Ɛstɛr 8 - NYANMIƐN NDƐ'N 1998

¹ Le kunngba sɔ nun'n, famiɛn Asieris fali Aman b'ɔ ti Zuif'm be kpɔfuɛ'n i awlo'n mannin Ɛstɛr. Kɛ ɔ ´yo sɔ'n, wuun Ɛstɛr ɔ'a dun mmua kan kle famiɛn'n kɛ Mardose ti i osufuɛ. Nan Mardose ɔ'a ɔ famiɛn'n wun lɔ.

² Yɛ famiɛn'n yili i sama ti nga ng'ɔ fa wlali Aman sa'n nan ɔ'a fa wla Mardose sa. Ɛstɛr kusu fali Aman awlo'n mannin Mardose kɛ ɔ nian su.

Zuif'm bé ti kplilɛ i wun atin manlɛ

³ Ɛstɛr kannin ndɛ kleli famiɛn'n ekun. Ɔ bubu guali asiɛ wun gblo! Ɔ kotoli famiɛn'n bo, ɔ sunnin nan ɔ'a srɛ i kɛ ɔ yaci nan klunwi sa nga Aman b'ɔ ti Agag osu nunfuɛ'n guguli kɛ be ´fa yo Zuif mun'n, nán man ɔ kplin su!

⁴ Kpɛkuun famiɛn'n fɛli i sika kpɔnman'n fa tinngɛli Ɛstɛr nyrun yɛ Ɛstɛr jasoli-ɔ,

⁵ ɔ seli i kɛ: «Nannan, sɛ ɔ ti ɔ klun su'n, sɛ ɔ klun jɔ min wun'n, man be klɛ fluwa be ko nunnun fluwa nga Aman b'ɔ ti Amɛdata wa'n, b'ɔ fin Agag osu nun'n klɛli ko mannin mɛn i akpasua-akpasua kunngun'm be kɛ be kun Zuif mun'n.

⁶ Afin n tran lɛ sa n nian nyrɛnnɛn ng'ɔ wa tɔ min nvle'n su nin-ɔn, ɔ yo-man ye. Kɛ be ´nunnun be nga e nin be e mmoja'n ti kun'n min nyrun lɛ sa'n, ɔ ti kekle man min.»

⁷ Famiɛn Asieris tɛli Ɛstɛr nin Mardose b'ɔ ti Zuif'n be su kɛ: «Aman bɔ i waan ɔ ´nunnun Zuif mun'n, m'an bo i kɔmin. M'an fɛ i awlo'n m'an man wɔ Ɛstɛr.

⁸ Nan sanngɛ fluwa nga b'a fa famiɛn'n i dunman'n b'a klɛ bɔ b'a fɛ i nga i nzɔliɛ b'a fa sie su'n, be kaci i-ɔ, ɔ yo-man ye, ɔ man amun bɔbɔ amun `klɛ fluwa nga amun nian-an, ɔ ko ti Zuif'm bé wun nyanman nun'n, amun `fa min dunman'n be klɛ, yɛ amun `fa min nga i nzɔliɛ'n be sie su.»

⁹ Be kali lɛ be flɛli famiɛn'n i fluwa klɛfuɛ mun Sivan anglo'n b'ɔ ti anglo'n nsan su'n i le ablaɔn-nin-nsan'n su nan b'a klɛ ndɛ nga Mardose waan be klɛ'n i kwlaa. Be fa fluwa nga be klɛli ko mannin Zuif mun nin kpɛnngbɛn mun, ɔ nin siefuɛ mun, ɔ nin akpasua ng'ɔ fɛ i Ɛnd lɛ lele fa ju Etiopi'n. Be ti akpasua-akpasua ya ablaɔn-nin-nso. Be niannin akpasua'm be fluwa klɛlɛ wafa liɛ'm be su, ɔ nin be aniɛn'm be su yɛ be klɛli fluwa sɔ nin-ɔn. Yɛ be niannin Zuif'm be fluwa klɛlɛ i wafa'm be su, ɔ nin be aniɛn'm be su yɛ be klɛli be liɛ'n kusu-ɔ.

¹⁰ Be fali famiɛn Asieris dunman'n yɛ be klɛli fluwa nin-ɔn, yɛ be fɛli i nzɔliɛ'n be sieli su. Be fali fluwa sɔ'n mun be wlali sran nga be fu awa nnɛn kpanngɔ'm be su'n be sa nun kɛ be fa ɔ. Nnɛn kpanngɔ sɔ'm be fin famiɛn'n i awlo lɔ.

¹¹ Be klɛli fluwa sɔ'n nun kɛ famiɛn'n ɔ'a man Zuif nga be o klɔ kunngun kwlaa be su'n be atin kɛ be yia nan be kpli bé ti. I waan mɛn nun akpasua'n kwlaa nin nvle'n kwlaa nun sran nga be fa alɛ kunlɛ ninnge kɛ be ´fa yo Zuif'm be like'n, sɛ be nyan be'n, be `kun be tɛ kpa, be nunnun be nin bé yi nin be mma mun, yɛ be `fɛn bé bo ninnge mun.

¹² Cɛn kunngba yɛ famiɛn Asieris sieli i kɛ be `yo sɔ i mɛn'n i akpasua-akpasua kwlaa su-ɔ. Cɛn sɔ'n yɛlɛ Adar anglo b'ɔ ti anglo blu-nin-nnyɔn su'n i le blu-nin-nsan'n.

¹³ Be klɛli i kɛ akpasua'n kwlaa su man ndɛ sɔ'n kaci kɛ mmla sa. Be waan be `kɛnngɛn i sran'm be kwlaa be nyrun, nan kɛ cɛn nga be kleli'n ju'n Zuif'm b'a kwla tu be klunngbɔ be kpɔfuɛ'm be su.

¹⁴ Kɛ famiɛn'n mannin atin cɛ'n, sran ng'ɔ sunmannin be'n be fuli awa i nnɛn kpanngɔ bɔ be wanndi kpa'n be su, be ɔli ndɛndɛ. Be kanngannin fluwa'n be kleli be nga be tran Siz b'ɔ ti famiɛn klɔ'n su lɛ mun'n kusu.

¹⁵ Kɛ Mardose ´fin famiɛn'n i awlo lɔ ´fite'n, famiɛn tralɛ o i wun. I bue ti ɔkwlɛ srosrowa yɛ i bue ti ufue. Tralɛ dan ng'ɔ o su'n ti ɔkwlɛ kankankan, lɛn tralɛ-ɔ. Sika ɔkwlɛ kle dan kun wlɛ i ti. Siz klɔ wunmuan'n kejeli sa yikiyikiyiki sran'm be ´kpan'n, wuun be ´si able afin be klun ti jɔwa.

¹⁶ Le kun sɔ'n, Zuif'm bé wun kpajali be. Be klun jɔli dan. Cɛn sɔ'n yoli be kwlalɛ cɛn.

¹⁷ Akpasua'n kwlaa nin klɔ kwlaa nga be tili famiɛn'n i ndɛ'n, Zuif nga be o be su'n, be klun jɔli. Be bo sroli, be fali aklunjuɛ sa sɔ'n yoli be cɛn be dili. Zuif'm bé wun srɛ ti, mɛn'n nun sran sunman be kacili Zuif.