Ezipt Lɔ Tulɛ'n 10 - NYANMIƐN NDƐ'N 1998

Lalo'm be balɛ

¹ Anannganman seli Moiz kɛ: «Kɔ famiɛn'n i wun lɔ. Min yɛ n keteli i nin i mantanfuɛ'm be anwlɛn nin-ɔn, kɛ ɔ ´yo nan m'an yo min abonuan sa mun be afiɛn'n ti.

² N ´yo i sɔ nan w'a kwla kan klelɛ nga n kleli Eziptfuɛ'm be nun'n ɔ nin abonuan sa nga n yoli be Ezipt mɛn'n nun'n w'a kle ɔ mma mun nin wɔ anunman mun'n ti. Kpɛkuun amun wa si kɛ min yɛ n ti Anannganman nin-ɔn.»

³ Moiz nin Aarɔn be ko toli Ezipt famiɛn'n nan b'a se i kɛ: «Anannganman b'ɔ ti Ebre'm be Nyanmiɛn'n, ɔ usa wɔ kɛ: ‹?Ɔ wun ase nga ɔ waan a kɛn-mɛn i lɛ'n, a ´yo i sɔ lele ´fa ju cɛn onin? Man min sran'm be atin nan be kɔ su min.

⁴ Sɛ ɔ waan a kplin-man su'n, ainman, n wa sunman lalo mun ɔ mɛn'n i wunmuan'n nun.

⁵ Be wa kata asiɛ wunmuan'n su sa tuun, ɔ man be su wun-man asiɛ ba kpa'n kun, ninnge nga be luali annzɛ nga be tali'n, nga bɔ nzraama'n ɔ'a saci-man be'n, lalo'm be wa saci i kaan sɔ'n ngba. Be wa di bo nun waka'm be nnya'n kwlakwla.

⁶ Be wa yi wɔ awlo'n sa piɛ. Be ´yi ɔ mantanfuɛ mun nin Eziptfuɛ'm be kwlaa bé sua mun sa piɛ. Kɛ ɔ fɛ i ɔ nannan'm be blɛ su lele b'ɔ fa ju ndɛ yɛ'n, be nian wun-mɛn i sɔ nyrɛnnɛn kɛ nga sa le.› » Moiz jasoli famiɛn'n wun lɛ, yɛ ɔ ɔli-ɔ.

⁷ Famiɛn'n i mantanfuɛ'm be seli famiɛn'n kɛ: «?Mantuan sɔ'n ´kle e nyrɛnnɛn sa lele ´ju cɛn onin? ?Sɛ ɔ ti sɔ-ɔ, wuun yaci Izraɛl yasua'm be nun nan be ko su Anannganman be Nyanmiɛn sɔ'n? ?A wun-man kɛ Ezipt mɛn'n su saci?»

⁸ Be flɛli Moiz nin Aarɔn famiɛn'n i lika lɔ. Ɔ seli be kɛ: «Amun `wɔ Anannganman b'ɔ ti amun Nyanmiɛn'n i sulɛ. ?Wan mun li yɛ be ´kɔ-ɔ?»

⁹ Moiz tɛli Ezipt famiɛn'n su kɛ: «E kwlakwla yɛ e ´kɔ-ɔ, i ba kanngan mun o, i kpɛnngbɛn mun o, i yasua mun o, i bla mun o, e nin e bua mun nin e nannin mun ɔ nin é boli mun, afin ɔ fata kɛ e ko di cɛn e fa manman Anannganman.»

¹⁰ Ezipt famiɛn'n yoli be fiaan, i waan: «Man Anannganman nin amun nanti, afin n wa man amun atin, amun nin amun mma mun amun ´kɔ. Sanngɛ e wun i wein kɛ amun klun akunndan'n ti-man kpa.

¹¹ N su kplin-man su kɛ amun kwlaa amun wɔ. San amun yasua'm be ngunmin yɛ be ´kɔ Anannganman i sulɛ-ɔ. I kwlaa nga amun kwla usa kɛ n ´yo man amun'n yɛ ɔ o lɛ-ɔ.» Kpɛkuun be kannin bé bo famiɛn'n i awlo'n nun.

¹² Yɛ Anannganman seli Moiz kɛ: «Man ɔ́ sa'n su, tinngɛ nun Ezipt mɛn'n su, nan lalo'm be bla. Be wa di waka nin ijre nga nzraama'n ɔ'a saci-man be'n be kwlaa be nnya'n.»

