Ɛstɛr 2 - NYANMIƐN NDƐ'N 1998

Ɛstɛr kacili Vasti

¹ Kɛ ɔ yoli sɔ bɔ famiɛn Asieris i ya'n goli nun'n, i wla kpɛnnin Vasti i sa ng'ɔ yoli'n nin i wun akunndan nga be fali'n be su.

² Be nga be di famiɛn'n i junman'n be waan: «Nannan, man be kunndɛ talua nglanman-nglanman nga be nian si-man bian be man wɔ.

³ Yi sran mɛn nga a sie i'n i akpasua-akpasua'm be kwlaa be su, man be yia talua nglanman-nglanman sɔ mun Siz b'ɔ ti famiɛn klɔ'n nun wa famiɛn'n i yi'm be sua'n nun lɔ. Man Egai b'ɔ ti famiɛn'n i yi'm be su nianfuɛ'n, ɔ `nian be lika, ɔ man be kpakpaliɛ mun.

⁴ Man be nun talua nga famiɛn'n klo i'n sin Vasti osu.» Ndɛ sɔ'n yoli famiɛn'n fɛ, yɛ ɔ kplinnin su kɛ be yo i sɔ.

⁵ Zuif bian kun o Siz b'ɔ ti famiɛn klɔ'n nun lɛ, be flɛ i Mardose. Ɔ ti Zair wa, Zair kusu ti Simɛi wa, yɛ Simɛi ti Kis wa. Ɔ fin Bɛnzamɛn akpasua'n su.

⁶ Be nga Nɛbikadnɛzar b'ɔ ti Babilɔni famiɛn'n fali be ɔli Zerizalɛm kekle su'n be nun kun-ɔn. I blɛ sɔ nun'n, Zekɔnias b'ɔ ti Zida famiɛn'n wo be nun wie .

⁷ Mardose yɛ ɔ tali Adasa bɔ be flɛ i Ɛstɛr nin-ɔn. I si niaan bian wa-a. Talua sɔ'n ti aika. Kɛ i si nin i nin be wuli'n, Mardose yɛ ɔ tɛli i-ɔ. Ɛstɛr nyinnin klanman kpa liɛ su. I nyrun waka'n kusu ti klanman ekun.

⁸ Kɛ be boli famiɛn'n i nuan ndɛ'n i jɔ sinnin'n, be yiayiali talua sunman Siz b'ɔ ti famiɛn klɔ'n su lɔ. Ɛstɛr o be nun. Be fa be kɔ famiɛn'n i yi'm i sua'n nun lɔ. Egai yɛ ɔ nian be su-ɔ.

⁹ Ɛstɛr wun yoli Egai fɛ kpa yɛ ɔ kloli i sa. Ɔ man ɔ fali nyanngo nin wunnzinlɛ ninnge'm be kwlaa, ɔ nin sika ng'ɔ ko fa ko to i ninnge kanngan mun mɛnnin i ndɛndɛ kpa. Ɔ mɛnnin i famiɛn'n i awlo nun talua nso nga be waan be fa be mɛn i'n, kpɛkuun ɔ fali be nin i sieli sua ba kpafuɛ'n nun.

¹⁰ Ɛstɛr ɔ'a bo-mɛn i nvle nin i osufuɛ'm be dunman ɔ'a kle-man sran fi, afin Mardose waan nán ɔ kan kle sran fi kɛ ɔ ti Zuif.

¹¹ Cɛn kwlaa Mardose sin mmla'm bé awlo'n nyrun lɛ ɔ usa Ɛstɛr osu, sɛ ɔ ti juejue o, sɛ be yo i kpa o.

¹² Talua'm be kɔ famiɛn'n sin kunngun. Kwlaa nan b'a wɔ'n, be dun mmua siesie bé wun anglo blu-nin-nnyɔn. Anglo nsiɛn klikli'n, be fa kpakpa mir ngo. I sin'n, anglo nsiɛn'n ng'ɔ ka'n, be kpakpa nyanngo nga parfɛn o nun'n, yɛ be kpakpa mmla'm be talua dilɛ ninnge mun ekun.

