Bo Bolɛ 46 - NYANMIƐN NDƐ'N 1998

Zakɔb i Ezipt kɔlɛ

¹ Yɛ Izraɛl ´fɛ i sa nun ninnge'n kwlaa ´kɔ-ɔ. Ɔ ko juli Beɛr-Seba nan ɔ'a sɔ i si Izaak i Nyanmiɛn'n .

² Kpɛkuun Nyanmiɛn kannin ndɛ aolia nun kleli i. Ɔ flɛli i, i waan: «Zakɔb! Zakɔb!» Zakɔb waan: «M'an sro!»

³ Yɛ Nyanmiɛn seli kɛ: «Nyanmiɛn'n yɛlɛ min. Ɔ si i Nyanmiɛn'n yɛlɛ min. Nán srɛ kun wɔ Ezipt kɔlɛ nun. Lɔ yɛ n ´yo man ɔ osu'n ´kaci nvle dan-an.

⁴ Min yɛ n ´ko sunman wɔ lɔ-ɔ. Min yɛ n ´ko fa wɔ yɛ a ´tu lɔ ´ba-a. Sɛ a wu'n, Zozɛf yɛ ɔ ´kata ɔ́ nyinma nin-ɔn.»

⁵ Yɛ Zakɔb tuli i bo Beɛr-Seba lɛ-ɔ. I mma'm be fɛli i nin bé yi mun, ɔ nin be mma mun kakaklolo nga Ezipt famiɛn'n yoli man be fa ɔli kɛ be fa fa be'n nun.

⁶ Be fali be nnɛn nin ninnge nga be nyannin be Kanaan mɛn'n nun lɔ'n. Zakɔb nin i osu wunmuan'n yɛ be ɔli Ezipt nin-ɔn.

⁷ Ɔ fɛli i mma yasua mun nin i anunman yasua mun, ɔ nin i mma yasua mun nin i anunman mmla mun. Ɔ fɛli i osu wunmuan'n.

Zakɔb i osu'n yɛ

⁸ Izraɛl i osu'n nun sran nga be ɔli Ezipt'n be dunman mun yɛ. Zakɔb bɔbɔ, i mma mun, yɛ i anunman mun. Zakɔb i wa kpɛnngbɛn'n yɛlɛ Ribɛn.

⁹ Ribɛn wuli Enɔk, Pali, Ɛzrɔn yɛ Karmi.

¹⁰ I wa'n kun ekun yɛlɛ Simeɔn. Simeɔn wuli Zɛmiɛl, Zamɛn, Ɔad, Zakɛn, Zosar, yɛ Sial. Ɔ nin Kanaan bla yɛ be wuli Sial-ɔ.

¹¹ Kun ekun yɛlɛ Levi. Levi wuli Gɛrsɔn, Keat, yɛ Mɛrari.

¹² Kun ekun yɛlɛ Zida. Zida wuli Ɛr, Ɔnan, Sela, Perɛs yɛ Zerak. Sanngɛ Ɛr nin Ɔnan be wuli Kanaan mɛn'n nun lɔ. Perɛs wuli Ɛzrɔn yɛ Amil.

¹³ Kun ekun yɛlɛ Isakar. Isakar wuli Tola, Piva, Zɔb yɛ Simrɔn.

¹⁴ Kun ekun yɛlɛ Zabilɔn. Zabilɔn wuli Serɛd, Elɔn, yɛ Zaleɛl.

¹⁵ Ba nga Zakɔb nin Lea be wuli be Mezopotami lɔ mun yɛ be o lɛ-ɔ. Be mma yasua nin bla mun be ti ablasan-nin-nsan, b'a ka-man Dina b'a wla-man nun.

¹⁶ Zakɔb i wa'n kun ekun yɛlɛ Gad. Gad wuli Zifzɔn, Agi, Sini, Ɛsbɔn, Eri, Arɔdi, yɛ Areeli.

¹⁷ Kun ekun yɛlɛ Azɛr. Azɛr wuli Zimna, Zisva, Zisvi, Bɛria yɛ be niaan bla Serak. Bɛria wuli Ebɛr yɛ Malkiɛl.

