Bo Bolɛ 45 - NYANMIƐN NDƐ'N 1998

Zozɛf i wun b'ɔ yi kleli i niaan mun'n

¹ Zozɛf trɛ i anwlɛn siɛn'n sran nga be o i wun lɛ'n be nyrun-ɔn, ɔ yo-man ye kun. Yɛ ɔ kpan seli kɛ: «Amun kwlaa amun `fite.» Ɔ man ɔ nin i niaan'm be ngunmin yɛ be kali lɛ nan ɔ'a fɛ i wun ɔ'a kle be.

² Sanngɛ ɔ sunnin kekle, ɔ man Eziptfuɛ'm be tili. Ezipt famiɛn'n i awlo lɔfuɛ'm be kusu be tili.

³ Zozɛf seli i niaan'm be kɛ: «Zozɛf'n yɛlɛ min. ?Mín si tɛ o lɛ?» I niaan'm be tɛ i su-ɔ ɔ yo-man ye, be akunndan'n bɔ ɔ'a sanngan dan'n ti.

⁴ Zozɛf waan: «An `wunnge mín wun wa.» Yɛ be wunngeli i wun lɔ-ɔ. Ɔ seli be kɛ: «Amun niaan bian Zozɛf bɔ an yoli i atɛ bɔ be toli i be bali Ezipt wa'n, min-ɔn.

⁵ Sanngɛ nán amun akunndan sanngan, nán an koko se kɛ: ‹?Nguɛ ti yɛ e yoli i atɛ bɔ be fɛli i bali wa-a?› Afin kɛ ɔ ´yo nan amu'an wu-man'n i ti yɛ Nyanmiɛn yoli man n dunnin mmua amun nyrun wa-a.

⁶ Afin kɛ awe'n kpɛnnin mɛn'n nun'n, ɔ'a di afuɛ nnyɔn. Ɔ tɛ ka afuɛ nnun ekun bɔ be di fie-ɔ, ɔ su yo-man kpa nan se kɛ like yɛ be ´nyɛn i-ɔ.

⁷ Nyanmiɛn yoli man n dunnin amun nyrun mmua wa nan ɔ'a de amun, nan amu'an fite nun, nan amu'an kwla tran mɛn nga nun.

⁸ Nanwlɛ, nán amun yɛ man m bali wa-a. Nyanmiɛn-ɔn. I fanngan nun m'an kaci Ezipt famiɛn'n i anwlɛn su sran. Min yɛ n sie i awlo nin-ɔn. N kunngba'n n ti Ezipt mɛn wunmuan'n su kpɛn.

⁹ Ɔ man an `wɔ mín si sin ndɛndɛ an ko se i kɛ: ‹Ɔ wa Zozɛf waan: Nyanmiɛn'n sieli min Ezipt wunmuan'n i siefuɛ i ti nán sisi ɔ́ bo bla.

¹⁰ N ´sie wɔ Gozɛn nvle'n nun mín wun koko wa. Ɔ mma mun nin wɔ anunman mun, nin ɔ bua mun, nin ɔ boli mun, nin ɔ nannin mun, ɔ nin ɔ́ sa nun ninnge'n kwlaa, n ´sie be min wun koko wa wie.

¹¹ Sɛ a ba'n, m ´man wɔ aliɛ a ´di. Ɔ man a nin ɔ osufuɛ mun, ɔ nin ɔ nnɛn mun'n, like fi su mian-man amun awe afuɛ nnun ng'ɔ tɛ ka'n nun.› »

¹² Amun bɔbɔ amún nyin ta min, min niaan Bɛnzamɛn kusu i nyin ta nun jrɛiin kɛ min-ɔn. Nán be waan-an, m bɔbɔ min waan-an.

¹³ An `kan sa su nga m'an nyɛn i Ezipt wa'n nin like nga amun bɔbɔ amun wunnin i'n i nun ndɛ kle mín si, nan amun nin i be bla wa ndɛndɛ.

