Bo Bolɛ 7 - NYANMIƐN NDƐ'N 1998

Noe i mmeli nun fulɛ

¹ Anannganman seli Noe kɛ: «A nin wɔ awlofuɛ mun an `wlu mmeli'n nun afin ɔ blɛ sufuɛ'm be kwlakwla be nun'n, wɔ kunngba yɛ n wun kɛ a nin min mantan-an.

² Fa nnɛn nga be di'n be akpasua kunngun'n kwlaa be nun yasua kun nin bla kun sɔ fa nso. Be nga be di-man'n be liɛ'n be akpasua kun nun'n, fa bla kun nin yasua kun cɛ .

³ Fa anunman akpasua kunngun'm be kwlaa be nun yasua kun nin bla kun sɔ fa nso. I liɛ'n, be osu'n su nunnun-man asiɛ'n su.

⁴ Ɔ ka le mɔcuɛ kun n ´tɔ nzue asiɛ'n su cɛn ba klonglo ablanan kɔnguɛ nin wia nun. N ´nunnun like nga n yili be'n be kwlaa asiɛ'n su.»

⁵ Noe niannin ndɛ nga Anannganman fa sieli i nyrun'n i kwlaa su yoli.

Anannganman su nzue'n i tɔlɛ

⁶ Kɛ anannganman su nzue sɔ'n ´tɔ'n, wuun Noe ɔ'a di afuɛ ya nsiɛn.

⁷ Noe nin i yi, nin i wa yasua mun, ɔ nin i wa'm bé yi mun be wluli mmeli'n nun kɛ ɔ ´yo nan anannganman su nzue'n ɔ'a di-man be'n ti.

⁸ Nnɛn nga be di mun nin nga be di-man mun, anunman mun nin nnɛn nga be cuɛn be wun ase mun,

⁹ bé bla kunngun nin be yasua kunngun nga Nyanmiɛn kleli kɛ be `wlu Noe sin'n, be wluli i sin.

¹⁰ Kɛ le mɔcuɛ'n juli'n, nzue'n tɔli dan kpa asiɛ'n su.

¹¹ Noe i afuɛ ya nsiɛn'n i anglo nnyɔn'n su i le blu le nso su'n su yɛ nzue ng'ɔ wo asiɛ'n i bo lɔ'n kpukeli-ɔ, yɛ nyanmiɛn su lɔ nzue'n kusu i anuan'n tikeli-ɔ.

¹² Nzue'n boli asiɛ'n su tɔlɛ bo. Ɔ tɔli cɛn ba klonglo ablanan kɔnguɛ nin wia nun.

¹³ Cɛn sɔ'n nun yɛ Noe nin i yi, nin i wa Sɛm nin Kam nin Zafɛt ɔ nin bé yi mun be wluli mmeli'n nun-ɔn.

¹⁴ Be nin blo nnɛn akpasua kunngun mun, nin klɔ nnɛn akpasua kunngun mun, nin nnɛn kanngan'm be akpasua kunngun mun, ɔ nin anunman mun nin kakaa'm be kwlaa yɛ be wluli-ɔ.

¹⁵ Nnɛn akpasua'n kwlaa be yasua kun nin bla kun be bali Noe sin.

¹⁶ Be yasua kun nin bla kun nga Nyanmiɛn kleli kɛ be wlu Noe sin'n be wluli. Nan Anannganman ɔ'a nyin Noe su anuan.

¹⁷ Anannganman su nzue sɔ'n tɔli cɛn ablanan. Kɛ nzue'n ´yi'n, ɔ mannin mmeli'n su.

¹⁸ Nzue'n yi ɔli i nyrun lɔuun kpa, siɛn'n mmeli'n la nzue'n i nyin su.

¹⁹ Nzue'n yi tratrali su, ɔ man ɔ katali oka nglo-nglo kpa'm be kwlaa be su.

²⁰ Nzue'n trali oka sɔ'm be su mɛtri nso.

²¹ Ɔ man asiɛ'n su ninnge'm be kwlaa be wieli wu, i sran mun o, i klɔ nnɛn mun o, i blo nnɛn mun o, i anunman mun o, i waka mun o, be kwlaa be wieli wu.

²² Like nga be de wunmiɛn bɔ be o asiɛ'n su be kwlaa be wuli.

²³ Anannganman nunnunnin asiɛ'n su ninnge'm be ngba. I sran o, i nnɛn dandan o, i nnɛn kanngan o, i anunman o, be kwlaa sɔ'm be nunnunnin. San Noe nin be nga be nin i wo mmeli'n nun'n be ngunmin cɛ yɛ be fiteli nun-ɔn .

Noe fin mmeli'n nun su jra

²⁴ Nzue'n kali asiɛ'n su cɛn ya cɛn ablenun.