn i dilɛ'n i ba kpɛlɛ

¹ Anannganman seli Moiz nin Aarɔn Ezipt mɛn'n nun lɔ kɛ:

² «Anglo ng'ɔ o yɛ'n, ɔ wa yo amun afuɛ nuan'n i bo bolɛ anglo, ɔ ´yo amun afuɛ nuan'n i nun anglo'm be klikli'n.

³ Amun `ko kan kle Izraɛlfuɛ'm be kwlaa kɛ: ‹Anglo nga i le blu su'n, man awlobo kunngun'm be nun annzɛ sua kunngun'm be nun be `yi bua nga b'a kpɛ cro'n kun annzɛ boli nga b'a kpɛ cro'n kun.

⁴ Sɛ awlo kun nun sran liɛ'm b'a sɔn-man nan be kwla di-man nnɛn wunmuan kun'n, man be nin awlo ng'ɔ mantan be'n bé bo yo kun be fa nnɛn kun. Kɛ be awlo'n nun sran'm be nuan'n fa ti'n, i su yɛ be `nian nan b'a fa nnɛn sɔ nin-ɔn, yɛ be `nian sran kun i nnɛn liɛ ng'ɔ kwlɛ di'n su ekun.

⁵ Man bua nga ɔ'a kpɛ cro'n annzɛ boli nga ɔ'a kpɛ cro'n bɔ be ´fa'n, ɔ yo nga ɔ'a di afuɛ kun bɔ lɛ fi nun-mɛn i wun'n.

⁶ Be `sie i lɛ lele anglo'n i le blu le nnan su. Cɛn sɔ'n, i nnɔsua nun'n, man Izraɛl nvle'n nunfuɛ'm be kwlaa be kpɛ be nnɛn nga be kpali be'n be kɔmin.

⁷ Man be sɔ i mmoja'n wie nan be fa klikli sua kwlaa nga be di nnɛn sɔ'n nun'n i anuan'n i kadri'n i fama su nin i bɛ su, ɔ nin i ti su nglo .

⁸ Amun `wlɛ nnɛn sɔ'n sin su, kpɛkuun kɔnguɛ amun `di i nin kpaun bɔ kpaun ayre nun-man nun'n nin ijre wiwi mun.

⁹ Nán amun di nnɛn sɔ'n i nga ɔ'a be-man kpa'n nin i tɔnwa'n, san nnɛn nga be wlɛli i wunmuan'n sin su'n yɛ amun `di-ɔ. Amun `di i nin i ti'n, nin i ja mun, ɔ nin i klun lɔ ninnge mun.

¹⁰ Nán amun yaci wie lɛ man aliɛ cɛn su. Sɛ i wie ka lɛ'n nglɛmun'n, man be yrɛ i.

¹¹ Wafa nga ɔ fata kɛ amun di i'n yɛ: amun `fa amun bo kplo'n be ci amun afiɛn, man amun ngbabua'm be tran amún ja, yɛ man amun kpɔnman'm be tran amún sa nun. Amun `di i ndɛndɛ.› Delɛ-cɛn yɛ ɔ o lɛ-ɔ, i yɛ be di be manman min-ɔn.

¹² Kɔnguɛ nga, n wa sinsin Ezipt mɛn'n nun'n, n ´kun sran'm bé wa klikli mun, n ´kun nnɛn'm bé wa klikli'm be wie. N wa bu amuɛn nga be wo Ezipt mɛn'n nun'n be fɔ. Min yɛ n ti Anannganman nin-ɔn.

¹³ Mmoja b'ɔ o sua nga an tran be nun'n be anuan'm be su'n ti nzɔliɛ. Kɛ n ´wun mmoja'n, n ´tu tra amun, kpɛkuun kɛ n ´fa nyrɛnnɛn n yi i Eziptfuɛ'm bé su'n, ɔ su ju-man amún su wie .

