Kolɔsfuɛ Mun 3 - NYANMIƐN NDƐ'N 1998

¹ I sɔ'n ti'n, sɛ amun nin Krist yɛ an cɛnnin'n, an `kunndɛ nyanmiɛn su lɔ ninnge mun, Krist ti Nyanmiɛn i fama su lɔ .

² An `bu nglo lɔ ninnge'm be akunndan, nán an bu asiɛ'n su wa liɛ'm be akunndan,

³ afin an wuli, ɔ man olɛ nga an wo lɛ ndɛ'n, an wo Nyanmiɛn sa nun, afin ɔ'a fa amun nin Krist a fiɛ i wun lɔ.

⁴ Kɛ Krist bɔ amun nguan'n wo i sa nun'n ɔ wa yi i wun nglo'n, ɔ ´yi amun nglo wie, yɛ nyrun ng'ɔ ´nyɛn i'n, amun ´nyan wie.

Sa nga be yoli be laa'n nin nga be yo be siɛn'n

⁵ I sɔ'n ti'n, an `wla amun asiɛ'n su wa nzuɛn'n be ase: bla nin bian kunndɛlɛ, sa tɛtɛ yolɛ, be konvi b'ɔ sɔ nyannzuɛn sa mun'n, bé nyin b'ɔ blo ninnge'm be su'n, bé nyin b'ɔ yi-man like'n b'ɔ nin amuɛn sɔlɛ'n ti kun'n.

⁶ Sa sɔ'm be ti yɛ Nyanmiɛn i ya'n ɔ wa jao (be bɔ bé nyin yi-mɛn i'n) be su nin-ɔn.

⁷ Laa bɔ sa tɛtɛ sɔ'm be ti amun nzuɛn'n, kɛ an yo sɔ-ɔ.

⁸ Sanngɛ siɛn'n, an `yaci sa sɔ'n kwlaa: ya falɛ, anwlɛn fufu, klunwi, sran wun sacilɛ, nin ndɛ tɛtɛ b'ɔ fin amún nuan fite'n.

⁹ Nán an bua ato kle amun wiengu, afin amu'an wla amun nzuɛn laa b'ɔ man an yo sa tɛtɛ'n i ase,

¹⁰ yɛ amu'an fa nzuɛn uflɛ b'ɔ man amu'an yo kɛ sran bɔ Nyanmiɛn yili i uflɛ'n sa, Nyanmiɛn kaci sran sɔ'n titi lele ɔ si i kpa yɛ ɔ fɛ i mlɔnmlɔn .

¹¹ I sɔ'n ti'n, ɔ lɛ-man kɛ wie ti Grɛk yɛ wie ti Zuif, ɔ lɛ-man kɛ be wlali wie klɛn yɛ b'a wla-man wie klɛn, ɔ lɛ-man kɛ wie'm bé nyin nian ti-man yɛ wie ti sinnglinfuɛ, yɛ ɔ lɛ-man kɛ wie ti kanga yɛ wie ti diewa, sanngɛ Krist ti be like kwlaa, yɛ ɔ tran be kwlaa be anwlɛn'n nun.

¹² An ti Nyanmiɛn i sran, ɔ klo amun, yɛ ɔ fali amun. I sɔ'n ti'n, man sran'm be yo amun annvɔ, an `yo be kpa, an `yo amun wun aenvuɛ, an `yo wɛtɛɛfuɛ, yɛ an `blu sa'm be su. An `fa like sɔ mun ´cici amún ti.

¹³ Sa nga amun wiengu yo bɔ an wun i'n, man ɔ sɔn amun nun, sɛ sran kun yo i wiengu sa'n, man ɔ yaci cɛ i. Krist yacili sa nga an yoli i'n cɛli amun, ɔ man amun kusu, sa nga be yo amun'n, an `yaci cɛ.

¹⁴ Yɛ sa ng'ɔ ti cinnjin trɛ i ngba b'ɔ man i kwlaa sɔ'n kwla yo ye'n yɛlɛ kɛ an `klo amun wiengu.

¹⁵ Sɛ é wun nga Krist man ɔ jɔ ye'n ti sran'n, wuun e ´se kɛ man ɔ sie amun nin amun klun akunndan'n kwlaa, afin i sɔ'n ti yɛ Nyanmiɛn flɛli amun kɛ an `yo sran wunmuan nin-ɔn. Yɛ like kwlaa nga Nyanmiɛn yo man amun'n, nán amún wla fi.

¹⁶ Man Krist ndɛ b'ɔ ti amun like kpa'n tran amun klun. An `kan kle amun wiengu, ngwlɛlɛ nga an si i'n, an `fɛ i kwlaa'n tu amun wun fɔ. An `tu amun klun to jue ng'ɔ o Nyanmiɛn Jue fluwa nun, nin Nyanmiɛn manmanlɛ jue mɛnmɛn i, yɛ an `lɛ i ase.

¹⁷ Sɛ amun ´yo like wie o, sɛ amun ´kan ndɛ wie o, like kwlaa nga amun ´yo'n, an `yo i e Min Jésus dunman nun, yɛ i ti an `la e Si Nyanmiɛn'n i ase.

Sa nga Kristfuɛ'm be yo i be awlo nun'n

¹⁸ Bla mun, nán an fa amún nyin wlawla amún wun mun, an `bu be sran, afin e Min'n i nyrun sɛ an yo sɔ-ɔ, ɔ ti kpa.

¹⁹ Yasua mun, an `klo amún yi mun, nán an yo amun nyrun wiwi bé wun .

²⁰ Ba kanngan mun, man amún nyin yi amún si nin amun nin sa'n kwlaa nun, afin sɛ an yo sɔ-ɔ, ɔ yo e Min'n i fɛ.

²¹ Nja mun, nán an yo sa ng'ɔ kun amun mma'm be ya'n man bé sa sin ´bubu be'n.

²² Kanga mun, man amún nyin yi amun min mun sa'n kwlaa nun, yɛ an `bu be sran. Nán kɛ kɛ be o lɛ'n i ngunmin yɛ an yo i sɔ nan sran'm be klun jɔ amun wun-ɔn. Sanngɛ e Min'n bɔ an sro i'n ti, like nga an yo'n, nán an bu i sin.

²³ Like kwlaa nga amun ´yo'n, an `tu amun klun yo i kɛ e Min'n yɛ an su yo mɛn i sa, nán an bu i kɛ sran yɛ an su yo mɛn i-ɔ.

²⁴ Man an si kɛ e Min'n bɔbɔ yɛ ɔ ´fa like nga i waan i sran'm be ´nyɛn i'n ´tua amun kalɛ-ɔ. Afin amun Min kpafuɛ nga an su i'n yɛlɛ Krist.

²⁵ Afin sran ng'ɔ yo sa ng'ɔ ti-man kpa'n, ɔ ´nyɛn i nuan like yɛlɛ kɛ Nyanmiɛn kpa-man sran nun .