Bo Bolɛ 42 - NYANMIƐN NDƐ'N 1998

Zozɛf i niaan'm be Ezipt kɔlɛ klikli'n

¹ Zakɔb ´ti-ɔ, be waan be nyan ble Ezipt lɔ, yɛ ɔ usali i mma'm be kɛ: «?Kɛ an ´tran be nian-nian be wiengu sa?

² N tili i kɛ be nyan ble Ezipt lɔ. An `wɔ lɔ be ko to wie nan awe ɔ'a kun-man ye.»

³ Yɛ Zozɛf i niaan'm be nun blu be ɔli Ezipt ble tolɛ-ɔ.

⁴ Zakɔb yoli man Zozɛf i niaan Bɛnzamɛn ɔ'a ɔ-man wie. I waan: «Ɔ cɛ-man nan like wie ɔ'a ko yo i.»

⁵ Izraɛl i mma'm be nin sran uflɛ wie'm be yiali ble atɛ yowlɛ lɔ. Afin awe'n kpɛnnin Kanaan mɛn wunmuan'n nun.

Zozɛf wlan-wlannin i niaan mun

⁶ Zozɛf yɛ ɔ sie mɛn sɔ nin-ɔn. Ble nga be yo i atɛ sran'm bé sa nun'n, i yɛ ɔ niɛn i kwlaa su-ɔ. I niaan'm be wa kotoli i bo klo!

⁷ Kɛ Zozɛf wunnin be'n, ɔ wunnin be wlɛ. Sanngɛ ɔ yoli i wun kɛ sran b'ɔ si-man be sa, ɔ nin be kannin ndɛ kekle. Ɔ usali be kɛ: «?An fin nin?» Be tɛli i su kɛ: «E fin Kanaan mɛn'n nun. E bali aliɛ tolɛ.»

⁸ Zozɛf wun be wlɛ sanngɛ be liɛ'n b'a wun-mɛn i wlɛ.

⁹ Zozɛf i wla kpɛnnin laliɛ ng'ɔ cɛnnin be'n be su, kpɛkuun ɔ seli be kɛ: «An bali é mɛn'n i kpla nianlɛ. An bali mɛn'n i lika nga an sin lɛ be yo sa-a ɔ yo ye'n i nzɔliɛ sielɛ.»

¹⁰ Be waan: «Cɛcɛ, nannan, aliɛ tolɛ yɛ e bali-ɔ.

¹¹ E kwlaa nga e o yɛ'n é si ti kun. E di nanwlɛ. Nán mɛn'n i kpla nianlɛ yɛ e bali-ɔ.»

¹² Zozɛf waan: «Ato-ɔ! An bali mɛn'n i lika nga be sin nun be yo sa-a ɔ yo ye'n i nzɔliɛ sielɛ.»

¹³ Be tɛli i su kɛ: «Nannan, é si wuli e blu-nin-nnyɔn. E fin Kanaan mɛn'n nun lɔ yɛ e ba-a. E nun kaan'n kali é si i wun lɔ. Kun kusu nun-man nun.»

¹⁴ Zozɛf waan: «?Nɛ́n i ti yɛ n seli kɛ an ti mɛn'n i kpla nianfuɛ mun nin-ɔn?

¹⁵ Sanngɛ n wa sa amun n nian. N kan Ezipt famiɛn'n ti, sɛ amun sinma'n ɔ'a to-man amun wa'n, n su yaci-man amun nun amun kɔ-man.

¹⁶ An `sunman amun nun kun man ɔ ko fa amun niaan bian'n bla, amun nga mun n ´wla amun bisua. N ´nian sɛ an di nanwlɛ o. N kan Ezipt famiɛn'n ti, sɛ ɔ'a yo-man sɔ'n, wuun an ti mɛn'n i kpla nianfuɛ.»

¹⁷ Nan ɔ'a wla be bisua cɛn nsan.

¹⁸ I cɛn nsan'n su'n, Zozɛf seli be kɛ: «Min nyin yi Nyanmiɛn, i ti, n wa kle amun sa kun. Sɛ amun nian su yo'n, amun ´fite nun.

¹⁹ Sɛ an di nanwlɛ sakpa'n, man amun nun kun ka bisua wa nan amun nga mun an `wɔ. Awe'n ti an `fa aliɛ'n be ko man amun osufuɛ mun.

²⁰ Nan an `fa amun sinma kan'n be blɛ min. I liɛ'n e ´wun kɛ an di nanwlɛ sakpa, yɛ be su kun-man amun.» Be kplinnin su.

²¹ Be seli be wiengu kɛ: «Tɛ nga e yoli e niaan'n, i su afɛ yɛ e su fɛ i yɛ. E wunnin i wla b'ɔ boli blɛ b'ɔ se e kɛ e yaci'n nan e si i aunnvuɛ'n, sanngɛ y'a si-mɛn i aunnvuɛ. Siɛn'n, awlaboɛ kunngba ng'ɔ tɔli i su'n, i wie yɛ ɔ'a tɔ e su yɛ.»