¹⁴ Amun `fa cɛn sɔ'n amun `fa kpɛn amún wun wla. Kɛ ɔ ko ju'n, amun kwlaa amun `yia, amun `manman min Anannganman sa nga n yoli'n ti. Kɛ ɔ fɛ i blɛ nga nun'n, amun nin amun osu nunfuɛ mun amun `di i sɔ cɛn'n titi. Ɔ ti mmla kun bɔ be kwla kaci-mɛn i.»

Kpaun bɔ kpaun ayre nun-man nun'n i cɛn'n

¹⁵ Anannganman waan: «Amun `di kpaun nga b'a gua-man nun kpaun ayre lele le nso. Kɛ ɔ bo i bo cɛn klikli'n su'n, nán be wun kpaun ayre amún sua'm be nun kun. Kɛ ɔ fɛ i cɛn klikli'n su b'ɔ fa ju cɛn nso su'n, sɛ sran kun di kpaun bɔ kpaun ayre o nun'n, be `fuɛn i Izraɛlfuɛ'm be afiɛn.

¹⁶ Cɛn klikli'n nin cɛn i nso su'n, amun `yia be `su min. Nán amun di junman fi, san amun aliɛ fuɛ'n yɛ amun kwla tɔn-ɔn.

¹⁷ Amun `di kpaun bɔ kpaun ayre nun-man nun'n i cɛn'n, nan amún wla `kpɛn cɛn bɔ min man amun tuli Ezipt lɔ'n su. Kɛ ɔ fɛ i blɛ nga nun'n, amun nin amun osu nunfuɛ mun amun `di i sɔ cɛn'n titi be `fa kpɛn amún wun wla. Ɔ ti mmla kun bɔ be kwla kaci-mɛn i.

¹⁸ Kɛ ɔ fɛ i anglo klikli'n i le blu le nnan su'n i nnɔsua nun'n, b'ɔ ´fa ju anglo'n i le ablaɔn-nin-kun'n i nnɔsua nun'n, amun `di kpaun nga kpaun ayre nun-man nun'n.

¹⁹ Nán man be wun kpaun ayre amún sua'm be nun sɔ lele cɛn ba nso. Sɛ sran kun, aofuɛ annzɛ kusu Izraɛlfuɛ kun ng'ɔ di kpaun nga kpaun ayre o nun'n, be `fuɛn i Izraɛl nvle'n nun .

²⁰ Nán amun di kpaun nga kpaun ayre o nun. Kan kwlaa nga amun tran lɛ'n, an `di kpaun nga kpaun ayre nun-man nun'n.»

Delɛ-cɛn'n i aliɛ tɔnlɛ'n i siesielɛ

²¹ Moiz yiali Izraɛlfuɛ'm be awlobo kpɛnngbɛn mun nan ɔ'a se be kɛ: «Amun `ko fa bua nga b'a kpɛ cro'n annzɛ boli nga b'a kpɛ cro'n mun, amun `kpɛ be kɔmin nan amun nin amun awlofuɛ mun amun `fa di Delɛ-cɛn'n.

²² Amun `fa waka nga be flɛ i izɔp'n i sama nin i su nnya'n, amun `fa bo nnɛn mmoja b'ɔ o kpongbo nun'n i nun, amun `fa mmoja'n be klikli i anuan'n i kadri i bue nnyɔn'm bé su, ɔ nin anuan'n i ti su nglo. Kɛ ɔ fɛ i blɛ sɔ nun'n lele bɔ aliɛ'n ´fa cɛn'n, nán sran fi fite gua'n su kun.

²³ Anannganman wa sinsin Ezipt mɛn'n nun, ɔ ´kle Eziptfuɛ'm be nyrɛnnɛn. Sɛ ɔ wun mmoja'n anuan'n i kadri i bue nnyɔn'm bé su, ɔ nin anuan'n i ti su nglo'n, ɔ ´sin, yɛ ɔ man like sacifuɛ'n su wlu-man amún sua'm be nun kɛ ɔ saci like.

²⁴ Amun nin amun osu nunfuɛ mun amun `fa mmla nga'm be su tititi.

