Bo Bolɛ 9 - NYANMIƐN NDƐ'N 1998

Nyanmiɛn i Noe nda talɛ

¹ Nyanmiɛn boli muae klanman mannin Noe nin i mma mun. Ɔ seli be kɛ: «An `trɛ, an `yi asiɛ wunmuan'n.

² Man asiɛ'n su nnɛn'm be kwlakwla nin anunman mun, ɔ nin jue'm be kwlaa be sro amun. M'an fa be m'an wla amún sa nun.

³ An `di be kwlaa. N fa mannin amun kɛ n dun mmua n fali nnya-nnya mun m mannin amun'n sa.

⁴ Sanngɛ nán an di nnɛn nin i mmoja'n afin i nun yɛ i nguan'n wo-ɔ .

⁵ Amun kusu amun mmoja i nun yɛ amun nguan'n wo-ɔ, i ti nán an gua mmoja ase. Sɛ nnɛn yɛ ɔ kun sran o, sɛ sran kusu yɛ ɔ kun i wiengu sran o, be `kun i wie.

⁶ Sran ng'ɔ guɛ i wiengu mmoja ase'n, sran uflɛ ´guɛ i mmoja liɛ'n i ase yɛlɛ kɛ Nyanmiɛn yili sran kɛ i bɔbɔ sa.

⁷ Amun liɛ an `wu ba kpanngban, an `trɛ, an `yi asiɛ'n i lika'n kwlaa.»

⁸ Nyanmiɛn kan guali su kleli Noe nin i mma'm be kɛ:

⁹ «Min kusu nda yɛ n ´ta amun yɛ. Amun nin amun osu'n nunfuɛ mun

¹⁰ nin nnɛn kwlaa nga be o amun wun yɛ'm be kwlaa, i anunman o, i klɔ nnɛn o, i blo nnɛn o, be kwlaa, be nga be fin mmeli'n nun fiteli'n, ɔ nin asiɛ'n su nnɛn nga be wa ba kasiɛn'n be ngba.

¹¹ Nda sɔ'n bɔ n ta'n yɛ. N su fa-man anannganman su nzue kɛ nga sa n fa nunnun-man nnɛn nin sran mun asiɛ'n su kun. N tɔ-mɛn i sɔ nzue b'ɔ ´nunnun asiɛ'n nin ninnge mun kun-ɔn.

¹² Nda sɔ'n bɔ n ta amun nin nnɛn nga be nin amun wo'n, ɔ nin amun osu'n nunfuɛ nga be ´ba kasiɛn'n, i nzɔliɛ

¹³ yɛlɛ min nyanngondin bɔ n fa sie i nyanmiɛn ble'n nun'n. Ɔ ti e nin asiɛ'n sufuɛ mun e aenguɛ nga e trali'n i nzɔliɛ.

¹⁴ Kɛ n ko yo bɔ nyanmiɛn'n ko mlan ble tuun bɔ nyanngondin'n ko fite'n,

¹⁵ wuun mín wla ɔ'a kpɛn nda nga n tali amun nin nnɛn'm be kwlaa'n i su, kpɛkuun anannganman su nzue sɔ'n su tɔ-man asiɛ'n su kun ɔ su kun-man sran mun nin nnɛn'm be kwlaa kun.

¹⁶ Kɛ n nian nyanngondin b'ɔ o nyanmiɛn ble'n nun'n, mín nyin ´kpɛn nda nga n tali sran nin nnɛn'm be kwlaa bɔ be o asiɛ'n su i su. Nda sɔ'n, ɔ lɛ-man awieliɛ.»

¹⁷ Nyanmiɛn seli Noe kɛ: «Nda nga n tali sran nin asiɛ'n su nnɛn'm be kwlaa'n yɛ ɔ o lɛ-ɔ.»

Noe i mma mun

¹⁸ Noe i mma nga be fin mmeli'n nun fiteli'n, yɛlɛ Sɛm, nin Kam ɔ nin Zafɛt. Kam ti Kanaanfuɛ'm be nannan.

¹⁹ Noe i mma nsan mun be osufuɛ mun yɛ be wa trɛli asiɛ wunmuan'n su-ɔ.

²⁰ Noe dili fie. I yɛ ɔ kpɛli vinyi talɛ'n i ba-a,

²¹ ɔ nɔnnin nzan nan ɔ'a bo, kpɛkuun ɔ yili i wun kplɛn i tannin sua'n nun lɔ.

²² Kanaanfuɛ'm be nannan Kam ko wunnin i si i wun kplɛn'n, kpɛkuun ɔ ko kan kleli i niaan nnyɔn mun gua'n su lɔ.

²³ Yɛ Sɛm nin Zafɛt be fali Noe i kondro'n be sieli be wati su yɛ be kɔ bé sin bé sin be ko fa kɛtɛli i su-ɔ. Kɛ be ´kɔ'n, bé nyin kaci lika uflɛ i ti b'a wun-man bé si i wun kplɛn'n.

²⁴ Kɛ nzan'n titili Noe i nyin su b'ɔ tinngeli'n, ɔ tili sa nga i wa kasiɛn'n yoli'n,

²⁵ nan ɔ'a se kɛ: «Nán Kanaan yo kpa! Man ɔ yo i niaan'm be kanga klun kanga .»

²⁶ Noe kan ukali su kɛ: «N la Anannganman b'ɔ ti Sɛm i Nyanmiɛn'n i ase. Man Kanaanfuɛ'm be yo Sɛmfuɛ'm be akua.

²⁷ Nyanmiɛn man Zafɛt i sa nun ninnge'm be yo ye. Man ɔ tran Sɛm i tannin sua'm be bo, man Kanaan yo i akua.»

²⁸ Kɛ anannganman su nzue'n tɔli'n, Noe dili afuɛ ya nsan afuɛ ablenun ekun.

²⁹ Noe i afuɛ'n kwlakwla yoli afuɛ ya ngwlan afuɛ ablenun nan ɔ'a wu.