¹³ Moiz mannin kpɔnman'n su, ɔ tinngɛli i Ezipt mɛn'n su, yɛ Anannganman yoli man aunngban kun fin wia afiliɛ lɔ wa fitali Ezipt mɛn'n nun. Ɔ fitali wia nun nin kɔnguɛ wunmuan'n nun. Nglɛmun kɛ aliɛ'n ´cɛn'n, aunngban'n ɔ'a fa lalo mun ɔ'a ba.

¹⁴ Be truli Ezipt mɛn wunmuan'n nun, kpɛkuun be trantrannin lika'n kwlaa nun. Be sɔnnin kaka kpa, be nian wun-man be kaka sɔ le, yɛ be su wun-man be kaka kɛ nga sa kun le.

¹⁵ Be katali asiɛ wunmuan'n su, kpɛkuun asiɛ'n su dunnin tuun. Be dili ijre nin waka mma nga nzraama'n ɔ'a saci-man be'n be kwlaa. I sɔ'n ti Ezipt mɛn wunmuan'n nun'n, nnya wie fi ɔ'a ka-man waka'm be su, yɛ ijre wie fi ɔ'a ka-man fie'm be su .

¹⁶ Famiɛn'n flɛli Moiz nin Aarɔn be trɛlɛlɛ, yɛ ɔ seli be kɛ: «M'an fɔn Anannganman b'ɔ ti amun Nyanmiɛn'n i wun, yɛ m'an fɔn amun kusu amún wun.

¹⁷ Sanngɛ amun `yaci mín sa tɛ'n be cɛ min ndɛ liɛ'n, nan amun `srɛ Anannganman amun Nyanmiɛn'n man ɔ fuan nyrɛnnɛn sa nga man ɔ jaso mín wun wa wɔ mmua ekun.»

¹⁸ Moiz tuli i bo famiɛn'n wun lɛ, ɔ ko srɛli Anannganman.

¹⁹ Anannganman yoli man aunngban dan kpa kun fitali, ɔ fin wia atɔliɛ lɔ, ɔ wa fali lalo mun ɔli ɔ ko guali jenvie'n nun lɔ.

²⁰ Sanngɛ Anannganman yoli man famiɛn'n i anwlɛn'n keteli, ɔ man i waan ɔ yaci-man Izraɛlfuɛ'm be nun be kɔ-man.

Aosin'n wlali tritri kpa

²¹ Anannganman seli Moiz kɛ: «Man ɔ́ sa'n su nglo! Man aosin wla Ezipt mɛn'n nun, man ɔ wla kpa tritri ɔ ´yo kpikplikpi kpa kɛ like bɔ be kɛn i-ɔ ɔ yo ye'n sa.»

²² Moiz mɛnnin i sa'n su nglo. Aosin tuun kpa wlali Ezipt mɛn'n nun cɛn ba klonglo nsan .

²³ Cɛn nsan sɔ nun'n, Eziptfuɛ'm be kwla wun-man be wiengu, i sɔ'n ti sran fi tu-mɛn i bo i awlo'n nun. Sanngɛ kan Izraɛlfuɛ'm be tran lɛ'n ti weiin.

²⁴ Famiɛn'n flɛli Moiz nan ɔ'a se i kɛ: «Amun `ko su Anannganman. Amún yi mun nin amun mma mun bɔbɔ be `wɔ wie, san amun nannin mun, nin amun bua mun, ɔ nin amun boli mun yɛ be ´ka wa-a.»

²⁵ Moiz tɛli i su kɛ: «N kplin-man su. Ɔ bɔbɔ a wa man e nnɛn nga e ´fa yi bo kun yolɛ i su tɛ mun nin tɛ nga be yra be nnɛn kɔlikɔli'n be fa man Anannganman'n.

²⁶ Kannzɛ a fa man ye'n, e ´fa e liɛ laa mun e `kɔ, kun sa su ka-man wa. E wa fa e liɛ laa sɔ'm be nun wie mun e man Nyanmiɛn, sanngɛ kɛ bɔ e nian ju-man lɔ'n, e si-man nga e ´fa'n.»

²⁷ Anannganman yoli man famiɛn'n keteli i anwlɛn'n, ɔ man i waan ɔ man-man be atin be kɔ-man.

²⁸ Ɔ seli Moiz kɛ: «Jaso min awlo'n nun, nian ɔ́ wun kpa, nán ɔ ja kpɛn min nyrun wa kun, sɛ ɔ'a yo-man sɔ'n, san a ´wu.»

²⁹ Moiz seli i kɛ: «M'an ti. Yɛ ɔ nuan'n wo su a kɛn i lɛ-ɔ, n su ba-man ɔ nyrun wa kun.»