Ɛstɛr 7 - NYANMIƐN NDƐ'N 1998

Aman i wulɛ

¹ Famiɛn'n nin Aman be ɔli i yi Ɛstɛr i cɛn'n bo.

² Kɛ be ´nɔn nzan'n, famiɛn'n seli Ɛstɛr kɛ: «Famiɛn bla Ɛstɛr, like nga ɔ waan a ´srɛ min'n, srɛ. Sɛ kannzɛ bɔ ɔ waan m bu min siewlɛ'n nun nnyɔn nan n fɛ i bue kun m man wɔ'n, n ´fa man wɔ.»

³ Yɛ Ɛstɛr tɛli i su kɛ: «Nannan, yaci, sɛ ɔ klun jɔ min wun, sɛ ɔ ti ɔ klun su'n, de min nin min nvle'n. Like nga n waan n ´srɛ wɔ'n yɛ ɔ o lɛ-ɔ.

⁴ Afin b'a yo min nin min nvlefuɛ mun e atɛ kɛ be `nunkun ye, be `kpɛ e kɔmin, yɛ be `nunnun ye mlɔnmlɔn. Sɛ ɔ ti kɛ be waan be ´yo ye atɛ nan e `kaci kanga'n, wuun n kan-man ndɛ. Nannan, like nga e kpɔfuɛ'n waan ɔ saci i'n ti dan. Sɛ ɔ saci'n, be tannin i kalɛ-ɔ, ɔ su yo-man ye.»

⁵ Yɛ famiɛn'n usɛli i yi Ɛstɛr kɛ: «?Wan yɛlɛ i sɔfuɛ'n? Sran ng'ɔ bu akunndan sɔ'n wo nin?»

⁶ Ɛstɛr tɛli i su kɛ: «E kpɔfuɛ sɔ'n bɔ i waan nán i nyinma wun ye'n yɛlɛ Aman, klunwifuɛ tɛ sɔ'n.» Aman i wawɛ'n ka lɛ wanndili i wun famiɛn nin Ɛstɛr'n be nyrun lɛ.

⁷ Famiɛn'n fali ya dan kpa. Ɔ jasoli nzan'n su ɔli awlo'n nun waka'm bé bo lɔ. Aman wunnin kɛ famiɛn'n ɔ'a bu i kunlɛ akunndan, yɛ ɔ kɛli i yi Ɛstɛr wun lɛ kɛ ɔ ´srɛ i nan nán be kun i.

⁸ Kɛ famiɛn'n ´fin waka'm bé bo lɔ ´ba cɛn diwlɛ lɛ'n, ɔ ´nian-an, Aman yɛ ɔ o bia tɛnndɛn bɔ Ɛstɛr ti su'n su yɛ. Yɛ i waan: «?Nan min bɔbɔ mín nyin bo wa nin min sua nun wa yɛ a wa tɔ min yi'n gblu ekun-ɔn?» Kɛ famiɛn'n ´se sa'n, wuun i sran'm b'a kata Aman i ti lalaa.

⁹ Yɛ Arbɔna b'ɔ ti famiɛn i sran'm be nun kun'n waan: «Mardose b'ɔ deli famiɛn'n, i kɔmin bowlɛ nga Aman kplannin'n wo Aman bɔbɔ i awlo'n nun lɔ. I nglo-nglo su'n ti mɛtri ablaɔn-nin-nnun.» Yɛ famiɛn'n waan: «Amun `ko bo i kɔmin waka sɔ'n su.»

¹⁰ Nan b'a ko bo Aman kɔmin kɔmin bowlɛ ng'ɔ kplɛnnin i Mardose dunman nun'n su. Kɛ ɔ yoli sɔ'n yɛ famiɛn'n i ya'n jɔli-ɔ.