²² Yɛ Ribɛn waan: «?Kɛ n seli amun kɛ nán an yo ba sɔ'n i tɛ'n, an fali amún su tieli? Siɛn'n yɛ e su wa tannin i wie'n i kalɛ yɛ.»

²³ Be si-man kɛ Zozɛf ti, afin sɛ ɔ ´kan ndɛ kle be'n, ɔ fa sran yɛ ɔ ijɔ i nuan-an.

²⁴ Zozɛf jasoli bé wun lɛ ɔli sunlɛ. Ɔ ɔli bali, ɔ wa seli be kɛ ɔ ´tra Simeɔn ase. Ɔ man be cili Simeɔn be nyrun lɛ.

Zakɔb i mma'm be sin salɛ

²⁵ Zozɛf man be guɛli i niaan'm be bajɛ'm be nun ble be yili. Kpɛkuun Zozɛf man be fali be sika mun sieli be trɔ'm be nun sɛsɛsɛ. Yɛ i waan be `man be aliɛ nga be ´kɔ-ɔ be ko di i atin nun, nan b'a yo i sɔ b'a man be.

²⁶ Yɛ be cicili ble'n be aflunmun'm be su yɛ be ɔli-ɔ.

²⁷ Kan be lali lɛ'n, be nun kun tikeli i bajɛ'n su kɛ ɔ ´mɛn i aflunmun'n i ijre, ɔ ´nian-an, i sika'n yɛ ɔ o i bajɛ'n nun yɛ.

²⁸ Ɔ seli i niaan'm be kɛ: «Min sika'n yɛ ɔ o min bajɛ'n nun yɛ. B'a fa-man.» Kpɛkuun bé sa sin bubuli be, be akunndan sanngannin, be usali bé wun kɛ: «?Nguɛ sa yɛlɛ nga Nyanmiɛn nin e yo i yɛ'n?»

²⁹ Be juli Kanaan mɛn'n nun lɔ, be kokoli sa ng'ɔ juli be su'n kleli bé si Zakɔb.

³⁰ Be seli kɛ: «Bian ng'ɔ sie lɔ mɛn'n, ɔ nin e tali su sa kpan, i waan y'a ɔ bé mɛn'n i kpla nianlɛ.

³¹ E seli i kɛ: ‹Sran kpa yɛlɛ e, e ti-man mɛn kpla nianfuɛ.

³² E si wuli ye yasua blu-nin-nnyɔn. Kun nun-man nun kun. Kaan'n kusu kali é si wun Kanaan lɔ.›

³³ Kpɛkuun mɛn'n i siefuɛ sɔ'n waan: ‹N wa nian amun ato nuan. Man amun nun kun ka wa. Awe'n ti an `fa like'n ko man amun osufuɛ mun.

³⁴ Nan sɛ an ´ba ekun'n, an `fa amun sinma kan'n be bla. Sɛ an yo sɔ'n, n ´wun kɛ sran kpa yɛlɛ amun sakpa nan nán mɛn kplafuɛ yɛlɛ amun. I liɛ'n, n ´fa amun niaan'n m ´man amun, kpɛkuun siɛn'n like nga amun waan amun ´yo i é mɛn'n nun wa'n, atin la nun.› »

³⁵ Kɛ be ´yi be trɔ mun'n, be ´nian-an be sika'n wo be nun sɛsɛsɛ. Kɛ be wunnin sika sɔ'n, srɛ kunnin be. Srɛ kunnin bé si Zakɔb wie.

³⁶ Yɛ Zakɔb waan: «Amun dunman nun ti man min mma'm be kwlaa b'a fi mín sa. Zozɛf fili mín sa, Simeɔn ekun, kpɛkuun Bɛnzamɛn i falɛ ndɛ yɛ an su kɛn i ekun-ɔn. Min yɛ n fɛ i kwlaa sɔ'n i su afɛ nin-ɔn.»

³⁷ Ribɛn waan: «Sɛ m'an fa-man Bɛnzamɛn m'an blɛ-man wɔ cɛ'n, mín wa yasua nnyɔn mun yɛ be o lɛ-ɔ, kun be. Fɛ i wla mín sa nun, n ´fɛ i n ´sa min sin m ´blɛ wɔ.»

³⁸ Zakɔb waan: «Cɛcɛ kun, nán mín wa liɛ'n yɛ ɔ nin amun ´kɔ-ɔ. I niaan'n wuli, i kunngba yɛ ɔ ka mín sa nun-ɔn. Kɛ an ´kɔ lɛ nan like wie ko yo i atin'n nun'n, oke nga m'an yo i yɛ'n, san klunngbɔ'n ´kun min.»