Daniɛl 6 - NYANMIƐN NDƐ'N 1998

¹ Yɛ Dariis, b'ɔ fin Medi'n ɔ wa yoli famiɛn-ɔn. Kɛ ɔ ´yo sɔ'n, wuun ɔ lɛ afuɛ ablesiɛn-nin-nnyɔn.

Daniɛl i kpɔfuɛ'm be cicili i wun ndɛ

² Dariis sieli i famiɛn diwlɛ'n i akpasua'm bé su kpɛnngbɛn ya-kun-ablaɔn. Ɔ wunnin kɛ sɛ ɔ yo i sɔ-ɔ ɔ ti kpa. Sran sɔ mun yɛ be ´jran awa i nuan akpasua'm be su lɔ-ɔ.

³ Be sieli akpasua'm bé su kpɛn'm bé su kpɛnngbɛn nsan. Daniɛl ti be nsan sɔ'm be nun kun. Be yɛ akpasua-akpasua kunngun'm bé su kpɛn'm be wa kan be junman'n i su ndɛ mun kle be-ɔ, kɛ ɔ ´yo nan akpasua-akpasua'm b'a kwla di-man famiɛn'n i lufle'n ti.

⁴ Daniɛl i junman ng'ɔ di'n ɔ trɛ i wiengu nnyɔn'm be liɛ'n yɛ ɔ tra akpasua'm bé su kpɛn'm be kpɛnngbɛn'm be kwlaa be liɛ'n. Afin wawɛ ng'ɔ o i nun'n i dan tra be liɛ'n. I sɔ'n ti, famiɛn waan ɔ ´fɛ i fa sie i famiɛn diwlɛ wunmuan'n su.

⁵ Akpasua su kpɛn'm bé su kpɛnngbɛn'm be nin akpasua su kpɛn'm be kunndɛli sa wie b'ɔ ´kle kɛ Daniɛl ɔ'a fɔn famiɛn diwlɛ'n i mmla'n i wun nan be ´jran su be bu i fɔ. Sanngɛ b'a wun-man sa tɛ fi nin fɔnlɛ fi Daniɛl i wun. Afin ɔ ti sran nanwlɛfuɛ, i sɔ'n ti be kwla saci-mɛn i wun kaan sa.

⁶ Sran sɔ'm be seli bé wun kɛ: «E su nyan-man sa kun bɔ e ´jran su nan y'a fa bu Daniɛl i fɔ-ɔ, san i Nyanmiɛn ng'ɔ su i'n, i mmla nun yɛ e ´kwla nyan sa wie e ´jran su-ɔ .»

⁷ Kpɛkuun akpasua su kpɛn'm be kpɛnngbɛn nnyɔn be nin akpasua su kpɛn'm be ɔli ndɛndɛ be ko toli famiɛn'n nan b'a se i kɛ: «Nannan Dariis, man wie wla fi wɔ!

⁸ Akpasua su kpɛn'm be kpɛn mun, nin prefe mun, nin siefuɛ mun, nin wɔ afɔtuɛ manfuɛ mun, ɔ nin kpɛnngbɛn kun nga mun be yiali, yɛ be kwlaa be waan a `kpɛ mmla kun nan sran'm be kwlaa be `ti. Be waan a `se kɛ: ‹Sran kwlakwla nga b'ɔ yaci wɔ bɔ a ti famiɛn'n wɔ lɛ, nan ɔ ko ijɔ i bɔbɔ i amuɛn wie su annzɛ ɔ ko manman sran uflɛ'n, man be fɛ i sɔfuɛ'n be to yi i asɔmɔli'm be sin kunman'n nun lɔ.›

⁹ Nannan, kplin su nan fa ɔ sa ti nzɔliɛ'n sie mmla sɔ'n su kɛ ɔ ´yo nan b'a kwla kaci-mɛn i'n ti. Man ɔ yo kɛ e Medifuɛ nin e Pɛrsfuɛ'n e mmla'n bɔ be kaci i-ɔ ɔ kaci-man'n sa.»

