Bo Bolɛ 43 - NYANMIƐN NDƐ'N 1998

Zakɔb mannin atin kɛ Bɛnzamɛn wɔ Ezipt'n wie

¹ Awe'n yoli kekle kpa Kanaan mɛn'n nun.

² Ɔ man kɛ be wieli ble nga be ko fɛli i Ezipt bali'n di'n, Zakɔb seli i mma'm be kɛ: «An `wɔ lɔ ekun, an `ko to aliɛ kan bla.»

³ Yɛ Zida tɛli i su kɛ: «Bian'n kaleli ye kpongbogbo, i waan sɛ e nin e niaan'n y'a ɔ-man'n, nán i nyinma gua é wun.

⁴ Ɔ man sɛ ɔ waan ɔ nin e wɔ'n, i liɛ e ´ko to aliɛ e ´blɛ wɔ.

⁵ Nan sɛ kusu a kplin-man su'n, e kɔ-man, afin bian'n seli ye kɛ sɛ e nin e niaan'n y'a ɔ-man'n, nán i nyinma gua é wun.»

⁶ Izraɛl kusu usali be kɛ: «?Sanngɛ nguɛ ti yɛ an yoli min tɛ sɔ bɔ an seli bian sɔ'n kɛ an lɛ niaan uflɛ wa nin-ɔn?»

⁷ Be tɛli i su kɛ: «Ɔ usali ye sa sunman, ɔ usali é wun ndɛ nin e osufuɛ'm bé wun ndɛ. Ɔ usali ye kɛ: ‹?Amún si i nyin tɛ o su? ?An lɛ niaan uflɛ?› ?Kɛ ɔ ´usa e bɔ e ´tɛ su lɛ'n, e si kɛ ɔ wa se e kɛ e fa e niaan'n e bla?»

⁸ Yɛ Zida seli i si kɛ: «Ɔ li yaci ba'n m bɔbɔ mín sa nun, man e nin i e wɔ nan awe'n ɔ'a kun-man wɔ nin e bɔbɔ nin e mma mun, nan y'a wu-man.

⁹ Fɛ i wla mín sa nun. Sɛ m'an fɛ-mɛn i m'an blɛ-man wɔ nan ɔ nyinma ɔ'a guɛ-mɛn i wun'n, a nin min ko kan. I liɛ'n, sɛ a nin min ´nyan ndɛ tititi'n, wuun ɔ ndɛ'n yo fɛ.

¹⁰ Sɛ ɔ ti kɛ y'a bo-man kokowa sa'n, wuun kɛ e ´se yɛ'n y'a ɔ y'a ba kpɛ nnyɔn bɔbɔ.»

¹¹ Zakɔb waan: «Afin bɔ e lɛ-mɛn i yowlɛ uflɛ nin-ɔn, n ´yo i sɛ. Sɛ an ´kɔ'n, an `fa é mɛn'n nun wa ninnge kpakpa'n wie ko man bian sɔ'n. An `fa nyanngo nin ayre fannin, nin awɛma nzue, nin wlɛwlɛ mma, ɔ nin amandie mma ko mɛn i.

¹² Amun `fa sika nga be fa wlali amun trɔ nun'n be `wɔ, atrɛkpa-a, bé sa fɔnnin. Yɛ amun `fa sika uflɛ tra nun ekun.

¹³ An `jaso, amun nin amun niaan'n be wɔ be ko to bian sɔ'n.

¹⁴ Man Nyanmiɛn b'ɔ kwla like kwlaa yo'n, ɔ `lualua bian sɔ'n nan ɔ `si amun aunnvuɛ ɔ yaci amun niaan'n Simeɔn nin Bɛnzamɛn be nun nan be nin amun bla. N liɛ, min mma'm be yaci-man mín sa filɛ le, n lɛ-man ndɛ.»

Zozɛf nin i niaan mun bé wun wunlɛ'n kpɛ nnyɔn su'n

¹⁵ Be fali ninnge nga be ´fa cɛ Zozɛf nin sika akpasua nnyɔn'n, yɛ be siesie bé wun nan be nin Bɛnzamɛn b'a ɔ Ezipt'n. Kɛ be juli lɔ'n, be ɔli Zozɛf wun lɔ.

¹⁶ Kɛ Zozɛf wunnin kɛ be nin Bɛnzamɛn bali'n, ɔ seli i awlo'n i su nianfuɛ'n kɛ: «Fa sran ngalɛ mun kɔ awlo. Kun nnɛn kun fa tɔn like. Be nin min yɛ be ´di like ndɛ midi su-ɔ.»

¹⁷ Yɛ bian'n niannin nga Zozɛf kannin'n su yoli-ɔ. Ɔ fali be wluli Zozɛf i awlo lɔ.

