Bo Bolɛ 5 - NYANMIƐN NDƐ'N 1998

Adam i osu'n lele fa ju Noe i osu'n nun

¹ Adam i mma mun, nin i anunman mun, ɔ nin i anunmannunman mun be dunman mun yɛ. Blɛ nga Nyanmiɛn ´yi sran mun'n ɔ yili be kɛ i bɔbɔ sa.

² Ɔ yili yasua nin bla, ɔ boli muae mannin be. Kɛ ɔ yili be'n, ɔ flɛli be kɛ klɔ sran mun.

³ Kɛ Adam dili afuɛ ya kun afuɛ ablasan'n, ɔ wuli ba yasua kun. Ba sɔ'n fɛli i kpa, ɔ flɛli i kɛ Sɛt.

⁴ Kɛ Adam wuli Sɛt'n, ɔ dili afuɛ ya mɔcuɛ ekun. I blɛ sɔ nun'n, ɔ wuli ba yasua wie mun nin ba bla wie mun ekun.

⁵ Adam dili afuɛ ya ngwlan nin afuɛ ablasan yɛ ɔ wuli-ɔ.

⁶ Sɛt dili afuɛ ya kun afuɛ nnun nan ɔ'a wu ba yasua kun, be flɛ i kɛ Enɔs.

⁷ Kɛ Sɛt wuli Enɔs'n, ɔ dili afuɛ ya mɔcuɛ nin afuɛ nso ekun. I blɛ sɔ nun'n, ɔ wuli ba yasua wie mun nin ba bla wie mun ekun.

⁸ Sɛt dili afuɛ ya ngwlan afuɛ blu-nin-nnyɔn yɛ ɔ wuli-ɔ.

⁹ Enɔs dili afuɛ ablangwlan nan ɔ'a wu ba yasua kun, be flɛ i kɛ Kenan.

¹⁰ Kɛ Enɔs wuli Kenan'n, ɔ dili afuɛ ya mɔcuɛ afuɛ blu-nin-nnun ekun. I blɛ sɔ nun'n, Enɔs wuli ba yasua wie mun nin ba bla wie mun ekun.

¹¹ Enɔs dili afuɛ ya ngwlan nin afuɛ nnun yɛ ɔ wuli-ɔ.

¹² Kenan dili afuɛ ableso nan ɔ'a wu ba yasua kun, be flɛ i kɛ Maalaleɛl.

¹³ Kɛ Kenan wuli Maalaleɛl'n, ɔ dili afuɛ ya mɔcuɛ afuɛ ablanan ekun. I blɛ sɔ nun'n, ɔ wuli ba yasua wie mun nin ba bla wie mun ekun.

¹⁴ Kenan dili afuɛ ya ngwlan afuɛ ablanan yɛ ɔ wuli-ɔ.

¹⁵ Maalaleɛl dili afuɛ ablesiɛn-nin-nnun nan ɔ'a wu ba yasua kun, be flɛ i kɛ Zerɛd.

¹⁶ Kɛ Maalaleɛl wuli Zerɛd'n, ɔ dili afuɛ ya mɔcuɛ afuɛ ablasan. I blɛ sɔ nun'n, ɔ wuli ba yasua wie mun nin ba bla wie mun ekun.

¹⁷ Maalaleɛl dili afuɛ ya mɔcuɛ afuɛ ablangwlan-nin-nnun yɛ ɔ wuli-ɔ.

¹⁸ Zerɛd dili afuɛ ya kun afuɛ ablesiɛn-nin-nnyɔn nan ɔ'a wu ba yasua kun, be flɛ i kɛ Enɔk.

¹⁹ Kɛ Zerɛd wuli Enɔk'n ɔ dili afuɛ ya mɔcuɛ ekun. I blɛ sɔ nun'n, ɔ wuli ba yasua wie mun nin ba bla wie mun ekun.

²⁰ Zerɛd dili afuɛ ya ngwlan afuɛ ablesiɛn-nin-nnyɔn yɛ ɔ wuli-ɔ.

²¹ Enɔk dili afuɛ ablesiɛn-nin-nnun nan ɔ'a wu ba yasua kun, be flɛ i kɛ Mɛtisela.

²² Kɛ Enɔk wuli Mɛtisela'n, ɔ dili afuɛ ya nsan ekun. Ɔ nin Nyanmiɛn be nantili klanman. I blɛ sɔ nun'n, ɔ wuli ba yasua wie mun nin ba bla wie mun ekun.

²³ Blɛ'n kwlaa ng'ɔ dili'n yoli afuɛ ya nsan afuɛ ablesiɛn-nin-nnun.

²⁴ Enɔk nin Nyanmiɛn be nantili klanman kpɛkuun b'a wun-mɛn i kun, afin Nyanmiɛn fɛli i .

²⁵ Mɛtisela dili afuɛ ya kun afuɛ ablaɔcuɛ-nin-nso nan ɔ'a wu ba yasua kun, be flɛ i kɛ Lemɛk.

²⁶ Kɛ Mɛtisela wuli Lemɛk'n, ɔ dili afuɛ ya nso afuɛ ablaɔcuɛ-nin-nnyɔn ekun. I blɛ sɔ nun'n ɔ wuli ba yasua wie mun nin ba bla wie mun ekun.

²⁷ Mɛtisela dili afuɛ ya ngwlan afuɛ ablesiɛn-nin-ngwlan yɛ ɔ wuli-ɔ.

²⁸ Lemɛk dili afuɛ ya kun afuɛ ablaɔcuɛ-nin-nnyɔn nan ɔ'a wu ba yasua kun.

²⁹ Ɔ flɛli i kɛ Noe, yɛ ɔ seli kɛ: «Ba nga yɛ ɔ ´yo man e wa de wunmiɛn kan junman dilɛ nun-ɔn. Afin kɛ Anannganman boli asiɛ'n i sannzan'n, junman dilɛ'n ɔ'a yo ya, ɔ ti afɛ.»

³⁰ Kɛ Lemɛk wuli Noe'n, ɔ dili afuɛ ya nnun afuɛ ablangwlan-nin-nnun ekun. I blɛ sɔ nun'n, ɔ wuli ba yasua wie mun nin ba bla wie mun ekun.

³¹ Lemɛk dili afuɛ ya nso afuɛ ableso-nin-nso yɛ ɔ wuli-ɔ.

³² Noe dili afuɛ ya nnun kwlaa nan ɔ'a wu ba yasua nsan. Be flɛ kun kɛ Sɛm. Be flɛ kun ekun kɛ Kam. Yɛ be flɛ kun ekun kɛ Zafɛt.