Daniɛl 11 - NYANMIƐN NDƐ'N 1998

¹ «Anz Mikaɛl sɔ'n, m bɔbɔ n ukɛli i, yɛ n suɛnnin i bo afuɛ klikli bɔ Dariis b'ɔ ti Medifuɛ'n ɔ trannin famiɛn bia'n su'n.

² Siɛn'n n wa kan nanwlɛ ndɛ'n n kle wɔ.» «Famiɛn nsan be wa kaci be wiengu Pɛrs mɛn'n su. I sin famiɛn nnan su b'ɔ wa ba'n ɔ wa nyɛn i wun kpa tra be nga be dun mmua i nyrun'n. Blɛ bɔ i anyanbeun ninnge'm be wa mɛn i wunmiɛn'n, ɔ wa yo i kwlaa ng'ɔ kwla yo'n nan ɔ nin Grɛk mɛn'n b'a kun'n.

Siri famiɛn'm be nin Ezipt famiɛn'm be alɛ kunlɛ ndɛ

³ Sanngɛ yasua sran kun wa jaso su Grɛk mɛn'n nun lɔ, ɔ wa yo famiɛn. Ɔ wa nyan nyrun dan. Like kwlaa nga i waan ɔ ´yo'n yɛ ɔ ´yo-ɔ.

⁴ Ɔ nin i sɔ'n kwlaa'n, kɛ ɔ ko nyan manndran'n, i kwlalɛ b'ɔ kwla'n ɔ ´wie, i famiɛn diwlɛ'n i nun wa bubu nnan. Nɛ́n i osu'n nun sran yɛ ɔ ´trɛn i ja nun-ɔn. Sran ngbɛn mun yɛ be wa fa lika nin-ɔn. Sanngɛ be wunmiɛn liɛ'n su ju-man kɛ i liɛ'n sa.

⁵ Sran ng'ɔ wa yo mɛn'n i ngua wa famiɛn'n, ɔ wa nyan kwlalɛ. Sanngɛ famiɛn i awlo lɔ sran dandan ng'ɔ ´siesie be'n, be nun kun i kwlalɛ liɛ'n wa trɛ i liɛ'n. I akpasua ng'ɔ ´sie i'n, ɔ wa cɛn trɛ i liɛ'n.

⁶ Kɛ ɔ di afuɛ nnyɔn kun'n, bé nuan wa sɛ. Famiɛn ng'ɔ o ngua wa'n, i wa bla'n ɔ wa ja famiɛn ng'ɔ o nglo lɔ'n yɛ be afiɛn'n ´sɛ. Sanngɛ bla sɔ'n, i kwlalɛ b'ɔ lɛ i'n ɔ su cɛ-mɛn i sa nun. I wun'n su tran-man nguan nun yɛ i mma'm be kusu be ´wu. I blɛ sɔ nun'n bla'n ɔ ´wu wie. I wunfuɛ'm be kwlaa, i si o, i wun o, be ´wu.

⁷ I awlo nunfuɛ'm be nun kun yɛ ɔ wa sin i si i ajalɛ nun-ɔn. Ɔ ´kɔ lele ɔ ´ju nglo lɔ famiɛn i sonja'm be fiawlɛ'm be nun, ɔ ´kle sonja sɔ'm be nun kpa, ɔ nin be ´kun, ɔ ´kwla be.

⁸ Yɛ be amuɛn mun nin be ninnge kpakpa bɔ be ti sika ɔkwlɛ nin jɛtɛ ufue ninnge'n, ɔ ´fa be kɔ Ezipt. I sin ɔ wa cuɛn i wun afuɛ kaka Siri famiɛn'n i wun mmua.

⁹ I sin Siri famiɛn'n ɔ ´kɔ Ezipt mɛn'n nun lɔ nan ɔ'a sɛ i sin i mɛn liɛ'n nun.

¹⁰ Nglo lɔ lika'n i famiɛn'n i mma'm be ´buabua bé wun be ´kɔ alɛ kunlɛ. Kɛ be ´kɔ sɔ'n, be ´fa alɛ kunfuɛ kaka kpa. Ba'm be nun kun nin i sonja liɛ'm be ´tra be mɛn nnyɔn'm be awɛ'n su, be ´kpa bo'n bo sa waa kɛ nzue ba wie bɔ ɔ'a yi dan b'ɔ su sonji lika'n kwlaa nun'n sa. Kɛ be ´sa bé sin be ´ba be mɛn'n nun'n, be wa utu be kpɔfuɛ'm be klɔ kun bɔ i wun ti siwa'n.

