Daniɛl 5 - NYANMIƐN NDƐ'N 1998

Bɛlsazar i cɛn dilɛ

¹ Cɛn kun famiɛn Bɛlsazar yiɛli i sran dandan kɔe akpi kɛ be ko di like. Ɔ nɔnnin nzan be kwlaa be nyrun lɛ.

² Kɛ nzan'n tili i'n, ɔ sunmannin sran kɛ be ko fa sika ɔkwlɛ klowa nin jɛtɛ ufue klowa nga i si Nɛbikadnɛzar ko fali be Zerizalɛm lɔ Nyanmiɛn i sua nun bali'n. I waan be su nzan be nun be man i bɔbɔ nin i sran dandan mun, nin i yi mun, ɔ nin i soman mun.

³ Be ko fali sika ɔkwlɛ klowa sɔ bɔ laa be o Zerizalɛm lɔ Nyanmiɛn i sua nun'n be bali. Famiɛn'n nin i sran dandan mun, nin i yi mun, ɔ nin i soman'm be kwlaa be nɔnnin nzan klowa sɔ'm be nun.

⁴ Be kwlaa sɔ'm be nɔnnin nzan, ɔ tili be kpa, kpɛkuun be manmannin amuɛn nga be fali sika ɔkwlɛ, nin jɛtɛ ufue, nin aaba, nin blalɛ, nin waka, ɔ nin yɛbuɛ be yoli'n.

⁵ I osu kunngba sɔ'n nun'n, be ´nian-an sran sa yɛ ɔ o kannin siewlɛ'n wun koko yɛ. Ɔ su klɛklɛ like wie famiɛn'n i sua'n i talɛ'n bɔ be kɛnnin i ayre ufue'n su. Famiɛn'n wunnin sran sa'n b'ɔ su klɛ like'n.

⁶ Kpɛkuun i wunnɛn kplo'n ɔ kali lɛ kacili, srɛ kunnin i dan kpa. I ngbaliɛ'n kwlaa nyanjili i wun, siɛn'n i ja nannglunman'm be sisi be wiengu sa kpɛkpɛkpɛkpɛ.

⁷ Ɔ kpannin kekle kɛ be ko yia Babilɔni lɛ wunnzue yifuɛ fanunfanun mun. Kɛ be bali'n, ɔ kan kleli be kɛ: «Sran kwlaa ng'ɔ kanngan fluwa nga nan ɔ tu i bo'n, be ´klɛ i wun famiɛn kondro ɔkwlɛ kankankan, be ´wlɛ i kɔmin sika ɔkwlɛ njuaba, yɛ be nga be mantan min'n, ɔ wa yo be nsan su.»

⁸ Famiɛn'n i sa sifuɛ'm be bali, sanngɛ b'a kwla kanngan-man fluwa'n nan se kɛ i bo yɛ be ´tu-ɔ.

⁹ Kɛ ɔ yoli sɔ'n, srɛ kunnin famiɛn Bɛlsazar trali su, kpɛkuun i nyrun'n kacili. I sran dandan'm be kwlaa bé wla boli bé wun.

Daniɛl kanngannin talɛ'n wun fluwa nga be klɛli'n

¹⁰ Kɛ famiɛn'n nin i mantanfuɛ'm be ´kpan'n, famiɛn i nin'n ɔ tili. Ɔ wluli aliɛ diwlɛ lɔ, yɛ ɔ seli kɛ: «Nannan, man wie wla fi wɔ! Nán man wɔ akunndan sanngan kun, nán ɔ nyrun'n ɔ kaci kun.

¹¹ Mɛn nga a sie yɛ'n i nun wa'n, sran kun wo lɛ bɔ Nyanmiɛn i wawɛ'n wo i nun. Ɔ si i nyin su'n, be wunnin kɛ ɔ si sa'm be bo, be wunnin kɛ ɔ si ngwlɛlɛ dan, yɛ ɔ wun sa'm be wlɛ weiin-weiin kɛ sran nga Nyanmiɛn man be ngwlɛlɛ'n sa. I sɔ'n ti famiɛn Nɛbikadnɛzar, ɔ bɔbɔ ɔ́ si liɛ'n, ɔ fɛli i sieli wunnzue yifuɛ fanunfanun'm bé su kpɛn.

¹² Sran sɔ'n bɔ be flɛ i Daniɛl b'ɔ si tɔnnin i dunman kɛ Bɛltsazar be wunnin kɛ wawɛ ng'ɔ o i nun'n nin sran nga'm be liɛ'n ti-man kun. Afin ɔ wun sa'm be wlɛ, ɔ si ngwlɛlɛ, ɔ kwla tutu laliɛ'm be bo, ɔ tu nyanndra nun sa'm be bo, yɛ ɔ yiyi nvialiɛ nun sa'm be nun. Man be ko flɛ Daniɛl sɔ'n bɔ famiɛn'n tɔnnin i dunman kɛ Bɛltsazar'n be bla. Ɔ wa tutu fluwa nga be klɛli'n i bo.»

¹³ Yɛ be fali Daniɛl ɔli famiɛn'n i nyrun lɔ-ɔ. Famiɛn'n ɔ usɛli i kɛ: «?Wɔ yɛ a suan Daniɛl nin-ɔn? ?A ti Zuif nga mín si b'ɔ ti famiɛn'n ko fali be kɛ kanga sa Zida lɔ bali'n be nun kun?

¹⁴ N tili i kɛ Nyanmiɛn i wawɛ'n wo ɔ nun nan a si sa'm be bo, yɛ a si ngwlɛlɛ nan a si sa dan.

¹⁵ Be fali sa sifuɛ, nin wunnzue yifuɛ fanunfanun'm be blɛli min kɛ be wa kanngan fluwa nga nan be `tutu i bo kle min. Sanngɛ b'a kwla tutu-mɛn i bo.

