Daniɛl 9 - NYANMIƐN NDƐ'N 1998

Daniɛl i Nyanmiɛn srɛlɛ b'ɔ srɛli'n

^1-2 «Asieris i wa Dariis b'ɔ ti Medifuɛ'n, ɔ wa yoli Babilɔni mɛn'n i famiɛn. Kɛ ɔ trannin bia'n su, i afuɛ klikli su'n, m bɔbɔ min Daniɛl, n niannin Anannganman i fluwa'm be nun nan m'an wun ndɛ nga Anannganman man i nuan ijɔfuɛ Zeremi kannin'n i wlɛ. Ɔ kannin afuɛ ableso nga i nun yɛ be wa saci Zerizalɛm'n i ndɛ kleli Zeremi .

³ N kpɛli mín nyin Anannganman Nyanmiɛn'n i wun lɔ, n srɛli i tantrantan kpa, yɛ n fɛfɛli i wun. N cili nglɛmun, n wlali bajɛ tralɛ, yɛ n fali nzuɛn guali mín ti'n su.

⁴ N srɛli Anannganman min Nyanmiɛn'n, yɛ n kannin e sa tɛ nga e yoli mun n kleli i, n seli kɛ yoo: ‹Anannganman, Nyanmiɛn b'ɔ ti dan yɛ b'ɔ yo sro'n, sran nga be fa ɔ mmla'm be su'n, aenguɛ nga a nin be tra'n ɔ ka lɛ titi. A nin be nga be klo wɔ'n be o nun titi.

⁵ E nyin a yi-man wɔ, e yoli sa tɛ, e fɔnnin, e jasoli ɔ́ wun. Ɔ mmla nin ɔ́ nuan su ndɛ nga a kannin'n, y'a di-man su.

⁶ Ɔ sufuɛ nga be ti ɔ́ nuan ijɔfuɛ bɔ be kannin ɔ́ nuan su ndɛ kleli e famiɛn mun nin e famiɛn i awlo lɔ sran dandan mun, nin e nannan mun, ɔ nin nvle'n nunfuɛ'm be kwlaa'n, y'a sie-man é su bé nuan bo.

⁷ Ɔ liɛ'n, e Min, a yo sa i nuan su titi. Sanngɛ e liɛ'n, ng'ɔ nin ye fata'n, yɛlɛ é wun ase kanlɛ kɛ nga e su yo i ndɛ cɛn nga nun yɛ'n sa. E nga e ti Zerizalɛmfuɛ'm nin Zidafuɛ'n, e ´kan e wun ase. Izraɛlfuɛ nga a kannin be bo guali mɛn wie nun'n be sa tɛ bɔ be yoli wɔ'n ti, sɛ be o koko o, sɛ be o mmua o, be o nun wie.

⁸ Nanwlɛ, e Min, nyannzuɛn'n ɔ'a kun ye kpo. E bɔbɔ o, e famiɛn mun o, e famiɛn i awlo lɔ sran dandan mun o, e nannan mun o, e yɛ nyannzuɛn sɔ'n ɔ'a kun ye-ɔ, afin é nyin a yi-man wɔ.

⁹ Sanngɛ ɔ liɛ'n e Min, e Nyanmiɛn, wɔ bɔ a si aunnvuɛ'n, bɔ ɔ klun ti ufue'n, kannzɛ bɔ e jasoli ɔ́ wun'n, a yacili e wun sa'n a cɛli ye.

¹⁰ Kɛ a seli ye kɛ e `fa ɔ mmla nga a kan kleli ɔ sufuɛ nga be ti ɔ́ nuan ijɔfuɛ'm be kɛ be `fa man ye'n bé su'n, y'a sie-man é su ɔ ndɛ sɔ'n i bo.