¹¹ Ezipt famiɛn'n wa yo kɛ i ti a saci i ti su sa. Ɔ nin nglo lɔ lika'n i famiɛn be ´ko kun. I kusu, ɔ ´yiɛ i alɛ kunfuɛ mun kaka kpa. Sanngɛ be kpɔfuɛ'm be ´kwla be.

¹² Ezipt famiɛn'n ɔ wa fɛ i kwlalɛ sɔ'n fa tu i wun dan kpa. Ɔ nin i sɔ'n ngba'n, kannzɛ ɔ kunnin sran kpanngban'n, ɔ su kwla-man be guɛ-mɛn i ti nin i bo.

¹³ Siri famiɛn'n wa yia sonja uflɛ mun, be kpanngban ɔ ´tra klikli liɛ mun. Kɛ ɔ di afuɛ nnyɔn kun'n, ɔ nin alɛ kunfuɛ sɔ'm be ´sa be sin be nin be alɛ ninnge ngbli-ngbli mun.

¹⁴ I blɛ sɔ nun'n, sran kpanngban be ´jaso Ezipt famiɛn'n i wun. Daniɛl, sran wie'm bɔ be o ɔ nvle'n nun'n bɔ be klo fanngan su ninnge'm be yolɛ'n, be wa jaso i wun, kɛ ɔ ´yo nan aolia nun like nga a wunnin i'n ɔ'a kpɛn su'n ti. Sanngɛ be ´tɔ.

¹⁵ Siri famiɛn'n ɔ wa ba, ɔ wa kplankplan fa kwle mun klɔ bɔ be si bé wun'n be nun kun i wun, ɔ ´fu su, ɔ ´utu klɔ sɔ'n, ɔ ´fa. Ngua wa famiɛn'n, ɔ nin i safunyrɛn'm be su jrɛn-mɛn i nyrun. Be wie fi su nyan-man manndran nan b'a jrɛn i nyrun.

¹⁶ Sran ng'ɔ ´jaso i wun kɛ ɔ nin i be ´kun'n, sa kwlaa ng'ɔ klo kɛ ɔ ´fa yo i'n yɛ ɔ ´fa yo i-ɔ. Sran fi su jrɛn-mɛn i nyrun. Ɔ wa tran mɛn ng'ɔ ti klanman tra mɛn'm be kwlakwla'n i nun, ɔ ´nunnun like ng'ɔ o nun'n kwlaa.

¹⁷ I sin, ɔ wa ba ɔ nin famiɛn diwlɛ'n nun alɛ ninnge dandan'n kwlaa. Ɔ wa yo i wun kɛ sa fi nun-mɛn i klun sa. Ɔ wa fɛ i wa bla'n ´fa man Ezipt famiɛn'n, kɛ ɔ ´yo nan ɔ'a nyan famiɛn sɔ'n nan ɔ'a nunnun i mɛn'n ti. Sanngɛ i gblɛ sɔ'n ɔ su yo-man ye.

¹⁸ I sin ɔ wa kpɛ i nyin lika nga be o jenvie'n i afiɛn lɔ'm be su. Ɔ wa kwla be nun kpanngban kpa, sanngɛ sonja'm be kpɛnngbɛn kun wa bu i bue, yɛ nzowa ng'ɔ kpɛli'n, be wa tannin i kalɛ be ´mɛn i.

¹⁹ Siri famiɛn'n ɔ wa kpɛ i nyin i bɔbɔ i klɔ nga bɔ be sili be wun'n be su. Sanngɛ ɔ wa bo nvaka, kpɛkuun ɔ wa tɔ. I agualiɛ su'n, ɔ wa mlin, be su wun-mɛn i kun.

²⁰ Sran ng'ɔ wa kaci i'n, ɔ ´fa famiɛn wlɛfuɛ kun yɛ ɔ ´fa sie i famiɛn diwlɛ'n i akpasua klanman kpafuɛ'n su-ɔ. I bɔbɔ'n ɔ su di-man le nnyɔn, be ´bu i bue. Nán kɛ ya annzɛ alɛ yɛ be ´fa bu i bue-ɔ.

²¹ Sran ng'ɔ wa ´trɛn i ja nun'n, ɔ ´yo sran kun b'ɔ lɛ-man nyrun bɔ be fa famiɛn bia'n be mɛn i-ɔ. Kɛ lika'n ti fɔun'n, bian sɔ'n ɔ wa fa gblɛ yɛ ɔ de famiɛn bia nin-ɔn.

²² Alɛfuɛ fi su kwlɛ-mɛn i, ɔ ´nunkun be kwlaa kpɛkuun ɔ ´kun anuansɛ nga be di i nvle'n nun'n i su kpɛn'n.

