Bo Bolɛ 48 - NYANMIƐN NDƐ'N 1998

Zakɔb i Zozɛf i mma'm be nguan yralɛ

¹ I osu b'ɔ ´cɛ kan'n, be wa seli Zozɛf kɛ: «Ɔ si i wunnɛn yo i ya.» Nan ɔ'a fɛ i wa nnyɔn mun, Manase nin Efraim, nan b'a ɔ.

² Kɛ be seli Zakɔb kɛ: «Ɔ wa Zozɛf ɔ'a ba ɔ nianlɛ'n» ɔ miɛnnin i nyin mɛnnin i wun su, yɛ ɔ trannin ase i bɛ'n su-ɔ.

³ Kpɛkuun ɔ seli Zozɛf kɛ: «Nyanmiɛn b'ɔ kwla like kwlaa yo'n fiteli min nyrun Liz lɔ, Kanaan mɛn'n nun lɔ, ɔ bo muae klanman mannin min.»

⁴ Ɔ seli min kɛ: «N wa man wɔ ba nin anunman kpanngban, n ´yo man ɔ osu'n ɔ ´trɛ dan kpa, kpɛkuun n ´fa mɛn nga m ´man ɔ osu'n kɛ ɔ `fa yo i liɛ titi .»

⁵ Zakɔb kɛnnin i ekun kɛ: «Ba nnyɔn nga a wuli be Ezipt wa ka nan m'an ba ɔ́ wun wa'n, be ti mín wa. Efraim nin Manase be ti min liɛ kɛ Ribɛn nin Simeɔn be ti min liɛ'n sa.

⁶ Ba nga a wa wuli be kasiɛn'n, be liɛ'n be ti ɔ liɛ. Lika nga be nyrun kpɛnngbɛn'm be nyɛn i'n, i nun yɛ kasiɛn sɔ'm be ´nyan be liɛ nin-ɔn.

⁷ Kɛ n fin Mezopotami m ´ba'n, Rasɛl wuli mín sa nun Kanaan mɛn'n nun lɔ Efrata wun koko lɔ, nan m'an sie i Efrata bɔ siɛn'n be flɛ i kɛ Bɛtleɛm'n i atin'n i nuan lɛ.»

⁸ Kɛ Zakɔb ´ijɔ'n, kpɛkuun ɔ'a wun Zozɛf i mma mun. Ɔ usali kɛ: «?Wan mun yɛlɛ nga?»

⁹ Zozɛf tɛli i su kɛ: «Ba nga Nyanmiɛn mannin min Ezipt wa mun-ɔn.» Yɛ Zakɔb waan: «Fa be wunnge wa man n yra mín nuan klanman m man be ke.»

¹⁰ Kɛ ɔ ´yo sɔ'n, wuun kpɛnngbɛn'n ɔ'a ti Zakɔb dan, i ti ɔ wun-man ase kpa kun. Yɛ Zozɛf fali be wunngeli i wun lɛ nan ɔ'a se be kɛ be `tɔ i nun.

¹¹ Yɛ ɔ seli Zozɛf kɛ: «Min bɔ n si-man kɛ n ko wun ɔ ekun'n, yɛ Nyanmiɛn man m'an wun ɔ mma mun yɛ.»

¹² Kpɛkuun Zozɛf man be fin i si ja su be jrali nan ɔ'a kɛn i wun ase lele i ti'n ɔ'a to asiɛ'n.

¹³ I sin'n, Zozɛf fali ba nnyɔn sɔ mun wunngeli Zakɔb wun lɛ. Kɛ ɔ ´yo sɔ'n, wuun Efraim o Zozɛf bɔbɔ i sa fama su yɛ ɔ o Zakɔb kusu i bɛ su, wuun Manase o i sa bɛ su yɛ ɔ o Zakɔb kusu i fama su.

¹⁴ Kpɛkuun Zakɔb fɛli i sa fama'n sieli Efraim b'ɔ ti kaan'n i ti'n su, yɛ ɔ fɛli i sa bɛ'n kusu sieli i Manase i ti'n su-ɔ. I nyinfu yɛ ɔ yoli i sɔ-ɔ, afin ɔ si kɛ Manase yɛ ɔ ti kpɛnngbɛn nin-ɔn.

¹⁵ Yɛ ɔ yrɛli i nuan klanman mannin Zozɛf-ɔ, ɔ seli kɛ: «Man Nyanmiɛn bɔ min nannan Abraam nin mín si Izaak be suli i'n, Nyanmiɛn b'ɔ niannin min su kɛ bua kankanfuɛ fa niɛn i bua'm be su sa lele yɛ ɔ'a fa ´ju yɛ'n,

¹⁶ nan anz ng'ɔ deli min sa yalɛ'n kwlakwla nun'n ɔ `yo ba nga'm be ye. Man n dunman'n ka be su. Man min nannan Abraam nin mín si Izaak be dunman'n ka be su. Man be trɛ kpa mɛn'n nun.»

¹⁷ Kɛ Zakɔb fɛli i sa fama'n sieli i Efraim i ti su'n, ɔ'a yo-man Zozɛf fɛ. I waan ɔ ´trɛ i si i sa'n nan ɔ ´fa sie i Manase ti'n su.

¹⁸ Ɔ seli i si kɛ: «Baba, nɛ́n i-ɔ, kpɛnngbɛnfuɛ'n yɛ.»

¹⁹ Sanngɛ i si ɔ'a di-man su. I waan: «N si sɔ mín wa, n si sɔ. Manase i osu liɛ'n ɔ ´trɛ wie, ɔ ´yo sran dan, sanngɛ i sinma'n ɔ ´yo sran dan trɛ i. I osu'n ɔ ´trɛ dan kpa.»

²⁰ Ɔ yrali be nguan cɛn sɔ'n nun, ɔ seli kɛ: «Sɛ Izraɛlfuɛ'm be ´yra sran nguan'n, man be ´bo amun dunman'n be ´se kɛ: ‹Nyanmiɛn man a yo kɛ Efraim nin Manase be sa.› » Ɔ fali Efraim dunnin Manase i nyrun.

²¹ I sin'n, ɔ seli Zozɛf kɛ: «N su wa wu, sanngɛ Nyanmiɛn nin amun ´tran, man ɔ fa amun sa amun sin amun nannan'm bé mɛn'n nun.

²² N ´uka ɔ lika liɛ'n su, ɔ man a ´nyan wie tra ɔ niaan mun. M'an fa lika nga n deli i Amɔrfuɛ'm bé sa nun alɛ nun'n m'an man wɔ.»