Bo Bolɛ 49 - NYANMIƐN NDƐ'N 1998

Zakɔb i mma'm be kwlakwla be nguan yralɛ

¹ Zakɔb flɛli i mma mun, ɔ seli be kɛ: «An `yia man n kan sa nga ɔ wa ju amun su cɛn wie'n n kle amun.

² Min mma mun, an `yia nan an `sie amún su, an `tie ndɛ nga n wa kan'n.

³ Ribɛn, wɔ yɛ a ti min mma'm be kpɛnngbɛn nin-ɔn, n ´wu wɔ'n, wuun n tɛ yo juejuejue. A ti min gbanflɛn nun ba. Ɔ nyrun ba nyan tra be nga mun. Ɔ ta'n kwla be liɛ'n.

⁴ Ɔ like yolɛ yo ya kɛ nzue ba b'ɔ kpalo'n viavia'n sa. Sanngɛ nán wɔ yɛ a ´nyan kpɛn nin-ɔn. Sa ti'n, yɛlɛ kɛ a wluli mín yi'n kun sin a nin i be lali. A sokpali min.

⁵ Simeɔn nin Levi be ti kun: be sran nnyɔn'n bé bo ti kun yɛ be fa be tokofi mun be yo nzaje sa nin-ɔn.

⁶ Akunndan tɛ nga be ´bu'n, nán e nin be yɛ e bu-ɔ. Be ´yia be anyia'n, nán e nin be yɛ e yia-a. Afin be ya falɛ nun be kunnin sran, be anwlɛn fufu'n ti be kpɛli nannin yasua'm bé ja sin ndin'm be nun.

⁷ Be ya tɛ sɔ'n ti, be yako. Be anwlɛn tɛ sɔ'n ti, be yako. N ´titi be nun Zakɔb i nvle'n nun, n ´yo man be osu'n, ɔ bo sanndi Izraɛl nvle'n nun.

⁸ Zida, wɔ yɛ ɔ niaan'm be ´bo flɛ wɔ-ɔ. A ´kwla ɔ kpɔfuɛ mun, ɔ man be su man-man bé ti su. Ɔ bɔbɔ ɔ niaan'm be ´koto ɔ bo.

⁹ Mín wa Zida, a ti kɛ jra gbanflɛn kun b'ɔ fin i nnɛn dilɛ ɔ'a ba i lawlɛ, bɔ ɔ'a koto i ja'n su ɔ'a la'n sa. ?Kɛ jra yasua annzɛ bla ɔ ko la'n, be ´yo i sɛ bɔ cɛ yɛ ɔ ´jaso-ɔ?

¹⁰ Famiɛn kpɔnman'n ɔ ti Zida awlo'n i liɛ mlɔnmlɔn, kpɛnngbɛn kpɔnman'n ɔ ti i osu'n i liɛ titi lele san sran ng'ɔ lɛ i bo'n ɔ'a ba, nan nvle'm be kwlaa b'a su i .

¹¹ Vinyi i wun yɛ ɔ ´minndɛ i aflunmun nin-ɔn, vinyi'm be nun kpa'n i wun yɛ ɔ ´minndɛ i aflunmun nin-ɔn. Ɔ ´fa nzan yɛ ɔ ´kpu i tralɛ nin-ɔn. Ɔ ´fa nzan nzue'n yɛ ɔ ´kpu i kondro nin-ɔn.

¹² Nzan'n ɔ ´yo man i nyinma'n ɔ ´blo kpa sa, yɛ nɔnnɔn'n ɔ ´yo man i je'n ɔ ´fɛn fuaii.

¹³ Zabilɔn liɛ'n ɔ ´tran jenvie'n nuan, kan mmeli'm be si lɛ'n yɛ ɔ tran-an. I lika'n ɔ ´kɔ lele ju Sidɔn.

¹⁴ Isakar ti kɛ aflunmun kun b'ɔ ti kpinndin-kpinndin b'ɔ la i kuku nun'n sa.

¹⁵ Ɔ wunnin kɛ lika ng'ɔ o nun'n ti kpa, nan i nun tranlɛ yo fɛ. Yɛ ɔ fɛli i sin mannin kɛ be sie su trɔ. Yɛ ɔ kplinnin su kɛ ɔ ´di junman kɛ akua wie sa.

¹⁶ Dan ɔ ´sie i akpasua sufuɛ mun kɛ Izraɛl akpasua nga'm be sie be sran mun'n sa.