¹⁰ Kɛ ɔ yoli sɔ'n yɛ famiɛn Dariis fɛli i sa ti'n sieli mmla'n su-ɔ.

Be toli Daniɛl be yili i asɔmɔli'm bé kunman'n nun

¹¹ Kɛ Daniɛl tili i kɛ famiɛn ɔ'a mɛn i sɔ mmla'n, ɔ ɔli i awlo lɔ. Ɔ fuli nglo sua'n nun, ɔ tikeli i fenɛtri nga be kpɛli be Zerizalɛm bue liɛ'n su lɔ'n. Aliɛ ba kun nun'n, ɔ koto srɛ Nyanmiɛn kpɛ nsan, yɛ ɔ mɛnmɛn i. Ɔ yoli i kɛ ɔ fa yo i titi'n sa .

¹² Be nga be kpɔ i'n be ɔli ndɛndɛ be ko toli i. Kɛ be ´kɔ'n, wuun ɔ o Nyanmiɛn srɛlɛ nin i manmanlɛ'n su.

¹³ Kpɛkuun be ɔli trɛlɛlɛ be ko toli famiɛn'n yɛ be usɛli i kɛ: «?Nannan, w'a man-man mmla kɛ cɛn ba ablasan nga'm be nun'n sɛ sran kun ijɔ i amuɛn wie su annzɛ sɛ ɔ yaci wɔ lɛ nan ɔ manman sran uflɛ'n, be `to i sɔfuɛ'n be yi i asɔmɔli'm bé sin kunman'n nun?» Ɔ tɛli be su kɛ: «Kɛ n seli sɔ-ɔ, be kaci i-ɔ ɔ yo-man ye, ɔ ti kɛ e Medifuɛ nin e Pɛrsfuɛ e mmla'n sa, be kpɛ i wun-ɔn ɔ kpɛ-man.»

¹⁴ Yɛ be seli famiɛn'n ekun kɛ: «Daniɛl b'ɔ ti kanga bɔ be ko fali be Zida lɔ bali'n be nun kun'n, i nyin yi-man ɔ, yɛ ɔ bu-man ɔ mmla nga a fali ɔ́ sa ti nzɔliɛ'n sieli su'n i like fi. Aliɛ ba kun nun ɔ srɛ i Nyanmiɛn'n kpɛ nsan.»

¹⁵ Kɛ famiɛn'n tili ndɛ sɔ'n, i wla boli i wun kpa, ɔ guguli i klun lɔ kɛ ɔ ´de Daniɛl. Lele bɔ wia'n ´fa tɔ'n, ɔ kunndɛli i nun yacilɛ'n i wun ngwlɛlɛ.

¹⁶ Sanngɛ Daniɛl i kpɔfuɛ'm be sali bé sin ndɛndɛ kpa famiɛn'n i wun lɔ. Be seli i kɛ: «Nannan, a si jrɛin kɛ e Medifuɛ nin e Pɛrsfuɛ e mmla'n nun'n, famiɛn'n i ndɛ kun ng'ɔ ko kan'n, wuun ɔ'a kan, be kwla kpɛ-mɛn i wun kun.»

¹⁷ Kɛ ɔ yoli sɔ'n nan famiɛn ɔ'a man be atin nan b'a ko fa Daniɛl b'a yi i asɔmɔli'm be sin kunman'n nun. Famiɛn'n seli Daniɛl kɛ: «Man ɔ Nyanmiɛn'n bɔ a su i nin anwlɛn tankaan'n ɔ de wɔ !»

¹⁸ Be fali yɛbuɛ kun be katali kunman i nuan'n su, famiɛn'n ɔ fɛli i sa nuan'n sieli su . I sran dandan'm be yoli i sɔ wie. Kɛ ɔ ko yo nan sran wie ɔ'a sin-man lɛ ɔ'a yi-man Daniɛl'n annzɛ ɔ'a kun-mɛn i'n, i ti yɛ be yoli i sɔ-ɔ.