²³ Blɛ nga sran'm be ko fa bé bo be ko blɛ i'n, ɔ ´fa gblɛgblɛ'n lele ɔ ´fa de mɛn'n. Kannzɛ bɔ sran nga be jin i sin'n b'a sɔn-man'n, sanngɛ i wunmiɛn'n wa yo dan kɔ i nyrun.

²⁴ Kɛ lika'n ti fɔun'n, ɔ kɔ lika kpa bɔ be yo i nun like-ɔ ɔ yo ye'n be nun. Ɔ ´yo like nga i si nin i nannan'm b'a yo-man'n. Ɔ ´fɛn lika sɔ'm be nun ninnge mun, ɔ ´cɛcɛ ninnge nga be fɛnnin'n, nin anyanbeun ninnge mun ´fa mɛn i sran liɛ mun. Ɔ wa bu akunndan kɛ ɔ ´fa alɛ'n lele ɔ ko kpu sran'm be fiawlɛ klɔ'm be su. Sanngɛ i kwlaa sɔ'n ɔ su cɛ-man.

²⁵ Ɔ ´dun mmua i sonja kpanngban'm be nyrun. I wunmiɛn nin anwlɛn b'ɔ lɛ i'n ti, ɔ nin Ezipt famiɛn'n be ´kun. Ezipt famiɛn'n ɔ ´fɛ i wun wla alɛ'n nun, ɔ nin i sonja mun yɛ be ´kɔ-ɔ. Be ´sɔn kpa, yɛ be wunmiɛn'n ´yo dan kpa. Sanngɛ Ezipt famiɛn'n su nyan-man jranwlɛ, afin be ´cici i wun ndɛ.

²⁶ Be nga be nin i wla asa talie kunngba nun'n, be ´yi i ase. Be ´kwlɛ i sonja mun, be nga be ´wu'n, be su di-man be yalɛ.

²⁷ Famiɛn nnyɔn'm be ´kunndɛ kɛ be ´yo be wiengu tɛ. Blɛ bɔ be wo aliɛ'n sin'n, ato ngunmin yɛ be ´bua kle be wiengu-ɔ. Sanngɛ sa fi su ju-man. Afin kɛ ɔ ´yo sɔ'n, wuun blɛ kasiɛn'n nian ju-man ka.

²⁸ Kɛ Siri famiɛn'n ɔ ´sɛ i sin i mɛn'n nun lɔ'n, ɔ ´fa anyanbeun ninnge kpanngban kpa yɛ ɔ ´kɔ-ɔ. I klun su jɔ-man Nyanmiɛn i nvle'n nun sran'm be wun. Ɔ man ɔ ´bu be sacilɛ akunndan. Ɔ ´saci be nan ɔ'a sɛ i sin ɔ'a wɔ i mɛn'n nun.

²⁹ Kɛ blɛ nga be sieli'n ko ju'n, nglo lɔ famiɛn'n ɔ ´sɛ i sin Ezipt famiɛn'n i mɛn'n nun wa ekun. Sanngɛ balɛ kasiɛn liɛ nga su yo-man kɛ klikli liɛ'n sa.

³⁰ Sran wie'm be ´fin wia atɔliɛ lɔ, be ´ba mmeli nun, be nin i be wa kun. I sa sin ɔ ´bubu i, kpɛkuun ɔ ´sɛ i sin. Ɔ wa fa ya dan kpa ekun. Ɔ ´fɛ i ya'n ɔ gua Nyanmiɛn i nvle'n nun sran'm bé su. Sanngɛ ɔ nin be nga be ´jaso Nyanmiɛn i sin'n, bé bo ´yo kun.

³¹ Ɔ ´sunman sonja wie mun, be wa fa Nyanmiɛn i sua'n be ´yo i fiɛn. Tɛ nga be yi fa man Nyanmiɛn cɛn kwlakwla'n, be ´tannin i atin. Be ´fa like sacifuɛ'n i tete like'n be ´sie i Nyanmiɛn sɔwlɛ'n su .

³² Famiɛn sɔ'n, i bɔbɔ ɔ ´lakalaka be nga be ´jaso Nyanmiɛn i sin'n. Sanngɛ be kwlaa nga be o Nyanmiɛn sin'n, be ´jran kekle.

³³ Nvle'n nun ngwlɛlɛfuɛ'm be ´kle sran kpanngban be like. Blɛ kaan sa nun'n, sran wie'm be ´kun wie mun, be ´yra wie mun, yɛ be ´wla wie'm be bisua. Kwlaa nan b'a yo be sɔ'n, be ´dun mmua fɛn bé bo ninnge mun.

