Ezipt Lɔ Tulɛ'n 11 - NYANMIƐN NDƐ'N 1998

Nyrɛnnɛn kasiɛn'n i jɔ bolɛ

¹ Anannganman seli Moiz kɛ: «N wa fa nyrɛnnɛn kasiɛn'n n ´fa yi i Ezipt famiɛn'n nin Eziptfuɛ'm be su. Kɛ ɔ yo sɔ'n, ɔ ´yaci amun nun amun ´kɔ. Ɔ ´fuan amun wa mlɔnmlɔn.

² Kan kle Izraɛlfuɛ'm be kɛ man yasua'm be srɛ Ezipt yasua nga be nin be tran mantan su'n be sika ɔkwlɛ nin jɛtɛ ufue ninnge mun. Man bla'm be kusu be srɛ Ezipt bla nga be nin be tran mantan su'n be sika ɔkwlɛ nin jɛtɛ ufue ninnge mun.»

³ Anannganman yoli man Eziptfuɛ'm bé nyin yili Izraɛlfuɛ mun. Moiz bɔbɔ kpa'n yoli sran dan kpa kun Ezipt mɛn'n nun Ezipt famiɛn'n i mantanfuɛ'm be nyrun, ɔ nin nvle wunmuan'n i nyrun.

⁴ Moiz seli famiɛn'n kɛ: «Ndɛ nga Anannganman kan'n yɛ: ‹Kɔnguɛ kɛ lika'n wa bu nun'n, n wa sinsin Ezipt mɛn'n nun.

⁵ Ezipt mɛn'n nun ba klikli'm be kwlaa be wa wu. Ɔ bɔbɔ kpa bɔ a o famiɛn bia'n su'n, ɔ́ wa klikli nin o, ɔ junman difuɛ bla ng'ɔ si ble'n i wa klikli nin o, ɔ nnɛn'm be mma klikli mun o, be kwlaa be ´wu.

⁶ I sɔ blɛ'n nun'n, be ´ti kpanlɛ. I sɔ kpanlɛ liɛ'n, be nian ti-mɛn i wunsu le, yɛ be su ti-mɛn i wunsu nganniɛn kun le mlɔnmlɔn.

⁷ Sanngɛ Izraɛlfuɛ'm be tranwlɛ liɛ'n nun lɔ'n, be su ti-man alua kun bolɛ, ɔ nin nnɛn uflɛ wie kpanlɛ nan se kɛ sran yɛ be ti i kpanlɛ-ɔ. I sɔ'n nun'n, amun wa wun i wlɛ kɛ m bɔbɔ min Anannganman n sie Izraɛlfuɛ mun nin Eziptfuɛ'm be afiɛn ngbaciɛ.›

⁸ Kpɛkuun ɔ mantanfuɛ nga be o yɛ'n be kwlaa be wa koto mín bo sa klo, yɛ be ´se min kɛ: ‹A nin ɔ sran mun amun `wɔ,› kpɛkuun, wuun n su kɔ.» Moiz fali ya dan kpa nan ɔ'a jaso famiɛn'n i awlo lɔ ɔ'a ɔ.

⁹ Anannganman seli Moiz ekun kɛ: «Sɛ famiɛn'n waan ɔ fɛ i ti de-man ndɛ'n, kɛ ɔ ´yo nan m'an yi atrɛ kpanngban i mɛn'n nun'n i ti-ɔ.»

¹⁰ Moiz nin Aarɔn b'a dun mmua b'a yi atrɛ kpanngban kpa famiɛn'n nyrun, sanngɛ Anannganman yoli man i anwlɛn'n keteli. I sɔ'n ti, ɔ'a yaci-man Izraɛlfuɛ'm be nun kɛ be wɔ.