²⁵ Blɛ bɔ amun wlu mɛn nga Anannganman seli kɛ ɔ ´fa man amun'n i nun'n, amun `yo i sɔ titi.

²⁶ Sɛ amun mma'm be usa amun cɛn wie kɛ: ‹?Like nga amun ´yo i lɛ'n, i bo'n yɛlɛ onin?›

²⁷ Amun `tɛ bé su kɛ: ‹Ɔ ti tɛ kun bɔ be yi be fa man Anannganman Delɛ-cɛn'n nun. Afin kɛ bɔ Izraɛlfuɛ'm be tɛ o Ezipt lɔ'n, Anannganman fali wie'n yili i Eziptfuɛ'm bé su, sanngɛ kɛ ɔ ´sin'n, ɔ'a jran-man e sua liɛ'm be su wie, ɔ yacili ye awlo'm be lɛ.› » Kɛ ɔ yoli sɔ'n, Izraɛlfuɛ'm be kotoli nan b'a su Anannganman'n.

²⁸ I sin be ɔli be ko yoli sa nga Anannganman'n kan kleli Moiz nin Aarɔn'n i kwlaa.

Ba klikli'm be wulɛ

²⁹ Kɔnguɛ afiɛn'n, Anannganman yoli man ba klikli nga be o Ezipt mɛn'n nun'n be wuli. Kɛ ɔ fɛ i famiɛn'n b'ɔ o famiɛn bia'n su'n i wa klikli'n i su'n lele fa ju i bisuafuɛ'm be wa klikli liɛ'm be su'n be kwlaa be wuli. Nnɛn'm bé wa klikli liɛ'm be wuli wie.

³⁰ Kɔnguɛ sɔ nun'n, famiɛn'n i mantanfuɛ'm be nin Eziptfuɛ'm be kwlaa be jasoli. Be tili awuyomo bolɛ mɛn wunmuan'n nun, afin ɔ lɛ-man awlo kun bɔ sran ɔ'a wu-man nun-ɔn.

³¹ Kɔnguɛ, famiɛn'n flɛli Moiz nin Aarɔn nan ɔ'a se be kɛ: «Amun `jaso min mɛn'n nun wa, amun nin Izraɛlfuɛ mun amun `wɔ, amun `wɔ be ko su Anannganman kɛ amun fa usali'n sa.

³² Amun `fa amun nnɛn'm be ngba kɛ amun fa kannin'n sa nan amun `wɔ. An `srɛ Nyanmiɛn kusu man ɔ yo min wun sa ye.»

³³ Eziptfuɛ'm be buli i kɛ wuun be kwlaa be su wa wie wu, i sɔ'n ti, be suli Izraɛlfuɛ'm bé bo kɛ be jaso be mɛn'n nun.

³⁴ I sɔ'n ti yɛ Izraɛlfuɛ'm be fali ble sanmlɛn bɔ be boli b'ɔ nian kwla wla-man'n nan b'a fa b'a ɔ nin-ɔn. Be cicili ble sanmlɛn bolɛ like'n ɔ nin ble sanmlɛn i bɔbɔ'n be tralɛ'm be nun, yɛ be suɛli be wati'n su.

³⁵ Like nga Moiz waan Izraɛlfuɛ'm be yo'n, be yoli. Be srɛli Eziptfuɛ'm be sika ɔkwlɛ ninnge mun nin jɛtɛ ufue ninnge mun, ɔ nin tralɛ mun.

³⁶ Anannganman man Eziptfuɛ'm be yoli Izraɛlfuɛ'm be ye. Be fali ninnge nga be srɛli i bé sa nun'n be mannin be. Kɛ be deli bé bo ninnge'n kɛ nga sa.

³⁷ Izraɛlfuɛ'm be tuli bé bo Ramsɛs klɔ'n su lɛ be nanti ɔli Sikɔt. Be yasua'm be ngunmin'n, sɛ b'a ka-man bla nin ba kanngan, ɔ nin oke mun'n, be kwla ju sran kɔe akpi-akpi ya nsiɛn (600.000).

