Daniɛl 7 - NYANMIƐN NDƐ'N 1998

Daniɛl i aolia nun like wunlɛ klikli'n: nnɛn nnan mun

¹ Famiɛn Bɛlsazar i afuɛ klikli nga bɔ i nun yɛ ɔ trannin Babilɔni bia'n su'n, kɔnguɛ kun Daniɛl lɛ i bɛ'n su lɛ, kpɛkuun ɔ cɛnnin laliɛ yɛ ɔ wunnin aolia nun like mun. Kɛ ɔ cɛli kan'n, ɔ klɛli i laliɛ ng'ɔ cɛnnin'n, nan ɔ'a kɛn i nun sa nga be ti cinnjin'n.

² Ɔ seli kɛ: «Kɔnguɛ kɛ n ´cɛn laliɛ'n, n wunnin kɛ aunngban'n ɔ fin mɛn'n i bue nnan'n su ba sa vuu yɛ ɔ wa fitali jenvie dan'n su.

³ Kpɛkuun nnɛn sroesroe nnan, be fin jenvie'n nun be fiteli. Be wafa'n ti ngunmin-ngunmin .

⁴ Klikli'n ti kɛ asɔmɔli sa, kusu ɔ lɛ ndɛwa kɛ anunman nyin'n sa. Kɛ n ´niɛn i'n, kpɛkuun be tutuli i ndɛwa mun. Be mɛnnin i su be jrɛnnin i i sin ja'm bé su. Ɔ jin lɛ kɛ klɔ sran sa. Kpɛkuun be mɛnnin i sran ngwlɛlɛ.

⁵ Nnɛn'n i nnyɔn su'n ti kɛ nnɛn ngble wie bɔ be flɛ i urs'n sa, ɔ sɛ nguku. Nvɛn ba nsan bo i je nun. Be seli i kɛ: ‹Jaso nan di nnɛn kpanngban.›

⁶ Kɛ i sɔ liɛ'n sinnin'n, n ´nian-an nnɛn kun ekun yɛ, ɔ fa kangale. Ndɛwa o i wia sin kɛ anunman wie sa, i ndɛwa sɔ'm be ti nnan. Ɔ lɛ ti nnan. Be mɛnnin i kwlalɛ kɛ ɔ `sie ninnge'n kwlaa.

⁷ N tɛ wun ninnge mun kɔnguɛ sɔ'n. N ´nian-an, nnɛn'n i nnan su'n yɛ ɔ o yɛ. I sroesroe liɛ'n, ɔ kun srɛ dan, yɛ i fanngan b'ɔ lɛ i'n, be wun-man like bɔ be fa sunnzun i-ɔ. I je'm be ti kɛ blalɛ sa, be ti sa glaunglaun, yɛ ɔ fa titi ninnge'm be nun-ɔn. Kpɛkuun ɔ di be yɛ ɔ tiatia i onga'n su. Ɔ nin nnɛn klikli nsan'm be wafa ti-man kun mlɔnmlɔn. I wɛ liɛ'm be ti blu.

⁸ Kɛ n wo lɛ bɔ n ´niɛn i wɛ sɔ mun'n, kpɛkuun i wɛ kaan kun ekun su fi ba. Kpɛkuun laa liɛ'm be nun nsan b'a tutu b'a gua. I wɛ uflɛ sɔ'n, ɔ lɛ nyinma kɛ sran sa. Ɔ lɛ nuan ɔ fa kan wun tulɛ ndɛ mun.»

Jɔlɛ nga Nyanmiɛn di'n

⁹ «N tɛ nian, kpɛkuun n ´wun i-ɔ, b'a siesie famiɛn bia mun. Kpɛkuun sran oke kun wa trannin ase su. I wun tralɛ'n fɛn fitafita kɛ jese fɔkɔ sa, yɛ i timuɛn'n ti ufue kɛ bua ndrɛ bɔ like fi sanngan-man nun'n sa. I famiɛn bia'n ti nyannyan kɛ sin taaman sa. Bia sɔ'n i ja'm be ti kukluuklu, be jue kɛ sin dan wie sa .

¹⁰ Sin kun fin sran oke'n i nyrun lɛ, ɔ nyrɛn kɛ nzue ba dan wie sa, kpɛkuun ɔ sonji. Sran akpi sɔ lele akpi be su i. Yɛ sran akpingbin be jinjin i nyrun lɛ. Yɛ jɔlɛ difuɛ'm be trannin ase nan b'a tike fluwa'm be su .

¹¹ N tɛ nian, afin n ti nnɛn'n i wɛ kaan'n i wun tulɛ ndɛ b'ɔ kan be'n. Kɛ bɔ n ´niɛn i sɔ'n, n ´wun i-ɔ, b'a kun nnɛn nnan su'n, kpɛkuun be sacili i wunnɛn'n, yɛ be fɛli i be yili sin dan kun nun.

¹² Nnɛn kun nga'm be liɛ'n, be yili tinmin ng'ɔ o be nun, sanngɛ be ukali be nguan nyanman'n su lele ɔ fa dili le nnyɔn kun.

¹³ Aolia nun'n, n tɛ o lɛ n tɛ nian. Kpɛkuun n wunnin like kun b'ɔ fa klɔ sran. Ɔ fin nyanmiɛn ble'n nun su jra. Ɔ ɔli bian oke'n i wun lɔ, nan b'a fɛ i b'a wunnge lɔ.

