Daniɛl 3 - NYANMIƐN NDƐ'N 1998

Famiɛn'n i mmla ng'ɔ mɛnnin i kɛ be koto sika ɔkwlɛ sran'n i bo'n

¹ Famiɛn Nɛbikadnɛzar man be yoli sika ɔkwlɛ sran kun. I nglo-nglo su'n ti mɛtri ablasan, yɛ i tɛtrɛ nun'n ti mɛtri nsan. Be ko tɛkɛli i Dira lɔ lika kpɛtɛkplɛɛ'n nun Babilɔni akpasua'n su.

² Famiɛn Nɛbikadnɛzar sunmannin sran mun kɛ be ko yia akpasua su siefuɛ mun, nin prefe mun, nin kpɛnngbɛn uflɛ wie mun, nin afɔtuɛ manfuɛ mun, nin bɔlɛ su nianfuɛ mun, nin jɔlɛ difuɛ mun, nin mmla'n su kpɛn mun, ɔ nin awa junman difuɛ nga be wo akpasua kunngun'm be su'n be kwlaa. Sa nga ti yɛ i waan be yia be'n, yɛlɛ sika ɔkwlɛ sran ng'ɔ takali'n i nglo yilɛ.

³ Yɛ sran dandan sɔ'm be kwlaa be yiali kɛ be wa yi sika ɔkwlɛ sran bɔ famiɛn'n takali'n i nglo. Be wa sin jranjrannin sika ɔkwlɛ sran sɔ'n i nyrun lɛ.

⁴ Ndolo bofuɛ'n kpannin kekle kpa seli kɛ: «Amun bɔ amun ti nvle'm be kwlaa be nunfuɛ'n bɔ amun fin mɛnmɛn'n kwlaa nun'n, bɔ amun ijɔ aniɛn wafa-wafa'n kwlaa'n, amun `sie amún su amun `tie.

⁵ Kɛ amun ti awɛ'n, nin blo'n, nin sanngo'n, nin kote'n, nin aluku'n, nin sɛkɛsɛkɛ'n, ɔ nin ngowa ninnge uflɛ wie'm be tɛlɛ cɛ'n, amun `koto yɛ amun `utu amun nyin ase nan amun `su famiɛn'n i sika ɔkwlɛ sran b'ɔ takali'n.

⁶ Sran kun nga i waan ɔ koto-man nan ɔ su-mɛn i wie'n, be `ka bé ja nun lɛ be trɛ i be jrɛ i fur bɔ sin o nun'n i nun.»

⁷ I sɔ'n ti, kɛ nvle-nvle'm be nunfuɛ'm bɔ be fin mɛnmɛn'm be nun'n, bɔ be kan aniɛn wafa-wafa'n be kwlaa'n, be tili awɛ'n, nin blo'n, nin sanngo'n, nin aluku'n, nin kote'n, nin ngowa ninnge wafa-wafa'm be tɛlɛ'n, be kotoli yɛ be utuli be nyin ase nan b'a su sika ɔkwlɛ sran nga famiɛn Nɛbikadnɛzar takali'n.

Daniɛl i janvuɛ'm b'a su-man sika ɔkwlɛ sran sɔ'n wie

⁸ I sin, ɔ'a cɛ-man bɔbɔ, Babilɔnifuɛ wie'm be ko dili Zuif'm bé bo abla kleli famiɛn'n.

⁹ Be ko seli famiɛn Nɛbikadnɛzar kɛ: «Ee Kpli, man wie wla fi wɔ!

¹⁰ Nannan, a mannin mmla kɛ sran kwlaa wie ala b'ɔ ti awɛ'n, nin blo'n, nin sanngo'n, nin aluku'n, nin kote'n, nin sɛkɛsɛkɛ'n, ɔ nin ngowa ninnge uflɛ wie'm be tɛlɛ cɛ'n, ɔ `koto yɛ ɔ `utu i nyin ase nan ɔ `su sika ɔkwlɛ sran'n.

¹¹ Ɔ waan sran kwlaa nga i waan ɔ koto-mɛn i bo nan ɔ su-mɛn i'n, be `yi i sin dan kun nun.