¹⁹ Famiɛn'n sɛli sin ɔli i awlo. Kɔnguɛ sɔ'n, be mɛnnin i like ɔ'a di-man, yɛ ɔ'a fa-man like fi ɔ'a yiyi-mɛn i nyin su. Ɔ'a bu-mɛn i nyinma mlɔnmlɔn.

Nyanmiɛn sasali Daniɛl

²⁰ Nglɛmun ndɛ kɛ wia'n ɔ ´tu i bo'n, famiɛn'n jasoli, ɔ ɔli asɔmɔli'm bé kunman'n su lɔ ndɛndɛ.

²¹ Kɛ ɔ mantannin kunman'n wun lɛ'n, ɔ kpan flɛli Daniɛl. Kɛ ɔ ´flɛ i sɔ'n, i konviabo bo i kpɔlɛ. Ɔ seli kɛ: «?Daniɛl, Nyanmiɛn b'ɔ lafi-man i sufuɛ, ɔ Nyanmiɛn bɔ a su i nin anwlɛn tankaan'n, ɔ kwla deli wɔ asɔmɔli'm bé sa nun?»

²² Yɛ Daniɛl tɛli i su kɛ: «Nannan, man wie wla fi wɔ!

²³ Min Nyanmiɛn'n sunmɛnnin i anz'n kun ɔ wa katali asɔmɔli'm bé nuan'n. B'a yo-man min like fi. Afin Nyanmiɛn wunnin i kɛ m'an yo-man sa tɛ fi, yɛ Nannan, wɔ kusu, m'an yo-man sa tɛ fi ɔ́ wun .»

²⁴ Famiɛn'n i klun jɔli dan kpa, nan ɔ'a se kɛ be `yi Daniɛl kunman'n nun fite. Be yili Daniɛl kunman'n nun fiteli. Kɛ be niɛn-niɛnnin i wun'n, b'a wun-man kɛ i lika kaan sa ti kplowa. Afin ɔ fɛli i wla'n kwlaa guɛli i Nyanmiɛn'n su.

²⁵ Famiɛn'n waan be `tra be nga bɔ be fali Daniɛl ko kpɛli i'n be nin bé yi mun, nin be mma mun, nan be `fa be yi asɔmɔli'm be sin kunman'n nun lɔ. I sin nan b'a ju kunman'n i bo lɔ bɔbɔ'n, lalaa kpa asɔmɔli'm b'a sɔ be nun b'a titi be nun trɛtrɛtrɛ, yɛ b'a bubu be owie'm be kwlaa be nun.

²⁶ Kɛ ɔ cɛli kan'n, famiɛn Dariis klɛli fluwa ko mannin nvle-nvle'n kwlaa nin mɛnmɛn'n kwlaa be nunfuɛ mun bɔ be kan aniɛn wafa-wafa'n kwlaa bɔ be tran asiɛ wunmuan'n su'n. I waan: «Man amún wun jɔ amun fɔuun kpa.

²⁷ M bɔbɔ m'an man mmla kɛ, kɛ ɔ fin ndɛ'n, man sran nga bɔ n sie be'n be kwlakwla be `sro Daniɛl i Nyanmiɛn'n kpa, yɛ bé nyin `yi i. Afin ɔ ti Nyanmiɛn kun b'ɔ lafi-man. Ɔ o lɛ tititi, i famiɛn diwlɛ'n ɔ lɛ-man saciwlɛ, i kwlalɛ'n ɔ lɛ-man awieliɛ.

²⁸ I yɛ ɔ de sran-an, i yɛ ɔ yo man sran kwla nyɛn i ti-ɔ. Nglo lɔ o, asiɛ'n su wa o, i yɛ ɔ yi atrɛ yɛ ɔ yo abonuan sa mun-ɔn. I yɛ ɔ deli Daniɛl asɔmɔli'm bé sa nun nin-ɔn.»

²⁹ I sin Daniɛl wa yoli sran dan kpa Dariis blɛ su. Ɔ yoli dan sɔ ekun Siris b'ɔ ti Pɛrs famiɛn'n i blɛ su.