Daniɛl 1 - NYANMIƐN NDƐ'N 1998

Daniɛl nin i janvuɛ'm be Babilɔni lɔ kɔlɛ ndɛ

¹ Kɛ Zozakim b'ɔ ti Zida famiɛn'n ɔ trannin bia'n su'n, i afuɛ nsan su'n, Nɛbikadnɛzar b'ɔ ti Babilɔni famiɛn'n, ɔ nin i sonja'm be bali kɛ be nin Zerizalɛmfuɛ'm be ´kun. Be kpɛli be ngblaliɛ'n sin yiali klɔ'n.

² Anannganman fali Zozakim b'ɔ ti Zida famiɛn'n wlali i sa nun, yɛ Nɛbikadnɛzar fali Nyanmiɛn i sua'n nun lɔ ninnge bɔ sika ɔkwlɛ ɔ nin jɛtɛ ufue yɛ be fa yoli be'n, be nun wie mun. Ɔ fali be ɔli Babilɔni mɛn'n nun lɔ. Yɛ ɔ sieli ninnge sɔ mun kan ɔ guɛ i amuɛn mma'm be ninnge liɛ'm be lɔ'n .

³ Nɛbikadnɛzar wlali i junman difuɛ'm be su kpɛn nga be flɛ i Aspɛnaz i su nun kpa kɛ ɔ `kpa Izraɛl gbanflɛn nga be ti famiɛn ba annzɛ diewa ba mun, nan ɔ fa be bla .

⁴ I waan man be yo gbanflɛn bɔ fɔ kaan sa nun-man be wunnɛn'n su, bɔ be nyrun'n ti klanman, bɔ be ti akunndanfuɛ nin ngwlɛlɛfuɛ mun, bɔ be si like, bɔ be kwla di junman i awlo nun'n. I waan be `kle be Babilɔnifuɛ'm be aniɛn'n nin be fluwa'n.

⁵ Ɔ seli be kɛ be `man be i bɔbɔ i aliɛ ng'ɔ di'n nin i bɔbɔ i nzan ng'ɔ nɔn'n wie. I waan be `kle be fluwa lele afuɛ nsan kɛ ɔ ´yo nan b'a kwla di junman b'a mɛn i'n ti.

⁶ Daniɛl , nin Anania, nin Mikaɛl, ɔ nin Azaria bɔ be fin Zida akpasua'n su'n be o be nun wie.

⁷ Famiɛn'n i junman difuɛ'm be su kpɛn'n tɔnnin be dunman uflɛ. Daniɛl liɛ'n yɛlɛ Bɛltsazar, Anania liɛ'n yɛlɛ Sadrak, Mikaɛl liɛ'n yɛlɛ Mesak, yɛ Azaria liɛ'n yɛlɛ Abɛd-Nego.

⁸ Daniɛl waan sɛ be ´wu be ´ba o, i liɛ'n, ɔ su di-man famiɛn'n i aliɛ ng'ɔ di'n wie, yɛ ɔ su nɔn-mɛn i nzan ng'ɔ nɔn'n wie nan ɔ'a yo fiɛn . Ɔ srɛli famiɛn'n i junman difuɛ'm bé su kpɛn'n kɛ nán man ɔ miɛn i kɛ ɔ di aliɛ sɔ'n nan ɔ yo fiɛn.

⁹ Nyanmiɛn man junman difuɛ'm bé su kpɛn'n yoli Daniɛl ye, yɛ ɔ sili i aunnvuɛ.

¹⁰ Junman difuɛ'm bé su kpɛn'n seli Daniɛl kɛ: «Nannan bɔbɔ yɛ ɔ kleli aliɛ ng'ɔ fata kɛ amun di nin nzan ng'ɔ fata kɛ amun nɔn nin-ɔn. N sro nannan, afin sɛ ɔ wa wun kɛ amu'an yo kokloo'n nan gbanflɛn kun nga mun bɔ be nin amun sɛ tukpɛ'n be wunnɛn o nun'n, amun dunman nun ti famiɛn man be ´kpɛ n ti'n.»

¹¹ Junman su kpɛn'n fɛli i bɔbɔ Daniɛl, nin Anania, nin Mikaɛl, ɔ nin Azaria wlali sran kun sa nun kɛ ɔ nian be su. Daniɛl seli sran sɔ'n kɛ:

¹² «N ´srɛ wɔ kpa ti-ɔ, sa ye cɛn ba blu nan nian. E ninnge nga e di be'n, nán nnɛn tran nun yɛ man be man e nzue ngbɛn nan e nɔn.

¹³ I sin, nian ye nan nian gbanflɛn nga be di nannan bɔbɔ i aliɛ liɛ'n wie'n. Ɔ bɔbɔ a wa wun wafa nga e wa kaci'n. I sin nga ɔ waan a yo ye'n, yo ye.»

¹⁴ Bian sɔ'n kplinnin su nan ɔ'a sa be cɛn ba blu ɔ'a nian.

¹⁵ Kɛ be wieli cɛn ba blu'n i di'n, be nyrun'n yoli mlanmlan kpɛkuun be wunnɛn bali bé wun trali gbanflɛn nga be di aliɛ kunngba nga famiɛn di'n wie'n mun.

¹⁶ I sɔ'n ti, aliɛ'n nin nzan nga be waan be ´fa man be'n, sran ng'ɔ nian be su'n ɔ yili be nun. Yɛ ɔ fa like nga nnɛn nun-man nun'n ngunmin yɛ ɔ fa man be-ɔ.

¹⁷ Nyanmiɛn mannin gbanflɛn nnan sɔ'm be sa wlɛ wunlɛ, nin aniɛn tilɛ'n i wun ngwlɛlɛ, ɔ nin akunndan dan. Daniɛl tutu aolia nun ninnge kwlaa nin laliɛ'm be kwlaa bé bo .

¹⁸ Kɛ afuɛ nsan nga famiɛn Nɛbikadnɛzar kleli kɛ be `fa gbanflɛn nga be kpali be'n be kwlaa be kle i'n ɔ juli'n, junman i su kpɛn'n ɔ fali be ɔli i nyrun lɔ.

¹⁹ Famiɛn'n nin be kwlaa be ijɔli. Kɛ ɔ niannin gbanflɛn sɔ'm be kwlaa'n, ɔ'a wun-man be nun sran kun bɔ i nyrun ba nyan kɛ Daniɛl, nin Anania, nin Mikaɛl, ɔ nin Azaria be sa-a. Yɛ be boli famiɛn i junman'n i dilɛ i bo-ɔ.

²⁰ Ndɛ kwlaa wie ala bɔ famiɛn'n usa be'n, b'ɔ fata kɛ akunndan nin ngwlɛlɛ yɛ be fa tɛ su'n, ɔ wunnin kɛ be tɛ su kpa trɛ i mɛn'n nun wunnzue yifuɛ fanunfanun'm be kwlaa lele kpɛ blu.

²¹ Daniɛl suli famiɛn'n lele juli afuɛ nga Siris yoli famiɛn'n i nun .