¹⁸ Kɛ be ´fa be ´wlu Zozɛf i awlo lɔ'n, srɛ kpa'n kɛ ɔ kun be sa. Be waan: «Kɛlɛ e klikli balɛ nun'n, sika nga be fa wlali e bajɛ'm be nun'n ti yɛ be su fa e be ´kɔ yɛ. Nga, be wa tɔ e su be ´yo e kpokokpoko, be ´fa e be ´yo be kanga, be ´de ye aflunmun mun.»

¹⁹ Yɛ be wunngeli Zozɛf i awlo'n i su nianfuɛ'n i wun lɔ awlo'n i anuan'n nun lɔ-ɔ, nan b'a se i kɛ:

²⁰ «Nja, yaci, y'a ba aliɛ tolɛ wa kun laa.

²¹ Kɛ e ´kɔ bɔ e juli kan e ´ko la atin'n nun lɛ'n, e ´tike e bajɛ'm be su o, e sika'n yɛ ɔ o bajɛ'm be nun sɛsɛsɛ yɛ. Sika'n i kilo kunngba'n bɔ cɛ yɛ ɔ o bajɛ'm be nun-ɔn. E fa bali, yɛ ɔ o yɛ.

²² E fali sika uflɛ e bali, aliɛ nga e wa to'n i liɛ-ɔ. E si-man sran ng'ɔ fali sika'n wlali e bajɛ'm be nun'n.»

²³ Bian'n tɛli be su kɛ: «An `gua amún wla ase, nán srɛ kun amun. Amun Nyanmiɛn'n, amún si i Nyanmiɛn'n yɛ ɔ fali sika sɔ'n sieli amun bajɛ'm be nun-ɔn. Amun sika'n kannin mín sa.» Kpɛkuun yɛ ɔ yili Simeɔn ɔ fiteli-ɔ. Simeɔn wa trannin bé wun lɛ.

²⁴ Bian'n fa be wluli Zozɛf i awlo lɔ. Ɔ mannin be nzue be wunnzinnin bé ja. Ɔ mannin be aflunmun'm be ijre.

²⁵ Yɛ be siesieli be like nga be ´fa cɛ Zozɛf. Be siesieli ka nan midi ɔ'a ju, afin Zozɛf ba midi su. Be dun mmua tili i kɛ be ´di like lɛ.

²⁶ Kɛ Zozɛf juli awlo lɛ'n, be fali ninnge'm be mɛnnin i, be kotoli i bo.

²⁷ Zozɛf usali be kɛ: «?Amún wun ti kpa? ?Amún si oke bɔ an kɛnnin i ndɛ'n i wun lɔun? ?Ɔ tɛ o lɛ?»

²⁸ Be tɛli i su kɛ: «E si'n wo lɛ, ɔ ti juejue.» Kpɛkuun be kotoli i bo ekun.

²⁹ Zozɛf ´nian-an, i niaan bian Bɛnzamɛn b'ɔ nin i be nin ti kun'n yɛ. Yɛ ɔ usali kɛ: «?Amun sinma kan nga amun kɛnnin i ndɛ'n yɛ?» Kpɛkuun Zozɛf seli i kɛ: «Mín wa, man Nyanmiɛn man a nyan muae klanman!»

³⁰ Kɛ Zozɛf wunnin i niaan Bɛnzamɛn'n, ayrɛ nzinma ka lɛ guɛli i wun, ɔ jran lɛ-ɔ ɔ yo-man ye kun, nan ɔ'a wlu i sua ba'n nun lɔ ndɛndɛ ɔ'a ɔ sunlɛ.

³¹ Ɔ wunnzinnin i nyrun yɛ ɔ bali-ɔ. Kɛ i nyin muɛn nzue'n waan ɔ ´ba'n, ɔ trɛli i anwlɛn. Kpɛkuun i waan: «An `cɛ aliɛ'n.»

³² Be tili i liɛ ngunmin, be tili i niaan'm be liɛ ngunmin, kpɛkuun be tili Eziptfuɛ ng'ɔ nin be di like'n be liɛ ngunmin. Afin Eziptfuɛ'm be nin Ebre'm be di-man like likawlɛ. I sɔ'n ti tete Eziptfuɛ'm be nyrun.

³³ Zozɛf i niaan'm be trantrannin i nyrun ndɛnmansu, be trantran kpɛnngbɛn nun yɛ be ba-a. Kɛ bé nuan'n bo bé wun sa, be wun-man ndɛ nga be `kan be kle be wiengu-ɔ.

³⁴ Zozɛf man be fɛli i tabli'n su ninnge'n wie mannin be. Bɛnzamɛn liɛ ng'ɔ kpɛ mɛnnin i'n, i dan tra be kwlaa be liɛ'n kpɛ nnun. Be nin i be nɔnnin nzan lele ɔ tili be.