¹⁷ Dan ti kɛ wuo b'ɔ o atin nuan'n sa, ɔ ti kɛ ɔnda b'ɔ wo atin nuan'n sa. Ɔ ´ka nnɛn kpanngɔ'n i ja sin, kpɛkuun sran ng'ɔ fu su'n ɔ'a tɔ ɔ'a lɛngɛ i nyin aanga.

¹⁸ Ee! Anannganman, n lafi su kɛ a ´de min.

¹⁹ Gad i kpɔfuɛ'm be akpasua'm be su i su nin alɛ, kpɛkuun bé nyin bɔ be ´bo i-ɔ, Gadfuɛ'm b'a yia be su su be su.

²⁰ Azɛr i akpasua su lɔ aliɛ'n ´yo sro, famiɛn'm be aliɛ'm be nun kpakpa'n, lɔ yɛ ɔ ´fin-ɔn.

²¹ Nɛftali ti kɛ flete kun b'ɔ ti i tiaun tilɛ'n sa. I wa ng'ɔ wu be'n be ti nglanman.

²² Zozɛf ti kɛ waka b'ɔ su mma'n sa. Ɔ ti kɛ waka b'ɔ fifi nzue ti'n nuan sa. I sama'm be fu lele tra talɛ'n su.

²³ Ta tofuɛ'm be nin i nyɛnnin i, be toli be ta'n i wun, be klɔklɔli i.

²⁴ Sanngɛ kɛ ɔ lɛ i ta'n nun'n yɛ ɔ lɛ nun-ɔn, i sa'n ɔ'a kpɔ-man le. Zakɔb Nyanmiɛn'n i kwlalɛ'n b'ɔ lɛ i'n ti, Nyanmiɛn b'ɔ ti Izraɛl i tafuɛ kɛ be ta bua'n kpa sa'n, Nyanmiɛn b'ɔ ti kɛ Izraɛl i yɛbuɛ b'ɔ kisa su'n sa'n,

²⁵ ɔ si i Nyanmiɛn b'ɔ suan ɔ́ bo'n, Nyanmiɛn b'ɔ kwla like kwlaa yo'n b'ɔ yo wɔ ye'n, man ɔ man wɔ nyanmiɛn su lɔ nzue ɔ nin asiɛ'n bo lɔ nzue'n wie. Man ɔ yo man ɔ nnɛn'm be wu ba nan wɔ akpasua su bla'm be wu ba.

²⁶ Zozɛf, min bɔ n ti ɔ́ si'n, mín nuan yralɛ'n ɔ flunman tra oka nga be o lɛ titi'n be su ninnge nga be yo ye'n, ɔ nin kpɔlɛ nga be o lɛ lalaa'n be su ninnge kpakpa mun. Zozɛf, wɔ bɔ a ti ɔ niaan'm be kwlaa be su kpɛn'n, man mín nuan yralɛ klanman nga n yra man wɔ yɛ'n ɔ ka ɔ su tititi.

²⁷ Bɛnzamɛn ti kɛ blo alua wlɛfuɛ sa. Nglɛmun ɔ di nnɛn ng'ɔ trɛli i'n. Nnɔsua ɔ cɛcɛ like ng'ɔ nyɛnnin i'n nun.»

²⁸ Izraɛl akpasua blu-nin-nnyɔn'm be yɛ be o lɛ-ɔ. Ndɛ nga bé si kannin b'ɔ fa yrali be nguan'n yɛ ɔ o lɛ-ɔ. Sran kun lɛ i liɛ, sran kun lɛ i liɛ.

Zakɔb i wulɛ'n

²⁹ I sin Zakɔb kaleli be, ɔ seli kɛ: «N su wa wu. Sɛ n wu'n, an `ko sie min min nannan'm be asieliɛ'n nun. An `sie min yɛbuɛ buɛ ng'ɔ o Efrɔn b'ɔ ti Ɛtfuɛ'n i lika'n nun

³⁰ Mamre wun lɛ Kanaan mɛn'n nun lɔ. Abraam toli lika sɔ'n nin yɛbuɛ buɛ'n sɔ'n Efrɔn sa nun. Ɔ toli i kɛ ɔ ´fa yo i asieliɛ .

³¹ Lɛ yɛ be sieli Abraam nin i yi Sara-a. Lika kunngba'n nun yɛ be sieli Izaak nin i yi Rebeka-a. Lɛ yɛ n sieli Lea-a.

³² Lika sɔ'n nin yɛbuɛ buɛ'n, be toli be Ɛtfuɛ'm bé sa nun.»

³³ Kɛ Zakɔb wieli i ndɛ kasiɛn'n i kan'n, ɔ lali nan ɔ'a ka nun, ɔ ɔli blɔlɔ i nannan'm be sin.