Bo Bolɛ 6 - NYANMIƐN NDƐ'N 1998

Nyanmiɛn i klun b'ɔ jɔ-man sran'm be wun'n

¹ Kɛ sran'm be ´trɛ asiɛ'n su'n bɔ be ´wu ba bla mun'n,

² Nyanmiɛn mma mun be wunnin kɛ sran'm bé wa bla sɔ'm be ti nglanman kpa nan b'a kunndɛ wie b'a ja.

³ Yɛ Anannganman seli kɛ: «Ɔ fata-man kɛ nguan nga n fa mannin sran mun'n ɔ cɛ be nun ngboko, afin kannzɛ ɔ yo sɛ be ´wu. Siɛn'n sɛ be waan b'a cɛ o yɛlɛ afuɛ ya ablaɔn.»

⁴ I blɛ sɔ nun'n, wuun sran jajraajra'm be o mɛn'n nun. Be cɛli lɛ kpa bɔ nan b'a wie. Nyanmiɛn i mma yasua mun nin sran'm bé wa bla bɔ be jali'n be mma mun-ɔn. Be yɛ be dunman fuli lalafuɛ nun nin-ɔn.

⁵ Anannganman ´nian-an, sran'm be klunwi'n kɔ i nyrun cɛn'n kwlaa. Kɛ aliɛ'n ´cɛn b'ɔ ´san'n, wuun be klun akunndan'n ´yo tɛ kɔ i nyrun.

⁶ Ɔ yoli Anannganman i ya dan, i sran yilɛ b'ɔ yili'n, ɔ yoli i nsisɔ.

⁷ Yɛ ɔ seli kɛ: «Sran bɔ n yili be'n, n ´nunnun be nin nnɛn mun kwlaa, be kanngan o, be dandan o, be ngba ɔ nin anunman mun. Yilɛ nga n yili be'n, ɔ'a yo min nsisɔ.»

⁸ Sanngɛ Noe liɛ'n, i wun yoli Anannganman fɛ .

Nyanmiɛn i klun b'ɔ jɔ Noe i wun'n

^9-10 Noe i wun ndɛ'n yɛ. Noe wuli ba yasua nsan: Be yɛlɛ Sɛm, nin Kam yɛ Zafɛt. Noe ti sran kpa, ɔ tu i klun su Nyanmiɛn. Ɔ nin Nyanmiɛn bé nuan sɛ.

¹¹ I blɛ sɔ nun'n, wuun mɛn wunmuan'n nun sran'm b'a saci mlɔnmlɔn. Sa kekleekle mun yɛ sran'm be yo-ɔ.

¹² Nyanmiɛn ´nian asiɛ nin-ɔn, ɔ wunnin kɛ ɔ'a wie saci. I su sran'm be kwlakwla b'a wie saci kpan.

¹³ Yɛ Nyanmiɛn seli Noe kɛ: «E nin sran mun e liɛ'n ɔ'a wie. Sa tɛtɛ nga b'a yo i asiɛ'n su'n ɔ'a sɔn ngboko. N wa nunnun be.

¹⁴ Ɔ man fa siprɛs waka fa bobo like kun kɛ mmeli sa. Kpɛkpɛ mmeli sɔ'n nun sua ba sua ba, fa gudrɔn kɛn i klun nin i sin'n.

¹⁵ Man n kle wɔ i yowlɛ'n. Man i tɛnndɛn nun'n yo mɛtri ya kun nin mɛtri ablenun. I tɛtrɛ nun'n `yo mɛtri ablaɔn-nin-nnun. I nglo-nglo su'n `yo mɛtri blu-nin-nnun.

¹⁶ Kɛtɛ i ti su'n, yaci mɛtri sin sɛsɛ i ti su nin i bue'm be nglo'n be afiɛn. Kpɛ anuan i bue kun su. I sin, man i klun lɔ'n nyan etazi nsan.

¹⁷ Afin n wa tɔ anannganman su nzue kun asiɛ'n su, n ´fa nunnun ninnge nga be wo asiɛ'n su'n be kwlaa. N ´kun asiɛ'n su ninnge'm be kwlaa.

¹⁸ Sanngɛ n ta wɔ nda kɛ n ´yaci wɔ lɛ. A nin ɔ́ yi, nin ɔ mma mun, ɔ nin ɔ mma'm bé yi mun, an ´wlu mmeli'n nun.

¹⁹ Fa nnɛn wafa-wafa'n kwlaa be nyɔnnyɔn fa wlu mmeli'n nun wie, fa be bla kun nin yasua kun, bla kun nin yasua kun kɛ ɔ ´yo nan b'a nunnun-man'n ti.

²⁰ Nnɛn wafa-wafa mun nin anunman mun, i nnɛn kanngan mun o, i nnɛn dandan mun o, be kwlaa be ´ba ɔ́ sin bla kun nin yasua kun, bla kun nin yasua kun nan b'a nunnun-man.

²¹ Ɔ man fa ndidiɛ like wafa'n kwlaa fa sie amun sin lɔ nan w'a nyan like w'a di nan be kusu b'a nyan wie b'a di.»

²² Noe yoli i kwlakwla ng'ɔ o lɛ'n kpan! Ndɛ nga Nyanmiɛn fa sieli i nyrun'n, ɔ niannin i kwlaa su yoli.