Daniɛl 2 - NYANMIƐN NDƐ'N 1998

Nɛbikadnɛzar i laliɛ klikli ng'ɔ cɛnnin'n i ndɛ

¹ Kɛ Nɛbikadnɛzar wa trannin bia'n su'n i afuɛ nnyɔn su'n, ɔ cɛnnin laliɛ wie mun. I wla b'ɔ boli i wun'n ti, kɛ ɔ la sa'n, ɔ kwla bu-mɛn i nyinma.

² Ɔ yiali wunnzue yifuɛ fanunfanun'm be kwlaa kɛ be wa kɛnngɛn i laliɛ'm be kle i. Be bali yɛ be wa sin jrɛnnin i nyrun lɛ-ɔ.

³ Ɔ seli be kɛ: «N cɛnnin laliɛ kun, ɔ'a bo mín wla dan kpa, i sɔ ti n klo kɛ amun kanngan laliɛ sɔ'n be kle min.»

⁴ Wunnzue yifuɛ'm be tɛli famiɛn'n su Aram aniɛn'n nun kɛ: «Nannan, man wie wla fi wɔ! Kan laliɛ nga a cɛnnin'n kle ye man e tu i bo e kle wɔ.»

⁵ Famiɛn'n waan: «Nga m'an gugu'n yɛlɛ kɛ sɛ amun bɔbɔ amu'an kwla kanngan-man laliɛ nga n cɛnnin'n nan amu'an tu-mɛn i bo ɔ'a gua-man su'n, be ´tra amun be ´kpɛkpɛ amun nun kpokpokpo yɛ amún sua'm be ´kaci sua nvuɛn.

⁶ Sɛ kusu amun bɔbɔ amun kanngan laliɛ'n, nan amun tu i bo be gua su'n, n ´cɛ amun ninnge kpakpa, yɛ amun ´nyan nyrun dan kpa. I sɔ'n ti, amun `kanngan laliɛ sɔ'n nan amun `tu i bo be gua su.»

⁷ Be tɛli famiɛn'n i su ekun kɛ: «Nannan, kanngan laliɛ nga a cɛnnin'n kle ye man e tu i bo e man wɔ.»

⁸ Famiɛn'n seli be ekun kɛ: «N si jrɛiin kɛ amun nyinfu amun waan amun ´cuɛn-cuɛn ndɛ'n i ase, afin amun si kɛ ndɛ nga n ko kan'n yɛ m'an kɛn i lɛ-ɔ.

⁹ Sanngɛ sɛ amu'an kan-man laliɛ'n b'a kle-man min'n, amun wa wun sa nga n ´fa wla amun kwlaa amun nun'n. ?Yoo, amun kwlaa amu'an cici nan amun ´kan ato nin gblɛ ndɛ mun ´kle min? Amun `kanngan laliɛ'n be kle min, i liɛ'n n ´si kɛ amun kwla tu i bo'n kusu be gua su.»

¹⁰ Yɛ wunnzue yifuɛ'm be tɛli famiɛn'n i su kɛ: «Nannan, sran fi nun-man asiɛ nga su wa b'ɔ kwla yo like nga ɔ waan e yo i yɛ nin-ɔn. I sɔ'n ti, kannzɛ famiɛn kun ti dan'n, annzɛ sɛ ɔ kwla bɔbɔ'n, ɔ nian se-man wunnzue yifuɛ fanunfanun'm be wie fi kɛ be `yo i sɔ like le.

¹¹ Nannan, sa nga a usali kɛ e yo i yɛ'n, ɔ ti kekle. Sran fi kwla tɛ-man su, san Nyanmiɛn Kpli yɛ ɔ kwla yo i sɔ sa liɛ nin-ɔn, yɛ kusu ɔ tran-man sran'm be afiɛn.»

¹² I osu ti, famiɛn'n fali ya dan kpa, yɛ i waan be `kun Babilɔni lɔ sa sifuɛ'm be kwlaa.

¹³ Be nga be si akunndan nun sa mun'n be kunlɛ ndɛ'n ɔ truli lika'n kwlaa. Sa sifuɛ mun be yɛ be su wa kun be yɛ. Be su kunndɛ Daniɛl nin i janvuɛ mun nan be ´kun be wie.