¹³ Kɛ talua kun ´fɛ i mmla'm bé sua'n nun ´kɔ famiɛn'n i sua'n nun lɔ'n, like kwlaa nga i waan ɔ ´fa kɔ'n, be fa mɛn i.

¹⁴ Talua'n kɔ nnɔsua. Kɛ aliɛ'n cɛn'n, ɔ kɔ mmla'm bé sua uflɛ nun. Saasgaz bɔ be sɛli i'n yɛ ɔ niɛn i li su-ɔ. Ɔ ti famiɛn i soman'm be su nianfuɛ. Sɛ a ´wun kɛ bla kun ´kɔ famiɛn'n sin ekun'n, wuun famiɛn'n i konvi o i su, yɛ ɔ'a yi sran kɛ ɔ ko flɛ i.

¹⁵ Kɛ Ɛstɛr b'ɔ ti Mardose i si niaan bian Abiail wa'n i famiɛn sin kɔlɛ cɛn'n juli'n, ninnge nga Egai b'ɔ nian i bla'm be su'n kleli i'n cɛ, yɛ ɔ fali-ɔ. Sran kwlaa ng'ɔ nin Ɛstɛr yia'n, san Ɛstɛr wun ´yo i fɛ.

¹⁶ Kɛ be sieli Asieris famiɛn'n, i afuɛ nso su anglo blu su yɛ be fa Ɛstɛr ko mɛnnin i-ɔ. Be flɛ anglo sɔ'n kɛ Tebɛt.

¹⁷ Famiɛn'n kloli Ɛstɛr trali bla'm be kwlakwla. Ɔ niɛnnin i nyrun, ɔ yoli i kpa trali talua kun nga mun. Ɔ fali famiɛn kle'n wlɛli i ti. Ɔ man famiɛn Asieris jɛli i sieli Vasti osu.

¹⁸ Ɔ flɛli i mantanfuɛ nin i sufuɛ'm be kɛ be wa di Ɛstɛr ti cɛn. Ɔ mannin akpasua-akpasua'm be wunmiɛn delɛ cɛn. Yɛ ɔ cɛli sran'm be like kpa kɛ famiɛn fa cɛ sran'm be like'n sa.

¹⁹ Be wa yiali talua mun kpɛ nnyɔn su. Kɛ ɔ ´yo sɔ'n, wuun Mardose ti famiɛn'n i komin.

²⁰ Kɛ ɔ ´yo sɔ'n, wuun Ɛstɛr nian bo-mɛn i nvle nin i finwlɛ'n nian kle-man sran fi. Mardose waan nán ɔ kan. Ɛstɛr nyin tɛ yi i kɛ blɛ ng'ɔ tɛ o i sa nun'n sa.

Famiɛn i kunlɛ bɔ Mardose ti b'a kun-mɛn i'n

²¹ Le kun Mardose o i junman'n su lɛ, kpɛkuun famiɛn'n i sua'm be su nianfuɛ nnyɔn bɔ be flɛ kun Bigtan yɛ be flɛ kun Terɛs bɔ be fali famiɛn'n i wun ya'n, be buli i kunlɛ akunndan.

²² Kpɛkuun Mardose ɔ'a ti, yɛ ɔ kan kleli famiɛn i yi Ɛstɛr nan Ɛstɛr kusu ɔ'a kan kle famiɛn'n ɔ'a man Mardose.

²³ Kɛ be usa-usali'n, be wunnin kɛ ndɛ sɔ'n ti nanwlɛ, nan b'a bo sran nnyɔn sɔ'm be kɔmin. Famiɛn'n man be klɛli sa sɔ'n mɛn'n i sielɛ fluwa'n nun.