Efɛzfuɛ Mun 5 - NYANMIƐN NDƐ'N 1998

Amu'an kpɛn weiin'n nun

¹ Kɛ an ti Nyanmiɛn i anwlɛn su ba'n, an `nian like ng'ɔ yo'n su, an `yo.

² Sa kwlaa nga amun ´yo'n, an `yo i sran klolɛ'n ti kɛ Krist kusu kloli ye b'ɔ fɛ i wun mannin Nyanmiɛn e ti kɛ tɛ nnɛn bɔ be yrɛ i b'ɔ bɔn fannin Nyanmiɛn bue nun'n sa .

³ An ti Nyanmiɛn i sran, i sɔ'n ti'n, nán man be ti bla nin bian kunndɛlɛ, nin sa tɛtɛ yolɛ, nin bé nyin b'ɔ yi-man like'n be ndɛ fi amún nuan nun.

⁴ Yɛ nán man be ti ndɛ tɛtɛ, nin ndɛ finfin, nin aɔwi tɛtɛ dilɛ'n amún nuan nun. Be ti like b'ɔ nin amun fata-man, sanngɛ man be ti Nyanmiɛn asenna ndɛ amún nuan nun.

⁵ Afin nanwlɛ, sran nga be ti bla nin bian kunndɛfuɛ'n, nin sa tɛtɛ yofuɛ'n, nin be nga bé nyin yi-man like'n, bɔ be ti kɛ amuɛn sɔfuɛ sa'n, be su tran-man be nga Krist nin Nyanmiɛn be ´sie be'n be nun wie.

⁶ Nán man sran fi fa ndɛ ngbɛn wie laka amun, afin sa sɔ'm be ti yɛ Nyanmiɛn i ya'n ɔ wa jao be bɔ bé nyin yi-mɛn i'n be su nin-ɔn.

⁷ Nán amun nin be di mlɔnmlɔn.

⁸ Laa'n, an wo aosin nun, sanngɛ sran wunmuan bɔ amun nin e Min'n amu'an kaci'n ti, amu'an fite weiin nun siɛn'n. I sɔ'n ti'n, an `yo sa ng'ɔ kle kɛ an wo wia klengle kpa'n nun'n.

⁹ Afin be nga be o wia'n nun'n, be yo sran ye, be yo sa kpa, yɛ be di nanwlɛ.

¹⁰ An `mian amún nyin an ´yo sa ng'ɔ yo e Min'n i fɛ'n.

¹¹ Nán amun nin be nga be fa aosin'n kata bé nyin be yo sa b'ɔ yo-man sa fi ye'n mun di, sanngɛ an `yo man be wun sa sɔ'm be wlɛ.

¹² Afin sa nga sran sɔ'm be fia yo'n, i kanlɛ'n yo nyannzuɛn.

¹³ Kɛ be ko wun sa sɔ'n kwlaa be wlɛ'n, be ´wun be wafa nga be ti'n weiin,

¹⁴ afin sɛ be wun like'n kwlaa be wafa nga be ti'n i weiin'n, kpɛkuun be wun ase. I sɔ'n ti be seli kɛ: «Lafifuɛ, tinnge, jao fuɛn'm be nun yɛ Krist man a ´wun ase .»

¹⁵ I sɔ'n ti'n, an `nian amun nantilɛ bɔ an fa nanti'n i su kpa. Nán an yo kɛ sran b'ɔ wun-man sa wlɛ'n sa, sanngɛ an `yo ngwlɛlɛfuɛ.

¹⁶ Kɛ amu'an nyan amún ti'n, nán an tran lɛ ngbɛn, an `yo like ng'ɔ yo sa ye'n, afin blɛ nga e o nun yɛ'n ti tɛ.

¹⁷ I sɔ'n ti'n, nán an yo sinnglinfuɛ, sanngɛ an `mian amún nyin kɛ amun ´si like nga e Min'n klo kɛ an yo'n.

¹⁸ Nán an nɔn nzan bo, afin ɔ yo sran wannzo, sanngɛ man Nyanmiɛn Wawɛ'n sie amun mlɔnmlɔn.

¹⁹ Kɛ amun ´koko yalɛ'n, an `kan Nyanmiɛn Jue fluwa nun ndɛ, yɛ an `to Nyanmiɛn manmanlɛ jue. An `tu amun klun to jue manman e Min'n, yɛ an `bo flɛ i.

²⁰ Sa'n kwlakwla nun'n, an `la é si Nyanmiɛn ase titi e Min Jésus-Krist dunman nun.

Yasua nin i yi

²¹ Kɛ amún nyin yi Krist'n ti, an `bu amun wiengu sran.

²² Bla mun, an `bu amún wun'm be sran, kɛ an bu e Min'n i sran'n sa. Nán an fa amún nyin wlawla be,

²³ afin yasua yɛ ɔ ti bla i su kpɛn kɛ Krist kusu ti Asɔnun i su kpɛn'n sa . I yɛ ɔ ti Asɔnun'n b'ɔ ti i wunnɛn'n i Defuɛ-ɔ.

²⁴ Kɛ asɔnun'n bu Krist sran'n, man mmla'm be bu bé wun'm be sran sɔ sa'n kwlaa nun.

²⁵ Yasua mun, kɛ Krist kloli Asɔnun'n, amun kusu an `klo amun yi mun sɔ.

²⁶ Afin Asɔnun'n ti, ɔ fɛ i wun mannin nan kɛ ɔ wunnzin i b'ɔ yo yɛiin i ndɛ'n ti, ɔ ´kaci Nyanmiɛn liɛ mlɔnmlɔn.

²⁷ Ɔ yo i sɔ nan kɛ Asɔnun'n ´bɛ i wun lɛ'n, ɔ `wun kɛ ɔ ti klanman, ɔ ti yɛiin, lɛ fi nun-mɛn i wun, i wun tralɛ'n ti-man nyɔnnyɔnwa, yɛ ɔ ti Nyanmiɛn liɛ mlɔnmlɔn.

²⁸ I sɔ'n ti'n, yasua mun, an `klo amún yi mun kɛ an fa klo amun bɔbɔ amun wun'n sa. Sran ng'ɔ klo i yi'n, wuun ɔ klo i bɔbɔ wun.

²⁹ Sran fi kpɔ-mɛn i bɔbɔ wun, sanngɛ ɔ tɛ i wun, ɔ niɛn i wun su kɛ Krist kusu nian Asɔnun'n i lika'n sa,

³⁰ afin e ti i wunnɛn'n i lika'n wie.

³¹ Be klɛli kɛ: «I sɔ'n ti yɛ ɔ fata kɛ yasua yaci i si nin i nin nan ɔ fɛ i wun mɛntɛn i yi yɛ be nnyɔn'n be kaci sran wunmuan nin-ɔn .»

³² Nanwlɛ, ndɛ sɔ'n bɔ ɔ'a tɛ nglo wa yɛ'n ɔ ti nanndoliɛ. Kɛ n kɛn i sɔ'n, n fa ndɛ sɔ'n sunnzun Krist nin Asɔnun'n,

³³ sanngɛ kusu ɔ ti amun liɛ wie. Man yasua kun klo i yi kɛ ɔ fa klo i bɔbɔ wun'n sa, yɛ man mmla'm be kusu be bu bé wun'm be sran.