Nyanmiɛn yili laliɛ'n i nglo kleli Daniɛl

¹⁴ Daniɛl kannin ndɛ kleli Arzɔk b'ɔ ti famiɛn'n i sonja nga be di i gladi'm bé su kpɛn'n b'ɔ bali Babilɔni lɛ kɛ ɔ ´kun sa sifuɛ mun'n. Ɔ kɛnnin i ngwlɛlɛ su.

¹⁵ Ɔ usali Arzɔk kɛ: «?Ɔ yo sɛ ti yɛ famiɛn'n i sran'm be fɔ nga i waan ɔ ´tu'n ɔ yo sro sɔ-ɔ?» Yɛ Arzɔk tiketikeli ndɛ'n su kleli i-ɔ.

¹⁶ Yɛ Daniɛl ko toli famiɛn nin-ɔn, ɔ srɛli i kɛ ɔ mɛn i blɛ nan sɛ ɔ yo'n ɔ wa tu laliɛ'n i bo kle i.

¹⁷ I sin Daniɛl ɔli i awlo ɔ ko kannin ndɛ sɔ'n i kwlaa kleli i janvuɛ Anania, nin Mikaɛl, ɔ nin Azaria.

¹⁸ Ɔ seli be kɛ be `srɛ Nyanmiɛn b'ɔ o nglo lɔ b'ɔ ti aklunyefuɛ'n, nan ɔ `yi nvialiɛ nun sa sɔ'n i nglo `kle be kɛ ɔ ´yo nan b'a kun-man be nin Babilɔni lɔ sa sifuɛ mun'n ti.

¹⁹ Kpɛkuun Nyanmiɛn yili nvialiɛ nun sa sɔ'n i nglo kleli Daniɛl aolia nun kɔnguɛ afiɛn. Nan Daniɛl ɔ'a la Nyanmiɛn b'ɔ o nglo lɔ'n i ase.

²⁰ Ɔ mɛnmɛnnin i seli kɛ: «Man be la Nyanmiɛn i ase titi, nán be yaci i le! Ngwlɛlɛ'n nin fanngan'n be ti i liɛ.

²¹ I yɛ ɔ kaci blɛ'n nin sa nga be ju mun-ɔn, i yɛ ɔ yi famiɛn mun bia'n su-ɔ, i yɛ ɔ fa famiɛn mun sie bia'n su-ɔ. I yɛ ɔ man sa sifuɛ'm be akunndan nin-ɔn, i yɛ ɔ man ngwlɛlɛfuɛ'm be wun sa'm be wlɛ nin-ɔn.

²² I yɛ ɔ yi sa nga bé bo ti kploun'n nin nvialiɛ nun sa'm be nglo-ɔ. I yɛ ɔ si like ng'ɔ fia aosin nun nin-ɔn, afin lika ng'ɔ kpaja weiin sin yiɛ i .

²³ Min nannan'm be Nyanmiɛn, n ´la wɔ ase, m ´manman wɔ sa wlɛ wunlɛ nin wunmiɛn bɔ a mannin min'n ti. A fali like nga e srɛli wɔ'n a kleli min, a kle ye like nga famiɛn'n kunndɛ kɛ ɔ ´si i'n.»

²⁴ Kɛ ɔ yoli sɔ'n, Daniɛl ɔli Arzɔk bɔ famiɛn'n seli kɛ ɔ `kun Babilɔni lɔ sa sifuɛ mun'n i wun lɔ. Kɛ ɔ juli lɔ'n, ɔ seli i kɛ: «Nán kun Babilɔni sa sifuɛ mun. Dun mmua min nyrun nan e wɔ famiɛn'n wun lɔ, nan n `ko tu i laliɛ'n i bo m mɛn i.»

²⁵ Arzɔk fɛli i ɔli famiɛn'n nyrun lɔ trɛlɛlɛ, nan ɔ'a se famiɛn'n kɛ: «Nannan, be nga bɔ a man be trali be Zida mɛn'n nun lɔ bali'n, m'an wun kun be nun b'ɔ kwla tu ɔ laliɛ'n i bo.»

Like ng'ɔ ti kɛ waka sran sa'n bɔ i ja'm be sɔ-man'n i ndɛ

²⁶ Famiɛn'n usali Daniɛl bɔ be flɛ Bɛltsazar'n kɛ: «?A ´kwla kanngan laliɛ nga n cɛnnin'n kle min, yɛ a kwla tu i bo?»

