Bo Bolɛ 47 - NYANMIƐN NDƐ'N 1998

¹ Yɛ Zozɛf ɔli-ɔ, ɔ ko seli Ezipt famiɛn'n kɛ: «Min niaan'm be nin mín si be fin Kanaan mɛn'n nun, be nin be bua nin bé boli nin be nannin mun, ɔ nin bé sa nun ninnge'n kwlaa b'a ba, be o Gozɛn akpasua'n su lɔ.»

² Ɔ fɛli i niaan'm be nun nnun kleli Ezipt famiɛn'n.

³ Yɛ Ezipt famiɛn'n usali be kɛ: «?Nguɛ junman yɛ an di-ɔ?» Be tɛli i su kɛ: «E ti nnɛn tafuɛ kɛ é si'm be sa.»

⁴ Yɛ be seli Ezipt famiɛn'n kɛ: «E bali kɛ e wa tran ɔ́ mɛn'n nun wa. E boli nin e bua'm be lɛ-man didiwlɛ kun awe'n bɔ ɔ'a kpɛn Kanaan mɛn'n nun lɔ'n ti. I ti-ɔ, nannan, e waan a fa Gozɛn lika'n man e man e tran nun.»

⁵ Kpɛkuun Ezipt famiɛn'n seli Zozɛf kɛ: «Ɔ niaan mun yɛ b'a ba ɔ́ wun yɛ.

⁶ Ezipt mɛn wunmuan'n yɛ ɔ o lɛ-ɔ, nian lika ng'ɔ ti kpa'n nan fa be sie nun. Gozɛn akpasua'n yɛ ɔ o lɛ-ɔ, man be tran nun. Sɛ a nian nan sran nanndoliɛfuɛ o be nun'n, man be nian min nnɛn'm be su.»

⁷ Kɛ Zozɛf fɛli i si Zakɔb bali'n, ɔ fɛli i ko kleli Ezipt famiɛn'n nan Zakɔb ɔ'a yo i like.

⁸ Ezipt famiɛn'n usali Zakɔb kɛ: «?W'a di afuɛ nnyɛ?»

⁹ Zakɔb tɛli i su kɛ: «M'an tu m'an tran mɛnmɛn wie'm be nun lele afuɛ ya afuɛ ablasan. Sa yalɛ sunman nyannin min, i ti m'an yo oke ndɛ. N su cɛ-man kɛ mín si'm be sa, kusu be yoli wlan-wlan sinfuɛ wie kɛ min sa.»

¹⁰ Yɛ Zakɔb kaleli Ezipt famiɛn'n nan ɔ'a jaso ɔ'a ɔ.

¹¹ Zozɛf sieli i si nin i niaan mun Ezipt i lika kpa'n nun. Ɔ sieli be Ramsɛs nvle'n nun kɛ Ezipt famiɛn'n fa kannin'n sa.

¹² Zozɛf niannin i si nin i niaan'm bé nuan su mannin be like diwa.

Zozɛf i Ezipt mɛn'n i sielɛ awe blɛ'n nun

¹³ Awe'n jrannin kekle kpa Eziptfuɛ nin Kanaanfuɛ'm be su, be nyan-man like be di-mɛn kun.

¹⁴ Eziptfuɛ nin Kanaanfuɛ'm be sika nga be fa ba ble'n tolɛ'n, Zozɛf yɛ be fa mɛn i-ɔ. I kusu fa sika sɔ'n sie i Ezipt famiɛn'n i awlo lɔ.

¹⁵ Sika'n wieli Eziptfuɛ nin Kanaanfuɛ'm bé sa nun. Kpɛkuun Eziptfuɛ'm be ko toli Zozɛf be seli i kɛ: «Man ye aliɛ. ?Sika bɔ e lɛ-mɛn i'n ti e ´wu ɔ nyrun lɛ sa?»

¹⁶ Zozɛf tɛli be su kɛ: «Sɛ an lɛ-man sika kun'n, an `fa amun nnɛn mun bla nan m man amun aliɛ.»

¹⁷ Yɛ be ´fa be nnɛn'm be ´ba yɛ Zozɛf ´man be aliɛ-ɔ. Afuɛ sɔ'n nun be fali be nnɛn kpanngɔ mun, nin be bua mun, nin bé boli mun, nin be nannin mun, nin be aflunmun mun, be kwlakwla bali, kpɛkuun Zozɛf mannin be aliɛ.

