Ɛstɛr 1 - NYANMIƐN NDƐ'N 1998

Asieris i cɛn dilɛ

¹ Famiɛn Asieris blɛ su yɛ sa ng'ɔ o yɛ'n juli-ɔ. Asieris sɔ'n i sielɛ'n fɛli i Ɛnd lele fa juli Etiopi. Ɔ sieli mɛn akpasua-akpasua ya ablaɔn-nin-nso .

² Kɛ Asieris trannin Siz b'ɔ ti famiɛn klɔ'n su lɔ famiɛn bia'n su'n,

³ i afuɛ nsan su'n, ɔ flɛflɛli i mɛn'n su kpɛnngbɛn mun, nin Pɛrs nin Medi sonja su kpɛn mun, ɔ nin nvle-nvle'm be siefuɛ mun, ɔ nin i akpasua su kpɛn mun. Ɔ flɛli be kɛ be wa di cɛn.

⁴ Ɔ fɛli i famiɛn ninnge kpakpa nin ninnge nglanman-nglanman mun kleli be. Ɔ man be wunnin kɛ i sielɛ'n ti sielɛ kun b'ɔ lɛ nyrun. Cɛn dilɛ sɔ'n dili sra nsiɛn.

⁵ I sin famiɛn'n flɛli Siz b'ɔ ti famiɛn klɔ'n i su lɛ sran wafa-wafa'n kwlaa, i anyanbeunfuɛ o, i yalɛfuɛ o. Cɛn dilɛ sɔ'n kusu dili i liɛ le nso. Be dili cɛn sɔ'n famiɛn'n i awlo'n nun waka'm bé bo.

⁶ Be fali nyanman ufue-ufue nin ɔkwlɛ-ɔkwlɛ be fa wlawlali jɛtɛ ufue nga'm be nun, yɛ be fa minndali sua ja wie'm be wun. Sua ja sɔ'm be ti yɛbuɛ kpa. Be fali lɛn tannin tanmue ufue-ufue nin ble nzue-nzue be fa sende-sendeli nyanman sɔ'm be su. Be fali bia ndɛnndɛnndɛn wie mun sieli i sua'n nun. Bia sɔ'm be ti sika ɔkwlɛ nin jɛtɛ ufue. Be wlali sua sɔ'n nun karo fanunfanun, ɔkwlɛ o nun, ufue o nun, ble tritri o nun.

⁷ Klowa nga be suli nzan nun'm be ti sika ɔkwlɛ klowa, kun lɛ i wafa, kun lɛ i wafa. Famiɛn'n i klun-ufue'n ti, ɔ mannin nzan kpanngban. Ɔ man b'a di-man nzan kpakpa'm be yalɛ.

⁸ Famiɛn'n waan nán be mian sran fi kɛ ɔ nɔn nzan, kusu nán be yo anwɛn nzan'n su. Ɔ seli i awlo'n nun junman difuɛ'm be kɛ like kwlaa nga sran'm be usa'n, be `fa man be.

⁹ Kɛ ɔ ´yo sɔ'n, wuun famiɛn'n i yi Vasti kusu nin mmla'm be ´di be like liɛ famiɛn sua'n nun lɔ.

Vasti i yralɛ

¹⁰ Be dili cɛn sɔ'n lele le nsiɛn. I le nso su'n, famiɛn'n nɔnnin nzan ɔ tili i kpa. I klun b'ɔ jɔli'n ti, ɔ flɛli i sran kaklaakla nso nga be niɛn i yi'm be su'n kɛ be bla. Be dunman mun yɛ: Mɛiman, Bizta, Arbɔna, Bigta, Abagta, Zetar, ɔ nin Karkas.

¹¹ Ɔ seli be kɛ be ko fa Vasti b'ɔ ti famiɛn bla'n be bla. I waan sɛ ɔ ´ba'n, ɔ `wlɛ i famiɛn kle'n, afin famiɛn'n waan i mantanfuɛ nin sran'm be kwlaa be wun kɛ i yi'n i klanman'n fa ti ju'n. Nanwlɛ, bla'n kusu ti klanman kekleke.

