Ɛstɛr 9 - NYANMIƐN NDƐ'N 1998

Zuif'm be klunngbɔ tulɛ

¹ Adar anglo b'ɔ ti anglo blu-nin-nnyɔn su'n, i le blu-nin-nsan'n juli. Famiɛn'n i mmla nga be boli i jɔ sinnin'n, cɛn sɔ'n nun yɛ Zuif'm be kpɔfuɛ'm be waan wuun be ´kle be nun nin-ɔn, sanngɛ ɔ'a yo-man ye. Zuif'm be li yɛ be wa kleli be kpɔfuɛ'm be nun-ɔn.

² Asieris mɛn'n i akpasua'n kwlaa nga Zuif'm be o su'n, be ti yiali klɔ'm be su, be nin be nga be buli be kunlɛ akunndan'n be kunnin. Sran fi jran be nyrun-ɔn, ɔ'a yo-man ye, afin sran'm be kwlaa be sroli be.

³ Famiɛn'n i mantanfuɛ mun nin i ja nun jranfuɛ mun, nin siefuɛ mun, nin awa junman difuɛ'm be kwlaa be trannin Zuif'm bé sin Mardose wun srɛ ti.

⁴ Afin Mardose yɛ ɔ nyannin nyrun famiɛn'n i mantanfuɛ'm be nun-ɔn. Be tili i dunman'n akpasua'n kwlaa su. I dunman'n fu ɔli i nyrun titi.

⁵ Ɔ man Zuif'm be klun klo like nga be klo kɛ be ´fa yo be kpɔfuɛ mun'n, be fa yoli be. Be kunnin be kunlɛ kpa.

⁶ Famiɛn klɔ lɔ'n Zuif'm be kunnin sran ya nnun.

^7-10 Be kunnin Amɛdata wa Aman b'ɔ kpɔ Zuif mun'n i wa blu mun: Parsandata, Dalfɔn, Aspata, Pɔrata, Adalia, Aridata, Parmasta, Arizai, Aridai yɛ Vazɛzata. Sanngɛ b'a fɛn-man be nga be kunnin be'n bé bo ninnge mun.

¹¹ Cɛn kunngba sɔ nun'n, be boli sran nga be kunnin be Siz b'ɔ ti famiɛn klɔ'n su lɔ'n be nuan kleli famiɛn'n.

¹² Yɛ famiɛn'n seli i yi Ɛstɛr kɛ: «Siz wa'n, Zuif'm be kunnin sran ya nnun ukali Aman i wa blu'm be su. ?Yɛ akpasua-akpasua kun nga'm be su, be ka sran nga be kunnin be'n ɔ ´yo ye yɛ ɔ o lɛ-ɔ? Nan sanngɛ sɛ ɔ waan a ´srɛ like uflɛ-ɔ, srɛ, m ´man wɔ.»

¹³ Ɛstɛr tɛli i su kɛ: «Nannan, sɛ ɔ su kle-man ɔ yalɛ'n, man Siz wa Zuif'm be atin ainman man be yo sa nga wɔ man be yoli i ndɛkɛn'n ekun. Yɛ man be wla Aman i wa blu'm be fuɛn'm be kɔmin nyanman nan be `sende be nglo.»

¹⁴ Famiɛn'n mannin atin be yoli be sɔ, be boli ndɛ'n i jɔ sinnin Siz klɔ'n su, kpɛkuun be sendeli Aman wa blu'm be fuɛn'm be nglo.

¹⁵ Siz lɔ Zuif'm be yiali Adar anglo'n i le blu-nin-nnan'n su nan b'a kun Siz sran ya nsan ekun, sanngɛ b'a fɛn-man bé bo ninnge mun.

¹⁶ Zuif nga be o akpasua kun nga'm be su'n, be kusu be yiali be kplili bé ti. Be kunnin be kpɔfuɛ'm be nun sran akpi-akpi ableso-nin-nnun (75.000). Sanngɛ b'a fɛn-man bé bo ninnge mun.

¹⁷ Adar anglo'n i le blu-nin-nsan'n su yɛ be yoli i sɔ sa nin-ɔn. I le blu-nin-nnan'n su be deli wunmiɛn. Be fa yoli be cɛn be dili, be klun jɔli.

¹⁸ Siz lɔ Zuif'm be yiali, yɛ be tuli be klunngbɔ liɛ'n anglo'n i le blu le nsan nin i le blu le nnan'n su. Yɛ i le blu-nin-nnun su'n be deli wunmiɛn. Be fa wunmiɛn delɛ sɔ'n yoli bé cɛn dili yɛ be klun jɔli.