¹⁸ Lea i afanniɛn bla bɔ be flɛ i kɛ Zilpa'n, bɔ Laban fa mɛnnin i, ɔ nin Zakɔb be mma mun nin be anunman mun bɔ be wuli be'n yɛ be o lɛ-ɔ. Be ti sran blu-nin-nsiɛn.

¹⁹ Zakɔb nin i yi Rasɛl be mma liɛ mun yɛlɛ Zozɛf yɛ Bɛnzamɛn.

²⁰ Zozɛf wuli Manase nin Efraim Ezipt lɔ. Ɔ nin Eliopolis i amuɛn i nyrun tranfuɛ bɔ be flɛ i kɛ Potifera i wa bla Asnat yɛ be wuli be-ɔ.

²¹ Bɛnzamɛn kusu wuli Bela, Bekɛr, Asbɛl, Gera, Naaman, Ei, Rɔs, Mipim, Ipim yɛ Ard.

²² Zakɔb nin Rasɛl be mma mun nin be anunman mun yɛ be o lɛ-ɔ. Be kwlakwla be ti sran blu-nin-nnan.

²³ Zakɔb i wa'n kun ekun yɛlɛ Dan. Dan wuli Isim.

²⁴ Kun ekun yɛlɛ Nɛftali. Nɛftali wuli Zazɛɛl, Gini, Zezɛr yɛ Silɛm.

²⁵ Afanniɛn bla bɔ be flɛ i kɛ Bila'n, bɔ Laban fa mannin Rasɛl'n, ɔ nin Zakɔb be mma mun nin be anunman mun yɛ be o lɛ-ɔ. Be kwlaa be ti sran nso.

²⁶ Zakɔb i klun ba mun nin i anunman mun bɔ be nin i bali Ezipt'n be kwlakwla be ti sran ablesiɛn-nin-nsiɛn. B'a kɛ-mɛn i mma'm bé yi mun b'a wla-man nun.

²⁷ Kɛ be fa ba nga Zozɛf wuli be Ezipt lɔ mun uka su'n, wuun Zakɔb i osu'n nunfuɛ'm be kwlakwla b'a yo sran ableso.

Zakɔb i Ezipt lɔ julɛ

²⁸ Zakɔb sunmannin Zida kɛ ɔ dun mmua be nyrun ko se Zozɛf kɛ man ɔ nin i be yia Gozɛn lɔ. Yɛ Zakɔb nin i fuɛ'm be ɔli be juli Gozɛn lɔ-ɔ.

²⁹ Yɛ Zozɛf siesieli i kakaklolo'n nan ɔ'a fu nun ɔ'a ɔ nan ɔ nin i si b'a yia Gozɛn. Kɛ ɔ juli lɛ cɛ'n yɛ ɔ tɔli i si nun-ɔn, nan ɔ'a sun kpa.

³⁰ Yɛ Zakɔb seli Zozɛf kɛ: «Kɛ ɔ́ nyin tɛ o su bɔ m'an wun wɔ'n, sɛ n wu siɛn nin-ɔn ɔ yo-man sa fi kun.»

³¹ Zozɛf seli i niaan mun nin i si i awlo nunfuɛ'n m be kɛ: «N ´kɔ, n ´ko se Ezipt famiɛn'n kɛ: ‹Min niaan mun nin mín si i awlofuɛ bɔ be o Kanaan mɛn'n nun lɔ'n b'a ju wa.

³² Be ti nnɛn tafuɛ. Be ta boli nin bua. Be ´ba-a, be fali be bua, nin bé boli, nin be nannin mun, ɔ nin bé sa nun ninnge'n kwlakwla bali.›

³³ Cɛn nga Ezipt famiɛn'n flɛ amun usa amun kɛ nguɛ junman yɛ an di'n,

³⁴ an `tɛ su kɛ: ‹Kɛ ɔ fɛ i e kaan nun lele b'ɔ ´fa ju andɛ'n, e ti nnɛn tafuɛ kɛ é si'm be sa.› I liɛ'n kpɛkuun an ´tran Gozɛn mɛn'n nun. Afin Eziptfuɛ'm be nin boli nin bua tafuɛ'm be tran-man likawlɛ, ɔ ti be ciliɛ.»