²⁷ Daniɛl tɛli i su kɛ: «Nannan, wunnzue yifuɛ fanunfanun'm be wie fi kwla yi-man nvialiɛ nun sa sɔ nga a kɛn i ndɛ lɛ'n i nglo kle-man wɔ.

²⁸ Sanngɛ nglo lɔ, Nyanmiɛn kun wo lɔ i yɛ ɔ tike nvialiɛ nun sa'm be su-ɔ. Nannan Nɛbikadnɛzar, Nyanmiɛn sɔ'n yɛ ɔ su fa sa ng'ɔ wa ju blɛ ng'ɔ ´ba lɔ nun'n kle wɔ-ɔ. Kɛ a ´lafi'n, laliɛ nga a cɛnnin'n yɛ.

²⁹ Nannan, kɛ a lali'n, a cɛnnin blɛ ng'ɔ wa ba lɔ'n i su laliɛ. Kpɛkuun sran ng'ɔ yi nvialiɛ nun sa'm be nglo'n ɔ fali sa ng'ɔ wa ju'n kleli wɔ.

³⁰ Sɛ Nyanmiɛn yili sa sɔ'n i nglo kleli min'n nán kɛ min ngwlɛlɛ'n tra sran'm be kwlaa be liɛ'n ti-ɔ. Sanngɛ kɛ ɔ ´yo nan b'a tu laliɛ'n i bo b'a kle wɔ, nan w'a si like ng'ɔ sanngan wɔ akunndan'n, i ti yɛ ɔ yoli i sɔ-ɔ.

³¹ Nannan, kɛ a ´cɛn laliɛ'n, a wunnin like wie, ɔ ti kɛ waka sran sa. Ɔ ti kpandangblauun kpa, yɛ ɔ ti nyannyan kpa ekun. Ɔ jin nglo ɔ nyrun lɛ, ɔ ti sroesroe kpa.

³² I ti'n ti sika ɔkwlɛ jrɛiin, i wue'n nin i sa'm be ti jɛtɛ ufue, i ku'n nin i sɔwa'm be ti aaba,

³³ i ja'm be ti blalɛ, i ja ngbabua'm be bue ti blalɛ yɛ be bue ti wufa.

³⁴ A o lɛ a ´niɛn i siin kpɛkuun yɛbuɛ kun, bɔ nán sran yɛ ɔ toli'n, ɔ fɛ i oka su lɔ vii ɔ wa finnin i ja ngbabua bɔ be ti blalɛ nin wufa'n, nan b'a fufu.

³⁵ Kɛ ɔ yoli sɔ'n, i blalɛ o i aaba o, i jɛtɛ ufue o, i sika ɔkwlɛ o, be kwlaa be fufuli kpɛ kunngba, be kacili ndutre. Aunngban'n mannin be su kɛ ɔ fa man ble ja'n su sa, ɔ fitali be ɔli, b'a wun-man be osu mlɔnmlɔn kun. Sanngɛ yɛbuɛ b'ɔ wa finnin like ng'ɔ ti kɛ waka sran sa'n, ɔ kacili oka dan kpa kun, yɛ ɔ dili asiɛ wunmuan'n .

³⁶ Nannan, laliɛ nga a cɛnnin'n yɛ ɔ o lɛ-ɔ. Siɛn'n, i bo'n yɛ.

³⁷ A ti famiɛn'm be famiɛn, afin nglo-nglo lɔ Nyanmiɛn'n man a sie mɛn'n, ɔ mannin wɔ tinmin, nin wunmiɛn, ɔ nin anyrunnyan.

³⁸ Ɔ fali sran mun, nin nnɛn mun, ɔ nin anunman mun wlali ɔ́ sa nun. Lika kwlaa nga be o lɛ'n, wɔ yɛ a ti be min nin-ɔn. Like ng'ɔ ti kɛ waka sran sa'n, i ti'n b'ɔ ti sika ɔkwlɛ'n yɛlɛ wɔ .

³⁹ Ɔ sin famiɛn kun wa jaso su, i sielɛ'n su ju-man ɔ liɛ'n nun. Famiɛn nsan su'n wa jaso su ekun, i nzɔliɛ yɛlɛ aaba'n. Ɔ ´sie asiɛ wunmuan'n.