¹⁶ N tili i kɛ ɔ liɛ'n, a kwla tutu nyanndra nun sa'm be bo, yɛ a kwla yiyi nvialiɛ nun sa'm be nun. Sɛ a kwla kanngan fluwa nga be klɛli i yɛ'n nan a tu i bo kle min'n, be ´kla ɔ wun famiɛn kondro ɔkwlɛ kankankan, be ´wla ɔ kɔmin sika ɔkwlɛ njuaba, kpɛkuun a wa yo min mantanfuɛ'm be nsan su.»

¹⁷ Daniɛl tɛli famiɛn'n su kɛ: «Nannan, man ninnge sɔ'm be ka lɛ, annzɛ kusu fa man sran uflɛ. Sanngɛ n wa kanngan fluwa sɔ'n, yɛ n ´tutu i bo n ´kle wɔ.

¹⁸ Nannan, Nyanmiɛn bɔ like fi nun-mɛn i sin'n, ɔ yoli man ɔ́ si Nɛbikadnɛzar yoli famiɛn dan kpa, ɔ nyannin nyrun, yɛ be mɛnmɛnnin i kpa.

¹⁹ Nyanmiɛn man ɔ nyannin nyrun, i ti nvle'm be kwlaa, ɔ nin mɛnmɛn'm be kwlaa be nun sran mun bɔ be kan aniɛn wafa-wafa'n kwlaa'n be sroli i, be usuli i nyrun. Sran kwlaa nga famiɛn sɔ'n ɔ klo kɛ ɔ ´kun i'n, ɔ su kun i. Sran nga i waan ɔ ´yaci i lɛ'n, ɔ yaci i lɛ. Sran ng'ɔ klo kɛ ɔ ´mɛn i kɔmin su'n, ɔ mɛn i kɔmin su. Sran nga kusu bɔ i waan ɔ ´yo i wannzo'n, ɔ su yo.

²⁰ Sanngɛ famiɛn'n ɔ wa tuli i wun, ɔ wa keteli i anwlɛn'n, yɛ ɔ yoli nuan difuɛ. I blɛ sɔ nun'n, Nyanmiɛn tuli i famiɛn bia'n su, kpɛkuun ɔ'a nyan-man nyrun kun.

²¹ Be kɛnnin i bo sran'm be nun. Ɔ kacili kɛ nnɛn'm be sa. Ɔ nin blo aflunmun mun yɛ be tran nin-ɔn. Ɔ dili ijre kɛ nannin'm be sa. Nyansue'n boli i. Ɔ yoli sɔ lele ɔ fa juli blɛ ng'ɔ wunnin i wlɛ kɛ kannzu Nyanmiɛn bɔ like fi nun-mɛn i sin'n yɛ ɔ sie sran'm be famiɛn diwlɛ mun nan ɔ fa famiɛn bia'n man sran nga i klun klo kɛ ɔ ´fa mɛn i'n.

²² Yɛ wɔ Bɛlsazar bɔ a ti i wa'n, a si i kwlaa sɔ'n kpan, sanngɛ a kan-man ɔ́ wun ase mlɔnmlɔn.

²³ A jasoli Nyanmiɛn b'ɔ ti nglo lɔ famiɛn'n i wun. A wɔli i safle. I safle b'ɔ a wɔli i'n yɛlɛ kɛ wɔ man be ko fali i sua dan'n nun lɔ klowa mun blɛli wɔ. A nin ɔ sran dandan mun, nin ɔ́ yi mun, ɔ nin ɔ soman mun amun nɔnnin be nun nzan. Kpɛkuun a manmannin amuɛn nga be fali jɛtɛ ufue, nin sika ɔkwlɛ, nin aaba, nin blalɛ, nin waka, ɔ nin yɛbuɛ yɛ be fa yoli be'n. Sanngɛ amuɛn sɔ'm be wun-man ase, bé su ti-man sa, be si-man sa fi. Yɛ w'a bu-man akunndan kɛ a ´mɛnmɛn i bɔ ɔ nguan nyanman'n wo i sa nun'n b'ɔ si wɔ agualiɛ'n.

²⁴ I sɔ ti yɛ Nyanmiɛn man sran sa'n ɔ wa klɛli fluwa nga-a.

²⁵ Like nga be klɛli'n yɛ: LIKE KALƐ, LIKE KALƐ, LIKE SUNNZUNLƐ YƐ LIKE NUN BUBULƐ.

²⁶ LIKE KALƐ'n i bo'n yɛlɛ kɛ: Nyanmiɛn ɔ'a ka ɔ sielɛ'n i blɛ'n yɛ ɔ'a sie i nuan.

²⁷ LIKE SUNNZUNLƐ'n i bo'n yɛlɛ kɛ: be sunnzunnin wɔ toe su, be wunnin kɛ a ti fokofoko.

²⁸ LIKE NUN BUBULƐ'n i bo'n yɛlɛ kɛ: be bubuli ɔ famiɛn diwlɛ'n nun be mannin Medifuɛ mun nin Pɛrsfuɛ mun .»

²⁹ Be ja nun lɛ Bɛlsazar seli i sufuɛ'm be kɛ be `kla Daniɛl i famiɛn kondro ɔkwlɛ kankankan nan be `fa sika ɔkwlɛ njuaba be wlɛ i kɔmin. Ɔ kɛnnin i ekun kɛ ɔ'a fɛ i ɔ'a yo i mantanfuɛ'm be nsan su.

³⁰ I kɔnguɛ kunngba sɔ nun'n be kunnin Bɛlsazar b'ɔ ti Babilɔni famiɛn'n.