³⁴ Yalɛ klelɛ sɔ nun'n, be ukafuɛ'm be su sɔn-man, afin be nga be ´jran bé sin'n, be ´yo i bé nuan bui su.

³⁵ Be ´kun ngwlɛlɛfuɛ'm be nun sran kpanngban. Be wulɛ'n ɔ ´yo nvle nunfuɛ'm be saun, ɔ ´yo be jrɛiin, yɛ ɔ ´yo be weiin, lele awieliɛ'n ´fa ju. Afin kɛ ɔ ´yo sɔ'n, wuun awieliɛ'n nian ju-man.

³⁶ Nga famiɛn'n klo kɛ ɔ ´yo'n yɛ ɔ ´yo-ɔ. Ɔ ´yo wun tufuɛ, ɔ ´se i wun kɛ ɔ ti dan tra amuɛn'm be ngba. I ti ɔ wa kan Nyanmiɛn Kpli'n i wun ndɛ tɛtɛ kpa nga be kan-man'n. Ɔ ´nyan jranwlɛ lele ´fa ju cɛn bɔ Nyanmiɛn i ya'n ɔ ´tɛ nglo'n. Kpɛkuun Nyanmiɛn wa yo nga i waan ɔ ´yo'n .

³⁷ Famiɛn'n i nyin su yi-man amuɛn nga i nannan'm be sɔ be'n, yɛ amuɛn kun, ng'ɔ ti bla'm be anwlɛn su like dan'n ɔ su bu-mɛn i like fi. Afin ɔ wa se i wun kɛ ɔ ti dan tra amuɛn'm be kwlakwla, i nyin su yi-man wie fi.

³⁸ Amuɛn ng'ɔ wa sɔ'n, yɛlɛ fiawlɛ klɔ'm be amuɛn'n. Amuɛn sɔ'n i nannan'm b'a si-mɛn i. Ɔ ´fa sika ɔkwlɛ, nin jɛtɛ ufue, nin yɛbuɛ kpakpa mun, ɔ nin ninnge wie bɔ be lɛ nyrun'n fa mɛn i.

³⁹ Mɛn wie nun amuɛn sɔ'n yɛ ɔ ´fa yɛ ɔ nin be nga be klɔ'm be wun ti siwa'n be ´kun alɛ nin-ɔn. Be nga be kplin su kɛ be ´sɔ amuɛn sɔ'n, ɔ man be ´nyan nyrun, kpɛkuun ɔ ´kpa be sie sran kpanngban kpa bé su kpɛnngbɛn, ɔ ´fa asiɛ'n cɛcɛ be kɛ be akatua sa.

⁴⁰ Blɛ'n i awieliɛ lɔ'n, Ezipt famiɛn'n ɔ nin i be ´kun, yɛ Siri famiɛn'n kusu wa fa kakaklolo mun, nin nnɛn kpanngɔ mun, nin mmeli kaka kpa ɔ ´ba kɛ aunngban dan sa. Ɔ ´fa i sonja'm be ´wlu mɛn kaka nun, be ´kpɛ mɛn'm be anyialiɛ mun kɛ nzue bɔ ɔ'a yi dan b'ɔ su sonji'n sa.

⁴¹ Ɔ ´fa mɛn ng'ɔ ti klanman tra mɛn'm be kwlakwla'n, ɔ ´kun lɛ sran kpanngban kpa. Sanngɛ Edɔmfuɛ mun, nin Moabfuɛ mun, ɔ nin Amɔnfuɛ'm be safunyrɛn dandan'm be ´nyan bé ti, ɔ su nyan-man be.

⁴² Ɔ ´sie mɛn kpanngban kpa, Ezipt mɛn'n su fite-man nun.

⁴³ Ɔ ´fa Ezipt lɔfuɛ'm be anwlɛn su ninnge mun, be sika ɔkwlɛ o, be jɛtɛ ufue o, be ninnge nga bé gua ti dandan mun o, ɔ ´fa be. Ɔ ´sie Libifuɛ mun nin Etiopifuɛ mun.

⁴⁴ Sanngɛ ndɛ nga be ´fin wia afiliɛ lika'n nun lɔ nin nglo lɔ be ba'n, be wa wlɛ i srɛ dan kpa. Ɔ ´fa ya kpa, ɔ man ɔ ´ko kun sran kpanngban kpa.

⁴⁵ Ɔ ´kplɛn i tannin sua mun jenvie'n nin Nyanmiɛn i oka b'ɔ o mɛn bɔ i klanman'n lɛ-man wunsu'n be afiɛn. Lɛ yɛ wie'n ɔ wa fɛ i-ɔ, sran fi su ukɛ-mɛn i.»