¹⁴ Be fali kwlalɛ'n be mɛnnin, be mɛnmɛnnin i, yɛ be fali famiɛn diwlɛ'n be wlɛli i sa nun. Nvle-nvle'n kwlaa nin mɛnmɛn'n kwlaa be nunfuɛ mun bɔ be kan aniɛn wafa-wafa'n kwlaa'n, be suli i. I kwlalɛ sɔ'n ɔ ´tran lɛ tititi, i blɛ'n su sin-man le, yɛ i sielɛ'n su nunnun-man le .»

Aolia nun ninnge klikli'n bé bo tulɛ

¹⁵ «Min Daniɛl, mín wla boli min wun. Min aolia nun ninnge sɔ bɔ n wunnin be'n be wlali min srɛ kpa.

¹⁶ N wunngeli sran nga be o lɛ'n be nun kun wun lɔ, yɛ n seli i kɛ ɔ `tu like nga n wunnin i lɛ'n i bo kle min. Yɛ ɔ tuli i bo kleli min-ɔn. Ɔ seli kɛ:

¹⁷ ‹Nnɛn sroesroe nnan sɔ'm be ti famiɛn nnan bɔ be wa jaso su asiɛ'n su wa.

¹⁸ I sin Nyanmiɛn bɔ like fi nun-mɛn i sin'n i nvle'n nunfuɛ'm be wa fa famiɛn diwlɛ'n man be. Ɔ ´ka bé sa nun tititi .›

¹⁹ Min waan n ´si nnɛn'n i nnan su'n i wun ndɛ'n weiin-weiin kpa. Nnɛn sɔ'n, ɔ nin kun nga mun be ti-man kun, ɔ yo sro kpa. I je'm be ti blalɛ, i ja bui'm be ti aaba. I like nga b'ɔ nyɛn i b'ɔ ´di'n, ɔ titi nun trɛtrɛtrɛ, kpɛkuun ɔ tiatia i onga'n su.

²⁰ N usɛli i wɛ blu bɔ be o i ti'n su'n bé wun ndɛ. Yɛ n usɛli i wɛ kun'n b'ɔ fili b'ɔ yoli man laa liɛ be nun nsan be tutu guali'n i wun ndɛ ekun. I wɛ sɔ'n ɔ lɛ nyinma, ɔ kan wun tulɛ ndɛ mun. Kɛ be wun i'n, ɔ yo kɛ ɔ yo sro tra be nga mun.

²¹ Nnɛn'n i wɛ sɔ'n, kɛ n ´niɛn i'n, wuun ɔ nin Nyanmiɛn i nvle nunfuɛ'm be su kun alɛ . I sa tili be.

²² Sanngɛ kɛ bian oke'n bali'n, ɔ wa dili jɔlɛ, kpɛkuun Nyanmiɛn bɔ like fi nun-mɛn i sin'n i nvle nunfuɛ'm be ndɛ yoli fɛ. Kɛ i blɛ'n ɔ juli'n, Nyanmiɛn i nvle nunfuɛ'm be nyannin famiɛn diwlɛ'n.

²³ Sa sɔ'n, i bo nga bɔ sran sɔ'n ɔ tu kleli min'n yɛ ɔ o yɛ. I waan: ‹Nnɛn'n i nnan su'n ɔ ti famiɛn diwlɛ nnan su'n i nzɔliɛ. Famiɛn diwlɛ sɔ'n, b'ɔ ti asiɛ'n su wa liɛ'n ɔ nin famiɛn diwlɛ kun nga'm be wie fi ti-man kun. Ɔ wa di asiɛ wunmuan'n, ɔ ´tiatia su kɛ be tiatia like su'n sa, yɛ ɔ ´saci i.

²⁴ I wɛ blu'm be ti famiɛn blu, be ´fin famiɛn diwlɛ sɔ'n nun. Kun ekun wa jaso su. I liɛ'n, ɔ nin klikli liɛ'm be ti-man kun. Ɔ ´kan famiɛn nsan be ase .

²⁵ Ɔ wa di Nyanmiɛn bɔ like fi nun-mɛn i sin'n i jɔlɛ tɛ. Ɔ ´kle Nyanmiɛn i nvle'n nunfuɛ'm be nyrɛnnɛn. Ɔ ´bu akunndan kɛ ɔ ´kaci blɛ'n i siesielɛ nga be siesieli'n, yɛ ɔ ´kaci mmla'n. Nyanmiɛn i nvle nunfuɛ'm be ´trɛn i sielɛ'n i bo lele afuɛ nsan nin sin .

²⁶ I sin'n, nyanmiɛn su lɔ jɔlɛ difuɛ'm be ´yia, kpɛkuun be ´de nnɛn sɔ'n i sa nun kwlalɛ'n, be ´saci kwlalɛ sɔ'n, yɛ be su wun-mɛn i kun.

²⁷ Famiɛn diwlɛ nga be wo asiɛ'n su wa'n, be ´fa be nun famiɛn bia mun, yɛ be ´fa kwlalɛ'n nin be anyrunnyan'n be ´man Nyanmiɛn bɔ like fi nun-mɛn i sin'n i nvle'n nunfuɛ mun. Nyanmiɛn i nvle'n nunfuɛ sɔ'm be famiɛn diwlɛ'n ɔ ´tran lɛ tititi. Yɛ mɛn'n nun siefuɛ'm be kwlaa bé nyin ´yi i, yɛ be ´su i.›

²⁸ Ndɛ nga i awieliɛ'n yɛ ɔ o lɛ-ɔ. M bɔbɔ min Daniɛl, srɛ dan kpa kunnin min, n kpali sa fuaii. Yɛ i sɔ sa'm be kali min klun tititi.»