¹¹ Izraɛl nvle wunmuan'n ɔ fɔnnin ɔ mmla'n, yɛ ɔ kacili i sin sili wɔ. I sɔ'n ti nan nyrɛnnɛn nin sannzan nga be klɛli be Moiz b'ɔ ti ɔ sufuɛ'n i mmla fluwa'n nun'n b'a tɔ e su . Yɛlɛ kɛ e yoli sa tɛ.

¹² Like nga ɔ waan a ´yo e nin é su kpɛnngbɛn nga be sie ye'n, a yoli. A fa nyrɛnnɛn yili e bɔ e o Zerizalɛm'n e su. I sɔ nyrɛnnɛn liɛ'n, be nian wun-mɛn i wun su mɛn'n i lika uflɛ le.

¹³ Nyrɛnnɛn sɔ'n bɔ be kannin be ndɛ Moiz i mmla'n nun'n, be kwlaa be juli e su. Kpɛkuun e kusu y'a kpata-man wɔ kɛ a gua ɔ ya'n i ase. Anannganman e Nyanmiɛn, y'a kaci-man é sin y'a si-man é sa tɛ mun, y'a bu-man ɔ gugulɛ nga a guguli'n i akunndan.

¹⁴ I sɔ'n ti yɛ ɔ waan san nyrɛnnɛn sa'm be ´tɔ ye su nin-ɔn. Afin Anannganman e Nyanmiɛn, sa nga a yo'n kwlaa ɔ ti i nuan su, sanngɛ y'a sie-man e su ɔ́ nuan bo.

¹⁵ E Min e Nyanmiɛn, wɔ tinmin'n bɔ be jrɛn i nyrun-ɔn ɔ yo-man ye'n ti, a fali ɔ nvle'n nunfuɛ mun Ezipt mɛn'n nun lɔ bali, ɔ man ɔ dunman'n fuli, yɛ kɛ e ´se yɛ'n ɔ tɛ fu. Sanngɛ é nyin a yi-man wɔ, e fɔnnin.

¹⁶ Ɔ sa bɔ a yo be i nuan su'n ti'n, gua ɔ ya dan ng'ɔ kunnin wɔ Zerizalɛm klɔ'n b'ɔ ti wɔ oka'n i wun'n i ase. Afin é sa tɛ mun nin e nannan'm be fɔnlɛ'm be ti, Zerizalɛm nin ɔ nvle'n b'a sokpa sran nga be sin yia be lɛ'n be nun.

¹⁷ Siɛn'n, e Min e Nyanmiɛn, tie srɛlɛ tantrantan nga n srɛ wɔ yɛ'n. Nian ɔ bɔbɔ ti nan bu lika b'ɔ ti ɔ liɛ klonglo bɔ ɔ'a saci'n i akunndan.

¹⁸ Min Nyanmiɛn, sie ɔ́ su nan tie. Tike ɔ́ nyin nan nian e klɔ'n i bubulɛ bɔ ɔ'a bubu'n, klɔ sɔ'n bɔ ɔ dunman'n wo su'n. Kɛ e srɛ wɔ tantrantan kɛ nga sa'n, nán kɛ e nzuɛn'n ti kpa ti yɛ e srɛ-ɔ, ɔ sran klolɛ b'ɔ lɛ-man awieliɛ'n ti-ɔ.

¹⁹ E Min, tie e ndɛ'n! E Min, yaci e fɔnlɛ'n cɛ ye! E Min, sie ɔ́ su! Min Nyanmiɛn, nian ɔ bɔbɔ ɔ ti nan bla wa yo e klɔ'n i kpa man ye, yɛ bu ɔ nvle nunfuɛ'm be akunndan afin be ti ɔ liɛ klonglo.› »

Blɛ ableso'n i wun ndɛ

²⁰ «N kannin ndɛ ekun, n srɛli Nyanmiɛn, n dili mín sa tɛ'm be nanwlɛ, n kannin Izraɛlfuɛ bɔ be ti min nvle'n nunfuɛ mun bé sa tɛ'm bé wun ndɛ. N sun flɛli Anannganman min Nyanmiɛn'n i lika b'ɔ ti i liɛ klonglo'n i dunman nun ti.

