Kolɔsfuɛ Mun 4 - NYANMIƐN NDƐ'N 1998

¹ Amun bɔ an lɛ kanga'n, an `yo be kpa, an `yo like ng'ɔ ti su'n man be, afin an si kɛ amun kusu amun Min liɛ'n wo nyanmiɛn su lɔ.

² An `koko yalɛ kle Nyanmiɛn titi, an `fa amún wla'n kwlaa gua su yo, yɛ an `lɛ i ase.

³ Kɛ amun ´yo sɔ'n, an `srɛ Nyanmiɛn kɛ ɔ man e kusu ye atin man e kɛn i ndɛ'n yɛ e kwla kan Krist ndɛ'n bɔ Nyanmiɛn fiɛli i sran'm be nyrun'n, afin i ti yɛ man be wlali m bisua nin-ɔn.

⁴ An `srɛ i kɛ ɔ jran min sin man n kɛn i weiin kɛ n kan-an ɔ ti su'n sa.

⁵ Like nga an yo man be bɔ be ti-man Kristfuɛ'n, an `fa ngwlɛlɛ yo. Kɛ amu'an nyan amun ti'n, nán an tran lɛ ngbɛn, an `yo like ng'ɔ yo sa ye'n.

⁶ Man amun ijɔlɛ wafa'n yo sran'm be fɛ, man amún nuan nun ndɛ'n yo fɛ kɛ njin sa nan amu'an tɛ sran ng'ɔ usa amun sa'n, i su klanman.

Be like yolɛ

⁷ E niaan Tisik b'ɔ ti e sran kpa'n, b'ɔ ti n wiengu junman difuɛ kpa, bɔ e nin i di e Min'n i junman'n, ɔ wa kan sa ng'ɔ o n su'n i kwlaa kle amun.

⁸ N sunmɛnnin i amun wun lɔ nan an si sa ng'ɔ o e su'n nan ɔ gua amun anwlɛn su nzue.

⁹ N sunmɛnnin i nin e niaan Onezim b'ɔ ti amun nun kun'n, b'ɔ ti e sran kpa bɔ e kwla fa é wla guɛ i su'n. Be wa kan sa ng'ɔ o wa'n i kwlaa kle amun.

¹⁰ Aristark b'ɔ nin min o bisua'n nun wa'n ɔ nin Barnabas i niaan Mark be ´yo amun like. B'a dun mmua kɛn i ndɛ a kle amun kɛ sɛ ɔ ba amun wun lɔ'n, an sɔ i nun kpa.

¹¹ Jésus bɔ be flɛ i Zistis'n i waan ɔ ´yo amun like. Zuif'm bɔ be lafi Krist su'n be nun nsan sɔ'n be cɛ yɛ be nin min di junman nan Nyanmiɛn sie sran mun-ɔn. Be uka min dan kpa.

¹² Epafras b'ɔ ti amun nun kun'n, i waan ɔ ´yo amun like. Krist-Jésus i junman difuɛ sɔ'n ɔ miɛn i nyin srɛ Nyanmiɛn kɛ an yo sran, ɔ srɛ kɛ an wun sa ng'ɔ ti Nyanmiɛn i klun sa'n i wlɛ kpa nan an jran kekle.

¹³ Kɛ n niɛn i lele'n, n wun kɛ amun nin Laodisefuɛ mun nin Zerapolisfuɛ'm be ti ɔ fɛ dan kpa.

¹⁴ Lik b'ɔ ti dɔɔtrɔ'n b'ɔ ti e sran kpa'n ɔ nin Demas be waan be ´yo amun like.

¹⁵ N ´yo e niaan nga be o Laodise'n be like, yɛ n ´yo Nɛnfas nin asɔnunfuɛ nga be yiɛ i awlo lɔ'm be like.

¹⁶ Sɛ an wie fluwa sɔ'n kanngan'n, an `fa ko man Laodisefuɛ mun man be kusu be kanngan be liɛ be asɔnun'n nun, yɛ amun kusu an `kanngan nga Laodisefuɛ'm be wa fa blɛ amun'n.

¹⁷ An `se Arsip kɛ ɔ nian junman nga e Min'n fɛ i sieli i su'n su kpa, an se i kɛ ɔ `nian nun di i kpa.

¹⁸ N ´yo amun like. M bɔbɔ m Pɔl yɛ m'an fa n sa m'an klɛ ndɛ kpe kaan nga fuɛ nin-ɔn. Nán amún wla fi kɛ n tɛ o bisua nun'n. N ´yra min nuan kɛ an `nyan ye!