Daniɛl 10 - NYANMIƐN NDƐ'N 1998

Daniɛl i aolia nun like wunlɛ'n i nsan su'n: anz b'ɔ kan sa nga be wa ju'n

¹ Siris b'ɔ ti Pɛrs famiɛn'n i sielɛ'n i afuɛ nsan su'n, Nyanmiɛn kannin ndɛ kun kleli Daniɛl b'ɔ suan Bɛltsazar'n. Ndɛ sɔ'n ti nanwlɛ. Ɔ kan alɛ dan kpa kun b'ɔ wa tɔ'n i ndɛ. Daniɛl buli i akunndan kpa yɛ ɔ wunnin i bo. Aolia nun like b'ɔ wunnin i'n ti yɛ ɔ wunnin i bo nin-ɔn .

² «I blɛ sɔ nun'n, m bɔbɔ min Daniɛl, n trannin sɛnvuɛ tranlɛ sɔ lele le mɔcuɛ klonglo nsan.

³ N di-man aliɛ fɛfɛ fi. Nnɛn nin nzan fi ɔ'a kan-man mín nuan. M'an kpakpa-man lele le mɔcuɛ nsan sɔ'n ɔ wieli.

⁴ Anglo klikli'n i cɛn ba ablaɔn-nin-nnan su'n, n wo nzue dan nga be flɛ i Idekɛl'n i nuan lɛ.

⁵ M ´man mín nyin'n su-ɔ, sran kun yɛ ɔ o yɛ: lɛn tralɛ yɛ ɔ wlɛ i wun-ɔn, cisu bɔ be fa sika ɔkwlɛ jrɛiin yoli'n i kun ci i afiɛn.

⁶ I wunnɛn'n fa yɛbuɛ kpakpa'n i wie. I nyrun'n kpaja nyannyan kɛ nyanmiɛn'n i sin b'ɔ kpa'n sa. I nyinma'm be ti kɛ tɛ bɔ b'a sɔ i nuan'n sa. I sa nin i ja'm be ti nglannglan kɛ aaba bɔ i wun ti treketreke'n sa. I aniɛn'n tɛ kɛ sran kaka yɛ be su ijɔ sa .

⁷ Min Daniɛl, min ba kunngba yɛ n wunnin sran sɔ nin-ɔn. Be nga be sin yia min lɛ'n b'a wun-man like fi. Sanngɛ srɛ b'ɔ kun be'n ti be wanndi ko fiali.

⁸ Min ba kunngba yɛ n kali lɛ yɛ n wunnin aolia nun like dan sɔ nin-ɔn. Min wunmiɛn'n wieli. Min nyrun'n kacili, ɔ kpali sa fuaii, n lɛ-man wunmiɛn kun.

⁹ N tili sran sɔ'n i ndɛ ng'ɔ kan be'n. I aniɛn b'ɔ tɛ'n ti, mín nyrun bluli, n tɔli yɛ n utuli n nyin ase.

¹⁰ Kpɛkuun sran sa kun kannin min, ɔ mannin min su. N kotoli nan m'an fuafua min sa ase, kɛ ɔ ´yo sɔ'n, wuun n ´usu.

¹¹ Yɛ ɔ seli min kɛ: ‹Daniɛl, wɔ bɔ a ti Nyanmiɛn i anwlɛn su sran'n, mian ɔ́ nyin nan wun ndɛ nga n wa kan kle wɔ yɛ'n i bo. Jaso jran nglo, afin ɔ́ sin yɛ be sunmannin min yɛ.› Kɛ ɔ seli min sɔ'n, n jasoli, wuun n ´usu.

¹² Ɔ seli min ekun kɛ: ‹Daniɛl, nán srɛ kun wɔ! Kɛ ɔ fin i cɛn klikli bɔ a kannin ɔ́ wun ase ɔ Nyanmiɛn'n i nyrun'n, bɔ a nyannin anwlɛn kɛ a ´kunndɛ sa nga be juli'n bé bo'n, Nyanmiɛn tili ɔ srɛlɛ'n, kpɛkuun n kusu n fali atin'n kɛ n ´fɛ i su tɛlɛ'n n fa blɛ wɔ.

¹³ Sanngɛ wawɛ ng'ɔ sasa Pɛrs famiɛn diwlɛ'n, ɔ buli min nyrun cɛn ba ablaɔn-nin-kun. Mikaɛl b'ɔ ti anz dan kun'n, ɔ wa ukali min. Yɛ n kali Pɛrs famiɛn'm bé wun lɛ lɔuun.

¹⁴ M bali kɛ n wa fa like ng'ɔ wa ju ɔ nvle'n su blɛ ng'ɔ ´ba lɔ'n nun'n n kle wɔ. Afin a wa wun aolia nun like uflɛ b'ɔ ti blɛ sɔ'n nun lɔ ndɛ.›

¹⁵ Kɛ ɔ ´kan ndɛ sɔ mun kle min'n, wuun m'an kan mín ti ase, n ti sɔ kouun.

¹⁶ Kpɛkuun like kun ti kɛ klɔ sran sa ɔ kannin mín nuan bui'n. N ukeli mín nuan'n n seli sran ng'ɔ jin min nyrun lɛ'n kɛ: ‹Nannan, aolia nun like'n ɔ boli mín wla, i yɛ ɔ yoli yɛ man fanngan fi nun-man min nun kun nin-ɔn.

¹⁷ ?Ɔ ´yo sɛ nan min bɔ n ti-man like fi'n min nin wɔ bɔ a ti min Min'n y'a ijɔ? Afin kɛ n wo yɛ'n, n lɛ-man fanngan, yɛ n de-man wunmiɛn bɔbɔ.›

¹⁸ Kpɛkuun like nga n wunnin i b'ɔ ti kɛ klɔ sran sa'n, ɔ kannin min ekun nan ɔ'a man min wunmiɛn.

¹⁹ Yɛ ɔ seli min kɛ: ‹Nyanmiɛn i anwlɛn su sran, nán srɛ kun wɔ. Man ɔ́ wun jɔ wɔ fɔuun. Tra wɔ anwlɛn, man ɔ wunmiɛn'n bla.› Kɛ ɔ ´kan ndɛ'n kle min sɔ'n, kpɛkuun min wunmiɛn'n bali min nun. Yɛ n seli i kɛ: ‹Nannan, sɛ ɔ waan a ´kan ndɛ'n kan, afin w'a man min wunmiɛn.›

²⁰ Ɔ seli min kɛ: ‹?A si sa nga ti yɛ m ba ɔ sin'n? M bali kɛ n wa kan sa nga be klɛli i nanwlɛ fluwa'n nun'n n ´kle wɔ. Ng'ɔ o lɛ ekun'n, yɛlɛ kɛ min nin wawɛ ng'ɔ sasa Pɛrs mɛn'n e su ko kun. Kɛ n wa kɔ cɛ'n, wawɛ ng'ɔ sasa Grɛk mɛn'n ɔ wa ba.

²¹ Sran fi su uka-man min nan e nin kpɔfuɛ sɔ mun y'a kun, san anz Mikaɛl b'ɔ ti Izraɛl i sasafuɛ'n yɛ ɔ ´uka min-ɔn.› »