²¹ Kɛ bɔ n tɛ ijɔ sɔ'n, kpɛkuun anz Gabriɛl nga bɔ n dun mmua wunnin i aolia nun klikli kun'n, ɔ tuli ndɛndɛ ɔ wunngeli mín wun wa, nnɔsua nun blɛ nga i nun yɛ be yi sraka'n i su yɛ ɔ bali-ɔ.

²² Ɔ kleli min like, kpɛkuun ɔ seli min kɛ: ‹Daniɛl, m bali kɛ n wa tike sa su n kle wɔ.›

²³ Kɛ a boli ɔ srɛlɛ'n bo cɛ'n, be kannin ndɛ kun, m bali kɛ n wa kan ndɛ sɔ'n n ´kle wɔ. Afin a ti Nyanmiɛn i anwlɛn su sran. Mian ɔ nyin nan wun ndɛ sɔ'n i wlɛ nan wun aolia nun sa nga i bo.

²⁴ Be mannin ɔ nvle'n nunfuɛ'm be nin klɔ b'ɔ ti Nyanmiɛn liɛ'n i sufuɛ'm be afuɛ ableso sɔ nso kɛ be `fa yaci nyin kekle'n nin sa tɛ'n yolɛ. Blɛ sɔ'n ti cinnjin kɛ ɔ ´yo nan b'a yaci bé sa tɛ mun b'a cɛ be, nan b'a yo sa mun i nuan su, nan sa nga be wun be aolia nun'n be nuan ɔ'a yia, nan Nyanmiɛn i nuan ndɛ bɔ be kannin'n ɔ'a kpɛn su, nan b'a fa Nyanmiɛn i lika kpa tra su'n b'a wlɛ i sa nun'n ti.

²⁵ Like ng'ɔ fata kɛ a si i nan a wun i wlɛ'n yɛ ɔ o yɛ. Kɛ ɔ fɛ i cɛn bɔ be kannin Zerizalɛmfuɛ'm bé sin salɛ ndɛ'n, nin Zerizalɛm klɔ'n i uflɛ kplanlɛ ndɛ'n lele b'ɔ ´fa ju blɛ nga be ´fa gua famiɛn ng'ɔ ´sie'n i ti su ngo'n, ɔ ti blɛ nso. Blɛ kun ti afuɛ nso. I sin be wa fa blɛ ablesiɛn-nin-nnyɔn be ´fa kplan klɔ'n nin i wun awa dan'n be uflɛ, sanngɛ blɛ'n ɔ wa yo kekle.

²⁶ Sɛ blɛ ablesiɛn-nin-nnyɔn sɔ'n wie'n, be wa kun sran bɔ be guɛli i ti su ngo'n, sran fi su kpli-mɛn i ti. I sin, kpɛnngbɛn kun wa ba, ɔ nin i sonja'm be wa saci klɔ'n nin Nyanmiɛn i lika'n. Ɔ nin i sɔ'n ngba, kpɛnngbɛn sɔ'n, awieliɛ'n ɔ wa wie i Nyanmiɛn i ya'n i bo. Sanngɛ lele b'ɔ ´fa ju i wie cɛn'n, ɔ wa kun alɛ, ɔ ´saci like kpa liɛ su, kɛ be sieli i sɔ-ɔ .

²⁷ Kɛ ɔ wa ju afuɛ nso kasiɛn'n i awieliɛ'n, ɔ wa mianmian sran kpanngban kpa. Kɛ ɔ di afuɛ nsan nin sin'n, ɔ wa tannin sraka yilɛ'n nin cɛlɛ yilɛ'm be atin. Like sacifuɛ sɔ'n, tete sa ng'ɔ wa yo be'n, be kwla kan-man. Ɔ ´yo i sɔ lele ɔ ´fa ju cɛn nga be kleli i kɛ i bɔbɔ saci'n.»