³⁸ Sran sunman bɔ be ti nvle uflɛ wie'm be nun sran'n be nin Izraɛlfuɛ mun yɛ be ɔli-ɔ. Be bua mun nin be boli mun, ɔ nin be nannin'm be sɔnnin kpa.

³⁹ Ble sanmlɛn nga be nin i fin Ezipt lɔ bali'n, bɔ be boli i lɔ sanngɛ ɔ'a kwla wla-man'n, be fa tɔnnin kpaun paplaapla nga be gua-man nun kpaun ayre'n, afin be kannin bé bo Ezipt lɔ. Kɛ be balɛ'n yoli kplilɛ'n ti, b'a kwla nyan-man blɛ b'a minndɛ-man kɛ ble sanmlɛn'n wla ka. B'a kwla fa-man ndidiɛ ninnge b'a tra-man nun.

⁴⁰ Izraɛlfuɛ'm be trannin Ezipt lɔ afuɛ ya nnan afuɛ ablasan .

⁴¹ Kɛ afuɛ ya nnan afuɛ ablasan'n wieli'n, cɛn kasiɛn'n su sɛsɛ'n, Anannganman i sran'm be tuli Ezipt lɔ. Be ´kɔ'n, be lɔngɔ su sɛsɛsɛ kɛ sonja mun sa.

⁴² Kɛ Anannganman niannin Izraɛlfuɛ'm be su kɔnguɛ sɔ'n nun'n b'ɔ fali be Ezipt lɔ fiteli'n, i ti, afuɛ kwlaa nun'n, kɛ kɔnguɛ sɔ'n i blɛ'n ko ju'n, Izraɛlfuɛ'm be nian su be fa di cɛn be man Anannganman, afin ɔ ti i liɛ klonglo.

Delɛ-cɛn'n i dilɛ'n i wun mmla

⁴³ Anannganman seli Moiz nin Aarɔn be kɛ: «Delɛ-cɛn'n i dilɛ'n i su mmla nga n ´fa man amun'n yɛ: Aofuɛ fi lɛ-man atin kɛ ɔ di Delɛ-cɛn aliɛ'n wie.

⁴⁴ Kanga nga be toli i'n, man be wlɛ i klɛn, nan ɔ'a kwla di wie.

⁴⁵ Aofuɛ nga ɔ tran amún wun lɛ le nnyɔn kun'n, annzɛ junman difuɛ nga be tuɛ i kalɛ'n, be lɛ-man atin kɛ be di Delɛ-cɛn'n aliɛ'n wie.

⁴⁶ Amun `di nnɛn'n sua klun lɔ, nán amun fa wie fite gua su lɔ . Nán amun bobo nnɛn'n i owie mun.

⁴⁷ Man Izraɛl nvle'n nunfuɛ'm be kwlakwla be di cɛn sɔ'n.

⁴⁸ Sɛ aofuɛ kun b'ɔ tran amun wun'n klo kɛ ɔ ´di Delɛ-cɛn'n Anannganman i manmanlɛ'n ti'n, man be wla yasua nga be o i awlo'n nun'm be kwlaa be klɛn. I sin ɔ ´kwla di wie kɛ Izraɛlfuɛ'm be sa. Nán man sran nga be nian wlɛ-mɛn i klɛn'n di aliɛ'n wie.

⁴⁹ Mmla sɔ'm be ti amun Izraɛlfuɛ mun amun liɛ, yɛ be ti aofuɛ nga be tran amun mɛn'n nun be liɛ wie kusu.»

⁵⁰ Izraɛlfuɛ'm be kwlaa be yoli nga Anannganman kan kleli Moiz nin Aarɔn'n. Be niannin su sɛsɛ be yoli.

⁵¹ Cɛn sɔ nun'n, Anannganman yoli man Izraɛlfuɛ'm be tuli Ezipt lɔ. Be kɔ'n be lɔngɔ su sɛsɛsɛ kɛ sonja'm be sa.