¹⁹ I sɔ'n ti yɛ man Zuif nga be tran klɔ kanngan nin nanmue'm be nun'n, be fa Adar anglo'n i le blu-nin-nnan su'n be fa yo bé cɛn be di nin-ɔn. Cɛn sɔ'n nun be klun jɔ kpa. Be di like kpanngban, yɛ be cɛ be wiengu be like diwa.

Fɔtɔ tulɛ cɛn'n i bo

²⁰ Mardose klɛli sa sɔ mun ko mannin Zuif nga be o Asieris i mɛn'n nun akpasua kunngun kwlaa be su'n, akpasua nga be o mmua'n bé su o, nga be o koko'n bé su o.

²¹ Ɔ klɛli i kɛ afuɛ nuan kwlaa be `fa Adar anglo'n i le blu-nin-nnan nin i le blu-nin-nnun su'n be `yo cɛn be `di.

²² Cɛn dilɛ sɔ'n ´kpɛn be wla kɛ cɛn sɔ'n nun yɛ be nyannin alaje be kpɔfuɛ'm be sa nun-ɔn. Anglo'n kusu ´kpɛn bé wla kɛ i nun yɛ bé sa yalɛ'n kacili be cenjele sa nin-ɔn. Nan i ti, be `fa yo cɛn be `di nan be klun `jɔ, be `man be wiengu'm be like, be `cɛ yalɛfuɛ'm be like.

²³ Zuif'm be niannin Mardose ndɛ'n su be yoli. Be fali cɛn sɔ'n i dilɛ'n yoli be nzuɛn.

²⁴ Mardose klɛli i fluwa'n nun kɛ Amɛdata b'ɔ ti Agag osu'n nunfuɛ'n i wa Aman b'ɔ ti e Zuif mun e kpɔfuɛ'n waan ɔ ´nunnun ye. Aman tuli fɔtɔ'n fa kleli e nunnunlɛ cɛn'n ,

²⁵ sanngɛ Ɛstɛr ko wunnin famiɛn'n wun, kpɛkuun famiɛn'n man be klɛli fluwa kɛ klunwi sa nga Aman fa sunnzunnin Zuif mun'n, man ɔ tɔ i bɔbɔ ti su nan be bo i nin i mma'm be kɔmin.

²⁶ I sɔ'n ti yɛ be flɛli cɛn sɔ'n kɛ Pirim cɛn nin-ɔn. Pirim fin Pir bɔ i bo'n yɛlɛ fɔtɔ tulɛ. Fluwa nga Mardose klɛli'n, be niannin i nun ndɛ'n kwlaa su be yoli i su sa'n. Ɔ klɛli sa nga be wunnin i b'ɔ juli be su'n.

²⁷ Zuif'm be sili be wue nun kɛ afuɛ nuan kwlaa ng'ɔ yia'n, be nin be osu'n nunfuɛ mun nin be nga b'a kaci Zuif'n, be ´nian cɛn nnyɔn sɔ'm be su kpa be ´fa di cɛn kɛ Mardose fa klɛli'n sa.

²⁸ Be sieli kɛ be osu-osu mun nin be awlobo kunngun mun, nin be akpasua kunngun mun, ɔ nin be klɔklɔ'm bé wla `kpɛn Pirim cɛn sɔ'n su. Be waan nán man Pirim cɛn sɔ'n mlin be klun mlɔnmlɔn, yɛ nán man Zuif be yaci cɛn sɔ'n dilɛ mlɔnmlɔn.

²⁹ Famiɛn bla Ɛstɛr b'ɔ ti Abiail wa'n nin Mardose be kwlalɛ bɔ be lɛ i'n ti, be klɛli fluwa nnyɔn su'n kɛ be `jran cɛn sɔ'n i dilɛ ndɛ'n su.

³⁰ Be fali fluwa sɔ'n be ko mannin Zuif'm be kwlaa bɔ be o Asieris i mɛn'n i akpasua ya ablaɔn-nin-nso'm be su'n. Be klɛli fluwa sɔ'n kɛ be ´fa gua be anwlɛn su nzue nan nán srɛ kun be.

³¹ Fluwa sɔ'm be nun'n, be klɛli i ekun kɛ cɛn nga Ɛstɛr nin Mardose be sieli'n i nun yɛ be `di cɛn nin-ɔn. Be nin be osu'n nunfuɛ mun be `di i kɛ be sieli'n sa nan be `ci nglɛmun yɛ be `sun.

³² Ɛstɛr i ndɛ ng'ɔ kannin'n, ɔ jrannin cɛn sɔ'n i dilɛ'n su. Be klɛli ndɛ sɔ'n fluwa kun nun.