¹⁴ Yɛ ɔ ´tɔ Bɛnzamɛn nun yɛ ɔ ´sun-ɔn. Bɛnzamɛn kusu lɛ sunlɛ.

¹⁵ Ɔ tɔli i niaan'm be kwlaa be nun wie, ɔ sunnin, yɛ kpɛkuun i niaan'm be nin i kokoli yalɛ-ɔ.

Ezipt famiɛn'n i Zakɔb i yialɛ

¹⁶ Kɛ e ´ijɔ wa yɛ'n, Ezipt famiɛn'n i awlo lɔfuɛ'm be kwlaa b'a ti i kɛ Zozɛf i niaan'm b'a ba. Kɛ Ezipt famiɛn'n tili ndɛ sɔ'n, ɔ yoli i nin i mantanfuɛ'm be fɛ.

¹⁷ Ezipt famiɛn'n seli Zozɛf kɛ: «Se ɔ niaan'm be kɛ be cici be nnɛn'm be sin trɔ'm nan be sa bé sin wɔ Kanaan mɛn'n nun lɔ,

¹⁸ nan be nin bé si nin be osufuɛ'm be bla mín wun wa. Ezipt wa lika klanman'n ´yo be liɛ. Aliɛ kpakpa ng'ɔ o wa'n, be ´nyan wie be ´di.

¹⁹ Se be kɛ be `fa Ezipt wa kakaklolo'n wie be fa sua bé yi nin be mma mun, ɔ nin bé si be bla.

²⁰ Nán be koko be ninnge nga be ´ka lɔ'n be ti. Kan be wa tran lɛ'n yɛ ɔ ti Ezipt lika'n i nun kpa nin-ɔn.»

²¹ Izraɛl i mma'm be niannin ndɛ nga be kleli be'n su yoli. Zozɛf mannin be kakaklolo kɛ Ezipt famiɛn'n fa kannin'n sa. Ɔ mannin be ninnge nga be ko di i atin'n nun'n.

²² Ɔ cɛcɛli be tralɛ kpakpa'm be ti nun ti nun. Kpɛkuun ɔ mannin Bɛnzamɛn jɛtɛ ufue ya nsan nin tralɛ kpakpa nnun.

²³ Ɔ fali Ezipt lɔ ninnge kpakpa wie mun wlali trɔ, nan ɔ'a fa sie aflunmun yasua blu bé sin, kpɛkuun ɔ wlali ble nin kpaun, ɔ nin aliɛ fanunfanun trɔ, nan ɔ'a fa sie aflunmun bla blu bé sin. I waan be `fa ko mɛn i si kɛ i atin'n nun aliɛ-ɔ.

²⁴ Yɛ ɔ mannin be atin be ɔli-ɔ. Ɔ seli be kɛ: «Nán an kpɛ ndɛ atin'n nun.»

²⁵ Yɛ be fɛli i Ezipt lɛ be ɔli Kanaan mɛn'n nun be ko toli bé si Zakɔb-ɔ.

²⁶ Be seli i kɛ: «Zozɛf i nyin tɛ o su! Kannzu i yɛ ɔ sie Ezipt mɛn wunmuan nin-ɔn.» Sanngɛ ndɛ nga be kɛnnin i lɛ'n ɔ'a yo-man Zakɔb i like fi, afin ndɛ nga be ´kɛn lɛ'n, ɔ lafi-man su.

²⁷ Nan b'a kan ngaliɛ nga Zozɛf kaleli'n b'a kle i. Zakɔb ´nian-an, kakaklolo nga Zozɛf fa bali kɛ be fɛ i nun be bla'n yɛ. Kɛ ɔ wunnin i sɔ'n yɛ ɔ wunnin i wlɛ sakpa-a.

²⁸ Yɛ ɔ seli kɛ: «Aa, sɛ mín wa Zozɛf i nyin tɛ o su'n, wuun n kpa'n n koko-man kun. N kɔ n ´ko wun i wun ka nan m'an wu.»