Bo Bolɛ 8 - NYANMIƐN NDƐ'N 1998

¹ Nyanmiɛn buli Noe nin nnɛn nga be wo i sin lɔ'n be kwlaa be akunndan. Ɔ man ɔ fitali aunngban kun asiɛ'n su kpɛkuun nzue'n su kan ase.

² Asiɛ'n bo lɔ nzue'n nin nyanmiɛn su lɔ liɛ'n be kpɛli. Nzue'n yacili tɔlɛ.

³ Nzue'n wiewieli kanngankanngan. Kɛ nzue'n kpɛli'n i cɛn ya cɛn ablenun su'n, wuun nzue'n ɔ'a kan ase.

⁴ I anglo nso'n i le blu le nso'n su'n, mmeli'n ko jrannin Ararat oka'm be nun kun su.

⁵ Nzue'n kannin ase lele juli anglo blu'n su. Anglo blu'n su'n, i cɛn klikli'n, oka'm be ti'n be fiteli.

⁶ Le ablanan'n su'n, Noe tikeli fenɛtri ng'ɔ kpɛli i mmeli'n su'n

⁷ nan ɔ'a yaci kɔkɔkuankuan'n kun nun. Ɔ tu ko kpɛ i wun ba sɔ lele san nzue'n wieli asiɛ'n su.

⁸ I sin Noe yacili auble kun nun kɛ ɔ ´nian sɛ nzue'n ɔ'a kan ase o.

⁹ Sanngɛ auble'n ɔli-ɔ nzue'n tɛ o asiɛ'n su, ɔ'a nyan-man tranwlɛ, nan ɔ'a sɛ i sin mmeli'n wun lɛ nan Noe ɔ'a tinngɛ i sa'n ɔ'a fɛ i ɔ'a wlu mmeli'n nun.

¹⁰ Ɔ minndɛli le nso nan ɔ'a yaci auble'n nun ekun.

¹¹ Nnɔsua auble'n ´ba-a, olivie nnya mɔnnɛn kun wo i nuan nun. Noe wunnin kɛ kannzu nzue'n ɔ'a kan ase.

¹² Ɔ minndɛli le nso ekun nan ɔ'a yaci auble'n nun ekun. Kpɛkuun auble'n ɔ'a ba-man kun.

¹³ Noe i afuɛ ya nsiɛn afuɛ kun'n i anglo klikli'n i cɛn ba klikli'n su yɛ nzue'n wieli asiɛ'n su-ɔ. Noe yili mmeli'n i su tre'n. Ɔ ´nian-an, asiɛ'n ɔ'a fafa.

¹⁴ Anglo nnyɔn su'n i le ablaɔn-nin-nso su'n, wuun asiɛ'n ɔ'a wu.

¹⁵ Yɛ Nyanmiɛn seli Noe kɛ:

¹⁶ «A nin ɔ́ yi, nin ɔ́ wa yasua mun, nin bé yi mun an `fin mmeli'n nun fite.

¹⁷ Man nnɛn wafa-wafa kwlaa nga be o ɔ sin lɔ'n be fite. Anunman mun, nnɛn kanngan mun, ɔ nin dandan mun, man be kwlaa be fite be tru asiɛ'n su nan be `trɛ.»

¹⁸ Yɛ Noe nin i yi, nin i mma yasua mun nin bé yi mun be fin mmeli'n nun be fiteli-ɔ.

¹⁹ Kpɛkuun nnɛn dandan nin asiɛ'n su nnɛn kanngan mun ɔ nin anunman'm be kwlaa be fiteli akpasua-akpasua.

²⁰ Noe kplannin Nyanmiɛn i sɔwlɛ kun mɛnnin i. Ɔ fali nnɛn nga be di'n be nun kunngun fa yili tɛ nga be yra be nnɛn'n kɔlikɔli'n mannin Anannganman.

²¹ Nnɛn'n i fannin'n b'ɔ bɔn'n, ɔ wluli Anannganman bue nun kpɛkuun ɔ seli i klun lɔ kɛ: «Ɔ fin ndɛ, n nian-man sran'n i sa tɛ'n su n saci-man asiɛ'n kun. Afin kɛ ɔ fin i bakan nun'n, i nyin'n wo sa tɛ'n su titi. Ɔ man n kun-man ninnge mun kɛ m'an fa yo i yɛ'n sa kun.

²² Kɛ asiɛ'n tɛ o lɛ'n, like lualɛ nin i tilɛ, aunyɛyɛ nin ayrɛ, wawa nin munngun, wia nun nin kɔnguɛ'n, be ´ka lɛ tititi.»