Ɛstɛr 4 - NYANMIƐN NDƐ'N 1998

Zuif'm be nglɛmun cilɛ

¹ Kɛ Mardose tili ndɛ sɔ'n cɛ'n, ɔ titili i wun tralɛ'm be nun. Ɔ wlali bajɛ tralɛ b'ɔ ti sa yalɛ tralɛ'n, kpɛkuun ɔ guɛli i ti su nzuɛn. Kɛ ɔ ´kpaci klɔ'n nun kɔ'n, wuun ɔ ´sun kɔ.

² Ɔ sunnin sɔ lele juli famiɛn'n i awlo'n i anuan'n bɔ be fa-man bajɛ tralɛ wlu-man lɔ'n nun.

³ Kan Asieris sie ju lɛ'n, i akpasua kwlaa nun'n, kɛ Zuif'm be ko ti sa nga famiɛn'n waan be `yo be'n cɛ'n, wuun be akunndan'n ɔ'a sanngan, wuun be su sun, wuun be ´yi ngwlɛ, kpɛkuun be ci i wun nglɛmun. Be nun kpanngban be wlali bajɛ tralɛ yɛ be lali nzuɛn nun.

⁴ Ɛstɛr i afanniɛn bla nin i yasua nga be sali be bɔ be niɛn i su'n be wa kannin ndɛ sɔ'n kleli i. Srɛ kunnin Ɛstɛr kpa. Ɔ fali tralɛ kɛ be fa ko man Mardose nan ɔ kpa bajɛ b'ɔ o i wun'n gua. Mardose ɔ'a kplin-man su.

⁵ Yɛ Ɛstɛr flɛli Atak-ɔ. Yasua nga be sali be bɔ famiɛn'n sieli be kɛ be nian Ɛstɛr su, be nun kun-ɔn. Ɔ sunmɛnnin i Mardose sin kɛ ɔ ko usɛ sa ng'ɔ juli bɔ i ti yɛ ɔ yo sɔ'n.

⁶ Yɛ Atak ko toli Mardose klɔ'n nun lika gbaun ng'ɔ o famiɛn'n i sua'n nyrun lɛ'n nun-ɔn,

⁷ nan Mardose ɔ'a kan sa ng'ɔ juli'n kwlaa ɔ'a kle i. Ɔ boli sika nga Aman waan sɛ be nunnun Zuif mun-ɔn, ɔ ´fa guɛ i famiɛn'n i bɔlɛ'n nun'n i nuan kleli i.

⁸ Ɔ fali fluwa bɔ famiɛn'n i ndɛ ng'ɔ kannin bɔ be boli i jɔ sinnin Siz lɛ kɛ be `kun Zuif mun'n fa mɛnnin i kɛ ɔ `fa kle Ɛstɛr nan ɔ `si sa sɔ'n. Yɛ Mardose waan ɔ `se i kɛ ɔ `ko to famiɛn'n nan ɔ `srɛ i i nvlefuɛ'm be ti.

⁹ Yɛ Atak ɔli ko kannin Mardose i ndɛ ng'ɔ kannin be mun kleli Ɛstɛr-ɔ.

¹⁰ Ɛstɛr sunmannin Atak Mardose sin ekun kɛ ɔ ko se i kɛ:

¹¹ «Sran'm be kwlaa, i famiɛn'n i sran mun o, i siewlɛ'n i akpasua'm be su sran mun o, be si mmla'n. Be si kɛ sran kwlaa, i bla o, i yasua o, sran kwlaa nga b'a flɛ-mɛn i b'ɔ wlu famiɛn i awlo'n klun lɔ'n, i sɔ sran liɛ'n be kun i. Sɛ a wun kɛ ɔ ´fite nun'n, wuun famiɛn'n ɔ'a fɛ i sika ɔkwlɛ kpɔnman'n ɔ'a tinngɛ i nyrun. N kusu, n cɛn ba ablasan yɛ, be nian flɛ-man min kɛ n wlu famiɛn'n sin lɔ.»

¹² Kɛ Mardose tili Ɛstɛr i ndɛ'n,

¹³ ɔ tɛli i su kɛ: «Sɛ a bu i kɛ a o famiɛn'n i awlo lɔ ti nan ɔ kunngba lekeleke ɔ liɛ a ´nyan ɔ ti'n, a su laka ɔ wun.

¹⁴ Sɛ ɔ waan a ko wun-man famiɛn'n wun'n, Zuif'm bé delɛ'n ´fin lika uflɛ ´ba. Be ´fite nun, sanngɛ a nin ɔ́ si i akpasua liɛ'n, amun ´wu. ?I kpa'n, sɛ sa nga ti yɛ man a kacili famiɛn i yi nin a o, e wun i wlɛ sɛ?»

¹⁵ Yɛ Ɛstɛr toli Mardose i ngaliɛ kɛ:

¹⁶ «Yiayia Zuif nga be o Siz wa'n, amun `kpɛ srɛ nun man min. Nán amun di like, nán amun nɔn nzue cɛn ba klonglo nsan. E nin min afanniɛn bla mun e ´kpɛ é srɛ nun liɛ, kpɛkuun n ´ko to famiɛn'n, kannzɛ be klɛli mmla i nun kɛ nán be yo i sɔ bɔbɔ o. N ´ko wun i wun. Sɛ ɔ fata kɛ n wu'n, n ´wu.»

¹⁷ Mardose ɔli ko yoli like nga Ɛstɛr waan ɔ yo'n i kwlaa kpan.