Ezipt Lɔ Tulɛ'n 1 - NYANMIƐN NDƐ'N 1998

ANANNGANMAN MAN IZRAƐLFUƐ'M BE TULI EZIPT LƆ Izraɛlfuɛ'm be yoli kanga Ezipt mɛn'n nun lɔ

¹ Kɛ Zakɔb bɔ be flɛ i Izraɛl'n ba Ezipt'n, ɔ nin i mma'm be yɛ be bali-ɔ. Kɛ be ba'n, be kwlaa be fali be yi nin be mma mun. Zakɔb mma'm be dunman'm be yɛ:

² Ribɛn, Simeɔn, Levi, Zida,

³ Isakar, Zabilɔn, Bɛnzamɛn,

⁴ Dan, Nɛftali, Gad yɛ Azɛr.

⁵ Sran nga be fin Zakɔb osu nun'n be kwlaa be ti ableso. I blɛ sɔ nun'n, wuun i wa kun nga be flɛ i Zozɛf'n wo i liɛ Ezipt lɔ laa.

⁶ I sin'n, Zozɛf wa wuli. I niaan mun nin i sɔ blɛ liɛ nun sran'm be kwlaa be wuli.

⁷ Sanngɛ Izraɛlfuɛ'm be wuli ba mun kaka kpa nan b'a trɛ trɛlɛ kpa. I sɔ'n ti, be nyannin wunmiɛn kpa, be trannin Ezipt mɛn'n i lika'n kwlaa.

⁸ Yɛ famiɛn uflɛ kun bɔ i liɛ'n ɔ'a si-man Zozɛf mlɔnmlɔn'n, ɔ wa jasoli su nan ɔ'a sie Ezipt mɛn'n.

⁹ Ɔ seli i nvlefuɛ'm be kɛ: «Amun `nian, Izraɛlfuɛ'm be yɛ b'a sɔn b'a tra e yɛ, kpɛkuun be kekle ɔ'a tra ye.

¹⁰ Man e kunndɛ wafa nga e ko yo nan b'a yaci trɛlɛ'n, afin sɛ ɔ'a yo-man sɔ-ɔ, sɛ alɛ wie wa fu e nun'n, be ´uka e kpɔfuɛ mun be nin ye ´kun, kpɛkuun be ´jaso e mɛn'n nun wa be ´kɔ.»

¹¹ Eziptfuɛ'm be sieli Izraɛlfuɛ'm be su junman kpɛnngbɛn mun. Be waan be `man Izraɛlfuɛ'm be junman kekle man be di. Kɛ be yoli sɔ yɛ be fa kplannin Pitɔm nin Ramsɛs b'ɔ be ti Ezipt famiɛn'n i ninnge siewlɛ klɔ mun-ɔn.

¹² Kɛ be ´kle be nyrɛnnɛn dan be kɔ be nyrun'n, wuun blɛ li yɛ b'a se be kɛ be trɛ nan be fa lika nin-ɔn. I sɔ'n ti, Eziptfuɛ'm be wa kpɔli Izraɛlfuɛ'm be kpɔlɛ kpa.

¹³ Eziptfuɛ'm be fa be kacili be kanga nan b'a yo be tɛtɛ kpa.

¹⁴ Junman'n i kekle b'ɔ yoli'n ti'n, Izraɛlfuɛ'm b'a wun-man be wun fɛ, afin be si fa, be kpɛ bliki, be di blo junman'n kwlakwla kpan. E `kpɛ kpo e `se kɛ be dili junman tɛtɛ'n kwlaa. B'a si-man be aunnvuɛ mlɔnmlɔn.

Ezipt famiɛn'n i Izraɛlfuɛ'm be tɛtɛ yolɛ

¹⁵ Ebre'm be lɛ ba wufuɛ nnyɔn. Be flɛ kun kɛ Sifra, yɛ be flɛ kun ekun kɛ Pia.

¹⁶ Ezipt famiɛn'n wlali bé su nun kpa kɛ: «Blɛ bɔ amun ´uka Ebre bla mun be ´wu ba'n, amun `nian ba nga be wu i'n kpa. Sɛ ɔ ti yasua'n, amun `kun i, sɛ kusu ɔ ti bla'n, amun `yaci i lɛ.»

¹⁷ Sanngɛ ba wufuɛ sɔ mun bé nyin yi Nyanmiɛn i ti, b'a yo-man like nga famiɛn'n seli be kɛ be yo'n. Ɔ man be yacili ba yasua'm be lɛ, b'a kun-man be.

¹⁸ Kɛ ɔ yoli sɔ'n, famiɛn'n wa flɛli be, ɔ usali be kɛ: «?Ɔ yoli sɛ ti yɛ amu'an kun-man ba yasua mun bɔ amun yacili be lɛ-ɔ?»

¹⁹ Be tɛli i su kɛ: «Sa nga ti bɔ be kali lɛ sɔ'n yɛlɛ kɛ Ebre bla'm be ti-man kɛ Ezipt bla'm be sa. Be liɛ be ti juejue, i sɔ'n ti, kɛ ba wufuɛ'm be ´fa ju lɛ'n, wuun b'a wu be wa'n lalaa.»

²⁰ Izraɛlfuɛ'm be wa trɛli kpa, be wunmiɛn'n yoli dan. Yɛ Nyanmiɛn yoli ba wufuɛ'm be kpa.

²¹ Kɛ bé nyin yili Nyanmiɛn'n ti, Nyanmiɛn man be bɔbɔ be wuli ba kaka kpa.

²² Siɛn liɛ'n, Ezipt famiɛn wlali i nvlefuɛ'm be kwlaa be su nun kɛ: «Ebre'm be wa yasua nɔnman kwlaa nga be wu be'n, amun `to be gua Nil nzue'n nun lɔ, sanngɛ amun `yaci ba bla'm be lɛ.»