Ɛstɛr 5 - NYANMIƐN NDƐ'N 1998

Ɛstɛr i famiɛn wun wunlɛ ndɛ'n

¹ I le nsan su'n, Ɛstɛr wlɛli i famiɛn tralɛ'n nan ɔ'a wlu famiɛn'n i awlo'n i klun lɔ. Ɔ ko jrannin famiɛn'n i sua ba'm be ndɛnman su lɛ. Kɛ ɔ ´kɔ'n, wuun famiɛn'n ti i famiɛn bia'n su i nyin kaci anuan nun lɛ.

² Kɛ famiɛn'n wunnin i yi Ɛstɛr awlo'n klun lɔ'n, ɔ sili i aunnvuɛ nan ɔ'a fa sika ɔkwlɛ kpɔnman'n ɔ'a tinngɛ i nyrun. Yɛ Ɛstɛr ɔli ko kannin i kpɔnman i ti nin-ɔn.

³ Famiɛn'n usɛli kɛ: «?Nguɛ sa-a, Ɛstɛr, famiɛn bla? ?A klo kɛ a ´srɛ like wie? Sɛ kannzɛ bɔ ɔ waan m bu min siewlɛ'n nun nnyɔn nan n fɛ i bue kun m man wɔ'n, n ´fa man wɔ.»

⁴ Ɛstɛr waan: «Nannan, m'an tɔn like m'an sie wɔ. N waan andɛ a nin Aman amun bla man e di.»

⁵ Yɛ famiɛn'n waan: «Amun `ko kan kle Aman ndɛndɛ kɛ ɔ bla nan e yo like nga Ɛstɛr ɔ'a bu i akunndan yɛ'n.» Famiɛn'n nin Aman be ɔli Ɛstɛr i aliɛ ng'ɔ tɔnnin'n i dilɛ.

⁶ Kɛ be wieli like'n di'n, famiɛn'n seli Ɛstɛr kɛ: «Like nga ɔ waan a ´srɛ'n, srɛ. Sɛ kannzɛ bɔ ɔ waan m bu min siewlɛ'n nun nnyɔn nan n fɛ i bue kun m man wɔ'n, n ´fa man wɔ.»

⁷ Ɛstɛr tɛli i su kɛ: «Like nga n wa srɛ wɔ'n,

⁸ nannan, sɛ a wun min aunnvuɛ'n nan like nga n ´srɛ wɔ a ´man min'n, wuun ainman n ´tɔn like ekun. A nin Aman amun bla, n wa kan ndɛ sɔ'n kle wɔ.»

Aman i Mardose kɔmin bolɛ waka kplanlɛ

⁹ Le kun sɔ'n, kɛ Aman fin famiɛn'n i yi'n wun lɔ ´fite'n, ɔ lɛ srisrilɛ, yɛlɛ kɛ i klun jɔli klanman. Sanngɛ kɛ ɔ ko juli famiɛn i awlo'n i anuan nun b'ɔ wunnin kɛ Mardose ɔ'a jaso-man yɛ ɔ'a yo-man like wie b'ɔ kle kɛ i nyin yi i'n, ɔ yoli i ya trali su.

¹⁰ Ɔ trɛli i anwlɛn sin ɔli i awlo. Kɛ ɔ juli i awlo lɔ'n, ɔ flɛli i janvuɛ mun nin i yi Zeres.

¹¹ Aman dili i nuan kleli be. I anyanbeun sroesroe'n nin i wa yasua kpanngban'm be ndɛ yɛ ɔ kan kleli be-ɔ, yɛ i sa su nga famiɛn'n mɛnnin i'n b'ɔ man i dan tra mɛn'n su kpɛnngbɛn mun nin sonja kpɛnngbɛn'm be kwlaa'n be ndɛ yɛ ɔ kan kleli be ekun-ɔn!

¹² Ɔ kan guali su ekun kɛ: «N kunngba cɛ yɛ famiɛn'n i yi Ɛstɛr man e nin famiɛn'n e ko dili like i wun lɔ-ɔ. I kpa'n bɔ, i waan ainman e nin famiɛn'n e bla ekun.

¹³ Sanngɛ ɔ nin i sɔ ngba'n, kɛ n tɛ wun Zuif niɛn Mardose b'ɔ ti famiɛn i awlo'n i anuan nun'n, n klun'n jɔ-man le.»

¹⁴ Yɛ i yi Zeres nin i janvuɛ'm be seli i kɛ: «Man be kplan kɔmin bolɛ waka kun. Man i nglo-nglo'n ju mɛtri ablaɔn-nin-nnun nan ainman ko se famiɛn'n man be bo Mardose kɔmin. I liɛ'n, kɛ a nin famiɛn'n be ´kɔ cɛn dilɛ'n, ɔ klun ´jɔ klanman.» Ndɛ sɔ'n yoli Aman fɛ. Ɔ man be kplannin kɔmin bolɛ waka'n.