¹² Bla'm be su nianfuɛ sɔ'm be ko kan kleli bla'n, sanngɛ bla'n waan ɔ ba-man, ɔ yoli famiɛn'n ya trali su, ɔ kpɛli i anwlɛn.

¹³ Yɛ famiɛn'n yiali be nga be ti ngwlɛlɛfuɛ nin be bɔ be si sa mun-ɔn. Sɛ ndɛ tɔ'n, mmla sifuɛ nin sa sifuɛ'm be yɛ famiɛn'n yia be yɛ be kan-an.

¹⁴ Be nga famiɛn'n yiali be'n, yɛlɛ Karsɛna, Setar, Admata, Tarsis, Merɛs, Marsɛna, Mɛmikan. Be ti Pɛrs nin Medi sran kaklaakla. Sɛ famiɛn nun-man lɛ'n, be yɛ be o mɛn'n su-ɔ.

¹⁵ Famiɛn'n usali be kɛ: «?Kɛ e nian e mmla'n sa'n, nguɛ sa yɛ ɔ fata kɛ e fa yo bla yɛ nin-ɔn? Afin m bɔbɔ min famiɛn'n min yi sa'n, n sunmannin sran kɛ be ko se i kɛ ɔ bla'n, kpɛkuun ɔ'a bu-man min sran, ɔ'a ba-man.»

¹⁶ Mɛmikan seli famiɛn nin kpɛnngbɛn nga be o lɛ'n be kɛ: «Nán famiɛn'n kunngba yɛ i yi Vasti ɔ'a bu-mɛn i sran-an. Kpɛnngbɛn'm be kwlaa nin sran'm be kwlaa bɔ be o nannan Asieris i mɛn'n i akpasua-akpasua'm be kwlaa su'n yɛ ɔ'a bu-man be sran-an.

¹⁷ Afin nian, sa nga famiɛn'n i yi'n yoli i yɛ'n, bla'm be kwlaa be wa ti, yɛ be wa yo bé wun'm be finfin. Siɛn'n, be ´se kɛ: ‹Man n ti sa lɔ manndɛ kɛ famiɛn Asieris waan be se i yi Vasti kɛ ɔ bla'n ɔ'a ba-man.›

¹⁸ Kɛ ɔ fin andɛ'n Pɛrs nin Medi kpɛnngbɛn'm bé yi'm be wa ti sa nga famiɛn'n i yi'n yoli'n, kpɛkuun be nin bé wun'm be ´kpɛ ndɛ siɛn'n, ɔ man ndɛnngan ´ba.

¹⁹ Ɔ man i ti'n, nannan, n tu wɔ kpli, sɛ a klo'n, kan ndɛ kun man be bo i jɔ sin, man ɔ kaci Pɛrsfuɛ mun nin Medifuɛ'm be mmla nga be kaci i-ɔ, ɔ yo-man ye'n be nun kun. Ndɛ sɔ'n, klɛ i kɛ nán Vasti ju ɔ nyrun kun nan w'a kunndɛ bla uflɛ b'ɔ ti kpa trɛ i'n w'a fa sin i osu.

²⁰ Kɛ be ko bo ndɛ sɔ'n i jɔ ko sin mɛn tɛtrɛ nga a sie'n nun'n, bla'm be kwlaa bé nyin wa yi bé wun mun, sɛ bian sɔ'm be ti anyanbeunfuɛ o, sɛ kusu be ti yalɛfuɛ o.»

²¹ Ndɛ nga Mɛmikan kannin'n yoli famiɛn'n nin kpɛnngbɛn'm be fɛ. Famiɛn'n fali ndɛ sɔ'n su.

²² Ɔ klɛli fluwa fa ɔli mɛn ng'ɔ sie'n i nun akpasua-akpasua'n kwlaa su. Ɔ klɛli fluwa sɔ mun aniɛn fanunfanun'm be nun, ɔ klɛli i kɛ yasua'm be kwlaa be `yo be awlo'm be su kpɛn nan be klɔ aniɛn liɛ'n yɛ be `kɛn i be awlo'm be nun-ɔn.