¹⁸ Kɛ afuɛ nuan'n yiali'n, be ko toli Zozɛf ekun be seli i kɛ: «Nannan, e laka-man wɔ, sika'n ɔ'a wie é sa nun, nnɛn'm be kusu e fali be kwlakwla e mannin wɔ. Like kunngba nga e lɛ i siɛn'n yɛlɛ e bɔbɔ nin ye asiɛ'n.

¹⁹ ?A ´yaci e lɛ e ´wu yɛ e asiɛ'm be ´ka lɛ sa ngbɛn? To e nin e asiɛ mun, man e yo Ezipt famiɛn'n i sran nan man ye aliɛ. Man e like man e lua nan awe'n ɔ'a kun-man ye nan e asiɛ'm b'a ka-man lɛ ngbɛn.»

²⁰ Yɛ Zozɛf toli Ezipt asiɛ'n kwlaa mannin Ezipt famiɛn nin-ɔn. Kɛ awe'n ´kle Eziptfuɛ'm be yalɛ'n, be yoli be asiɛ'm be atɛ, ɔ man Ezipt asiɛ'n kwlaa yoli Ezipt famiɛn'n i liɛ.

²¹ Sran'm be kusu, kɛ ɔ fɛ i Ezipt i bue kun lele fa kpɛn i bue kun ekun lɔ'n, Zozɛf man be yoli kanga.

²² Asiɛ nga ɔ'a to-man'n yɛlɛ amuɛn nyrun tranfuɛ'm be asiɛ'n, afin Ezipt famiɛn'n bɔbɔ yɛ ɔ ta sran sɔ mun-ɔn. I yɛ ɔ man be like yɛ be di-ɔ. I ti yɛ b'a yo-man be asiɛ'n i atɛ nin-ɔn.

²³ Zozɛf seli sran'm be kɛ: «M'an to amun nin amun asiɛ mun andɛ m'an man Ezipt famiɛn'n. Like yɛ, an `lua,

²⁴ nan sɛ i kpɛlɛ ju'n, an `bu nun nnun nan an `fɛ i bue kun fa man Ezipt famiɛn'n. I bue nnan ng'ɔ ka amún sa nun'n, amun nin amun mma nin amun awlofuɛ mun an `lua wie, yɛ an `di wie.»

²⁵ Be tɛli i su kɛ: «Nannan, ɔ li bɔ a de ye sa'n, man e yo Ezipt famiɛn'n i kanga, nga e ´srɛ wɔ'n yɛlɛ kɛ a `yo e ye titi.»

²⁶ Zozɛf fali ng'ɔ yoli i lɛ'n kacili mmla bɔ ndɛ nin ndɛ be tɛ di su: Ezipt lɔ fie nga be di'n, i su like be bu nun nnun, kun ti Ezipt famiɛn'n i liɛ. San amuɛn nyrun tranfuɛ'm be asiɛ liɛ'n yɛ ɔ'a yo-man Ezipt famiɛn'n i liɛ-ɔ.

Zakɔb waan sɛ ɔ wu'n nán Zozɛf sie i Ezipt lɔ

²⁷ Izraɛl trannin Ezipt lɔ. Kɛ ɔ wo Ezipt lɔ'n ɔ trannin Gozɛn akpasua'n su. Ɔ nin i fuɛ'm be nyannin asiɛ. Be wuli ba kpanngban. Be trɛli kpa.

²⁸ Zakɔb dili afuɛ blu-nin-nso Ezipt lɔ. I afuɛ'n kwlakwla yoli afuɛ ya afuɛ ablanan-nin-nso.

²⁹ Kɛ ɔ ´nian b'ɔ su wa wu'n, ɔ flɛli i wa Zozɛf, ɔ seli i kɛ: «Sɛ min ndɛ lo wɔ'n, yaci fa ɔ́ sa'n wla min sɔwa'n bo b'ɔ kle kɛ a su ta min nda kɛ a ´yo min ye nan a su yi-man min ase. Srɛlɛ yɛ n ´srɛ wɔ-ɔ, nán sie min Ezipt wa.

³⁰ Sɛ n wu'n, fa min fuɛn'n kɔ ko sie min mín si'm be asieliɛ liɛ'n nun.» Yɛ Zozɛf waan: «N tili, n ´nian nga a kannin'n su n ´yo.»

³¹ Zakɔb waan: «Ta min nda.» Nan Zozɛf ɔ'a tɛ i nda. Kpɛkuun Zakɔb kplɛnnin i ti ase i bɛ'n su kan i ti'n kaci lɔ'n, ɔ lali Zozɛf ase.