¹² Nannan, Sadrak nin Mesak, nin Abɛd-Nego bɔ be ti Zuif'n, bɔ a fali be siesieli akpasua'm bé su'n, be bu-man wɔ like fi. I sɔ'n ti b'a di-man ɔ́ nuan nun ndɛ'n su. Be waan be sɔ-man wɔ amuɛn'm be wie, yɛ b'a su-man ɔ sika ɔkwlɛ sran bɔ a takali'n.»

¹³ Nɛbikadnɛzar fali ya dan kpa, nan ɔ'a sunman sran kɛ be ko fa Sadrak nin Mesak, ɔ nin Abɛd-Nego be `bla. Yɛ be ko fali be blɛli i-ɔ.

¹⁴ Famiɛn'n usali be kɛ: «?Sadrak, Mesak, Abɛd-Nego, sakpa-sakpa yɛ amun waan amun sɔ-man min amuɛn mun, nan amun koto-man sika ɔkwlɛ sran nga n takali'n i bo nin-ɔn?

¹⁵ Siɛn'n, sɛ amun ti awɛ i bolɛ'n, nin blo nin sanngo'm be bolɛ'n, nin aluku nin kote'm be bolɛ'n, nin sɛkɛsɛkɛ nin ngowa ninnge uflɛ wie'm be tɛlɛ cɛ'n, amun `koto yɛ amun `utu amun nyin ase sika ɔkwlɛ sran bɔ n yoli'n i bo, nan amun `su i. Sɛ amu'an su-mɛn i'n, bé ja nun lɛ be ´fa amun to yi sin dan kpa kun nun. ?Amuɛn onin yɛ ɔ kwla de amun mín sa nun-ɔn?»

¹⁶ Sadrak nin Mesak, ɔ nin Abɛd-Nego be tɛli famiɛn'n su kɛ: «Nannan, e liɛ'n e lɛ-man é ti kpliwlɛ.

¹⁷ I kwlaa nun'n, si kɛ e Nyanmiɛn nga e su i'n, ɔ kwla de ye. Nannan, sakpa, ɔ wa de ye sin'n nun, yɛ ɔ wa de ye ɔ́ sa nun.

¹⁸ Nannan, kannzɛ ɔ yo sɛ, ɔ fata kɛ a si kɛ e su sɔ-man wɔ amuɛn mun, yɛ e su su-man ɔ sika ɔkwlɛ sran bɔ a takali'n .»

¹⁹ Nɛbikadnɛzar fali ya dan kpa trali su, i ti ɔ'a kwla di-man amlin Sadrak, nin Mesak, ɔ nin Abɛd-Nego bé wun kun. I waan be `ko trɔ sin'n nuan nan man i dan tra nga be `trɔ i titi'n sɔ kpɛ nso.

²⁰ Ɔ seli sonja nga be lɛ wunmiɛn kpa'm be kɛ be `ko ci Sadrak, nin Mesak, ɔ nin Abɛd-Nego nan be `yi be sin dan'n nun.

²¹ Be cili be sran nsan sɔ mun. Kɛ be ´ci be sɔ'n, wuun bé wun tralɛ dan'n, nin bé bo pantanlɔn'n, ɔ nin be tralɛ tɛnndɛn'n wo bé wun, kpɛkuun bé kle'n wo bé ti. Yɛ be toli be yili sin dan'n nun-ɔn.

²² Kɛ bɔ famiɛn'n jrannin i mmla ng'ɔ mannin'n i su dan'n ti be wlawlali sin'n nun, ɔ man ɔ loli trali su. I sɔ'n ti, sonja nga be fa Sadrak nin Mesak, ɔ nin Abɛd-Nego be ko yi be fur bɔ sin'n wo nun nun'n, sin taaman'n ɔ yrali be bɔbɔ nan ɔ'a kun be.

²³ Sadrak nin Mesak, ɔ nin Abɛd-Nego'n, be tɔli sin'n i afiɛn lɔ, kɛ ɔ ´yo sɔ'n, wuun nyanman'n tɛ cici bé wun.

Nyanmiɛn ɔ wa deli Daniɛl i janvuɛ mun sin sɔ'n nun

²⁴ Srɛ kunnin famiɛn Nɛbikadnɛzar, kpɛkuun ɔ jasoli kpɛ kunngba waka, nan ɔ'a usɛ i afɔtuɛ manfuɛ'm be kɛ: «?Nán sran nsan yɛ e cili be e yili sin'n nun nin-ɔn?» Be tɛli i su kɛ: «Nannan i-ɔ, kɛ ɔ ti sɔ-ɔ!»

