Bo Bolɛ 50 - NYANMIƐN NDƐ'N 1998

Zakɔb i sɛ yolɛ

¹ Kpɛkuun Zozɛf ko tɔli i si su, ɔ sunnin.

² Zozɛf seli i dɔɔtrɔ'm be kɛ be siesie i si i fuɛn'n ye be mɛn i man be ko sie i. Nan dɔɔtrɔ'm b'a kpakpa fuɛn'n i wun ayre.

³ Be dili i wun junman cɛn ba ablanan. Cɛn ba ablanan yɛ be fa di fuɛn'm bé wun junman titi-ɔ. Eziptfuɛ'm be sunnin Zakɔb cɛn ba ableso.

⁴ Kɛ be sunnin Zakɔb lele wieli'n, Zozɛf seli famiɛn'n i awlofuɛ'm be kɛ: «Sɛ mín wun yo amun fɛ'n, ndɛ yɛ n su wa kɛn i yɛ, an `yaci amun `kan kle Ezipt famiɛn'n. An `se i kɛ

⁵ mín si man n tali nda, ɔ seli min kɛ: ‹Sɛ n wu'n, sie min asieliɛ kunman nga n kpɛli i Kanaan mɛn'n nun lɔ'n nun.› I sɔ'n ti, man min atin man n wɔ lɔ n ko sie mín si'n nan m'an ba.»

⁶ Yɛ Ezipt famiɛn'n tɛli i su kɛ: «Nian nda nga a tali ɔ si'n su, kɔ ko sie i.»

⁷ Yɛ Zozɛf ɔli i si i sielɛ-ɔ. Famiɛn'n i mantanfuɛ mun nin i awlo'n nun sran kaklaakla mun, nin Ezipt sran kaklaakla'm be ko sunmɛnnin i.

⁸ Zozɛf bɔbɔ i awlofuɛ mun nin i niaan mun, ɔ nin i si i awlofuɛ'm be kwlakwla be ɔli wie. San be mma kanngan mun nin be bua mun, nin bé boli mun, ɔ nin be nannin mun yɛ be yacili be Gozɛn lɛ-ɔ.

⁹ Kɛ Zozɛf ´kɔ'n, ɔ fali kakaklolo nin nnɛn kpanngɔ nga be cuɛn kakaklolo sɔ mun'n be su fufuɛ mun. Sran nga be ɔli'n be sɔnnin kpa.

¹⁰ Kɛ be juli Gɔrɛn-Atad b'ɔ o Zurdɛn'n i bue kun lɔ'n su'n, sɛ nga be yoli'n, ɔ ti-man blɛblɛ. Zozɛf yoli i si i sɛ'n le mɔcuɛ kun.

¹¹ Kɛ Kanaanfuɛ mun bɔ be ti mɛn sɔ'n i nunfuɛ'm be wunnin Gɔrɛn-Atad sɛ sɔ'n, be waan: «Eziptfuɛ'm bé sɛ dan kpa kun bɔ yɛ be ´yo i lɛ-ɔ.» I ti yɛ be flɛli Zurdɛn'n sin lɔ lika sɔ'n kɛ: Abɛl-Mizraim nin-ɔn.

¹² Zakɔb i mma'm be niannin ndɛ nga bé si kan kleli be'n su be yoli.

¹³ Be fɛli i be ɔli Kanaan mɛn'n nun, be sieli i Makpela lika'n nun lɔ yɛbuɛ buɛ'n nun. Lika sɔ yɛ Abraam toli i Efrɔn b'ɔ ti Ɛtfuɛ'n i sa nun kɛ ɔ ´fa yo i asieliɛ'n nun nin-ɔn. Ɔ mantan Mamre lɛ.

¹⁴ Kɛ Zozɛf sieli i si'n, ɔ nin i niaan mun nin be kwlaa nga be ɔli i sunmanlɛ'n be sali be sin Ezipt lɔ.

Zozɛf i niaan'm be anwlɛn su nzue gualɛ

¹⁵ Kɛ Zozɛf i niaan'm be ´nian bɔ bé si ɔ'a wu'n, be waan: «Sɛ Zozɛf wa se kɛ ɔ nin e ´nyɛn i o, sɛ ɔ ´se kɛ ɔ ´yi sa nga e yoli i'n kwlakwla man ye o!»

¹⁶ Nan b'a ko mɛn i ngaliɛ kɛ: «Kɛ ɔ́ si ´wu'n, ɔ kannin ndɛ kleli ye.

¹⁷ I waan be `se Zozɛf kɛ: ‹N ´srɛ wɔ kpa ti-ɔ, yaci sa nga ɔ niaan'm be yoli wɔ'n cɛ be, tɛ nga be yoli wɔ'n yaci cɛ be. Be ti ɔ́ si i Nyanmiɛn'n i sufuɛ!› » Kɛ be wa boli jasin sɔ'n kleli Zozɛf'n, ɔ sunnin.

¹⁸ I niaan'm be bɔbɔ be wa kotoli be trɛli i ja be waan: «E yɛ e o yɛ. Fa e yo ɔ sufuɛ.»

¹⁹ Yɛ Zozɛf seli be kɛ: «Nán srɛ kun amun. N fa mín wun n sunnzun Nyanmiɛn-ɔn ɔ yo-man ye.

²⁰ An guguli kɛ an ´yo min tɛ kpɛkuun Nyanmiɛn'n fali tɛ sɔ'n kacili ye, yɛ man e o ye nga e o nun andɛ yɛ nun nin-ɔn, yɛ man sran beblebe nga be fiteli nun-ɔn.

²¹ Nan i sɔ'n ti, nán srɛ kun amun. N ´nian amun nin amun mma mun amun lika.» Kɛ ɔ kɛnnin i sɔ kleli be'n, ɔ man be anwlɛn'n tɔli nzue nun.

Zozɛf i wulɛ

²² Zozɛf nin i osufuɛ'm be trannin Ezipt lɔ. Ɔ dili afuɛ ya afuɛ blu nan ɔ'a wu.

²³ Zozɛf sili Efraim i anunman sian mun nan ɔ'a wu. Ɔ fali Manase i wa Makir i mma liɛ mun yoli i liɛ.

²⁴ Le kun Zozɛf seli i niaan'm be kɛ: «N su wa wu, sanngɛ n si kɛ Nyanmiɛn ɔ ´uka amun, ɔ ´fa amun kɔ mɛn ng'ɔ tali Abraam nin Izaak nin Zakɔb be nda kɛ ɔ ´fa man be'n nun.»

²⁵ Zozɛf seli i niaan'm be kɛ: «N si kɛ Nyanmiɛn ɔ ´uka amun. An `ta min nda kɛ sɛ an ´kɔ'n, an ´tu min owie'n be ´fa kɔ .»

²⁶ Zozɛf dili afuɛ ya afuɛ blu yɛ ɔ wuli-ɔ. Be fali ayre be kpɛkpɛli i saka'n wun nan ɔ'a saci-man. Be sieli i yɛbuɛ alaka kun nun Ezipt lɔ.