⁴⁰ Famiɛn nnan su wa ba ekun. I sielɛ liɛ'n ɔ wa yo kekle kpa. I nzɔliɛ liɛ'n yɛlɛ blalɛ'n. Kɛ blalɛ'n fa fufu ninnge wafa-wafa'n kwlaa nun bɔ be kaci sanmlɛn'n, kɛ famiɛn sɔ'n i sielɛ'n ɔ wa yo sɔ-ɔ. Ɔ wa tin famiɛn kun nga'm be su, yɛ ɔ ´kpi be sielɛ liɛ'n i ase.

⁴¹ A wunnin kɛ like sɔ'n i ja ngbabua nin i ja mma'm be bue ti wufa, yɛ be bue ti blalɛ. I bo'n yɛlɛ kɛ famiɛn sɔ'n i mɛn b'ɔ sie i'n i nun wa bubu. Sanngɛ i sielɛ sɔ'n i bue wa yo cinnjinnjin kɛ blalɛ sa, afin a wunnin kɛ blalɛ nin wufa be sanngan-sanngan nun.

⁴² I ja mma bɔ be bue kun ti wufa'n, bɔ be bue kun ti blalɛ'n be kle kɛ famiɛn sɔ'n i mɛn'n b'ɔ sie'n i bue kun ´nyan fanngan yɛ i bue kun ´yo fakafaka.

⁴³ Be kle ekun kɛ famiɛn wie'm be wa ja bé wun bla, sanngɛ be su di-man anuansɛ kɔ-man mmua. Ɔ ´yo kɛ blalɛ bɔ be kwla fa sanngan-man wufa nun'n sa.

⁴⁴ Famiɛn sɔ'm be blɛ su'n, Nyanmiɛn b'ɔ o nglo lɔ'n ɔ ´sie famiɛn diwlɛ kun b'ɔ su saci-man le, yɛ mɛn uflɛ su sie-mɛn i le. Famiɛn diwlɛ sɔ'n ɔ ´nunnun famiɛn diwlɛ kun nga mun, kpɛkuun i bɔbɔ ɔ ´ka lɛ tititi .

⁴⁵ I nyanndra yɛlɛ yɛbuɛ nga bɔ nán sran yɛ ɔ toli-ɔ, b'ɔ fɛ i oka'n su lɔ vii ɔ wa fufuli blalɛ, nin aaba, nin wufa, nin jɛtɛ ufue, ɔ nin sika ɔkwlɛ'n be nun bɔ be kacili sanmlɛn'n. Nannan, Nyanmiɛn Kpli'n fali sa nga be wa ju'n kleli wɔ. Ɔ laliɛ'n ɔ ti sa nga be wa ju'n be nglo yilɛ sakpa, yɛ i bo nga n ´tu kle wɔ yɛ'n kusu, bu i nanwlɛ, yɛ lafi su.»

⁴⁶ Kpɛkuun famiɛn Nɛbikadnɛzar kotoli yɛ ɔ utuli i nyin ase Daniɛl bo lɛ, yɛ ɔ seli kɛ be `yi sraka be mɛn i, nan be `yi ayre fannin sraka mun be mɛn i ekun.

⁴⁷ I sin ɔ seli Daniɛl kɛ: «Nanwlɛ o, amun Nyanmiɛn'n yɛ ɔ o nglo lɔ nin-ɔn. I yɛ ɔ ti famiɛn'm be Min nin-ɔn. I yɛ ɔ tike sa nga be ti fiawa'n be su-ɔ, afin a kwla tikeli nvialiɛ nun sa nga'm be su kleli min .»

⁴⁸ I sin famiɛn'n mannin Daniɛl i sa su dan, yɛ ɔ mɛnnin i ninnge kpakpa kaka kpa. Ɔ fali Babilɔni akpasua'n mɛnnin i kɛ ɔ sie i. Ɔ sieli i ekun kɛ ɔ `yo ngwlɛlɛfuɛ nga be o Babilɔni lɔ'n be kwlaa be su kpɛn.

⁴⁹ Daniɛl srɛli famiɛn'n kɛ ɔ `fa Babilɔni akpasua'n ɔ `man Sadrak, nin Mesak, ɔ nin Abɛd-Nego kɛ be `nian su. Famiɛn kplinnin su. Daniɛl bɔbɔ liɛ'n, ɔ trannin famiɛn'n i awlo lɔ, ɔ yoli i mantanfuɛ.