²⁵ Yɛ ɔ seli be kɛ: «Sanngɛ n wun sran nnan sin'n nun lɔ. Nyanman fi ci-man be yɛ be su wlan-wlan sin'n nun. Like fi yo-man be. Sran ng'ɔ tian be su nnan'n, kɛ a wun i sa'n, ɔ waan Nyanmiɛn su lɔ sran-an .»

²⁶ I sin'n, Nɛbikadnɛzar ko jrannin fur nga be trɔli sin'n i nun'n i anuan'n nun, kpɛkuun ɔ flɛli be, i waan: «Sadrak, Mesak, Abɛd-Nego, Nyanmiɛn b'ɔ o nglo-nglo'n i sufuɛ mun, amun `fite amun `bla.» Yɛ be nsan'n be fin sin'n nun lɔ fiteli-ɔ.

²⁷ Akpasua su siefuɛ mun, nin prefe mun, nin kpɛnngbɛn uflɛ wie'm be nin famiɛn'n i mantanfuɛ'm be yiali bé wun lɛ. Be wunnin kɛ sin'n ɔ'a yo-man be wunnɛn'n i like fi, nan bé ti ndrɛ ba kun sa ɔ'a yra-man yɛ be tralɛ'm b'a yra-man kaan sa, kusu sin wɛnsrɛn bɔn-man bé wun kaan sa.

²⁸ Yɛ famiɛn'n waan: «Be `manman Sadrak nin Mesak, ɔ nin Abɛd-Nego be Nyanmiɛn'n. Afin ɔ sunmɛnnin i anz'n kɛ ɔ wa de i sufuɛ mun. Be fali be wla'n be guɛli i su, i ti b'a fa-man min nuan ndɛ'n su. Be kplinnin su kɛ be `kle be wunnɛn i yalɛ, afin be wunnin i kɛ i sɔ'n ɔ ti kpa tra kɛ b'a yaci be Nyanmiɛn'n lɛ nan b'a su amuɛn mun.

²⁹ I sɔ'n ti, mmla nga m ´mɛn i siɛn'n yɛlɛ nga. Sɛ sran kun, sɛ i nvle ng'ɔ fin nun'n ɔ ti sɛ o, sɛ i mɛn'n ɔ ti sɛ o, sɛ aniɛn ng'ɔ kan'n ɔ ti sɛ o, sɛ ɔ fa Sadrak, nin Mesak, ɔ nin Abɛd-Nego be Nyanmiɛn'n kan ngowa'n, man be kpɛkpɛ i sɔfuɛ'n i nun kpokpokpo, yɛ man i sua'n ɔ kaci sua nvuɛn. Afin amuɛn wie fi kwla de-man sran kɛ be Nyanmiɛn liɛ'n sa.»

³⁰ I sin famiɛn'n wa mannin Sadrak nin Mesak, ɔ nin Abɛd-Nego bé sa su ekun, be nyannin nyrun kpa Babilɔni akpasua'n su.

Famiɛn'n i laliɛ'n i nnyɔn su'n: waka dan'n

³¹ Famiɛn Nɛbikadnɛzar kannin ndɛ kleli sran'm bɔ be o nvle-nvle'm be nun nin mɛnmɛn'm be nun'n, bɔ be ijɔ aniɛn wafa-wafa'n kwlaa, bɔ be wo asiɛ wunmuan'n su'n. Ɔ seli be kɛ: «Man amún wun jɔ amun fɔuun kpa.

³² N wunnin kɛ ɔ ti kpa kɛ n kan sa'm be nzɔliɛ nga Nyanmiɛn b'ɔ o nglo-nglo lɔ'n ɔ yili be nglo kleli min'n, ɔ nin abonuan sa ng'ɔ yo mannin min'n.

³³ Nzɔliɛ sɔ'm be ti dandan, Nyanmiɛn i abonuan sa ng'ɔ yo be'n be yo sro! Nyanmiɛn yɛ ɔ ´sie mɛn'n titi-ɔ, i dan ng'ɔ ti'n, ɔ su wie-man le .»