Bo Bolɛ 41 - NYANMIƐN NDƐ'N 1998

Ezipt famiɛn'n i laliɛ

¹ Afuɛ nnyɔn sinnin kpɛkuun Ezipt famiɛn'n cɛnnin laliɛ kun. Ɔ ´cɛn laliɛ nin-ɔn, ɔ o nzue ba nga be flɛ kɛ Nil'n i nuan.

² Ɔ ´nian-an, nannin bla nso be ti mlanmlan sa, be fin nzue'n nun lɔ b'a fite. Be o nzue'n nuan lɛ be ´didi.

³ I sin, nannin bla kokloo kainkain nso be fin nzue'n nun lɔ wie, be wa toli klikli mun nzue'n i nuan su lɛ.

⁴ Kpɛkuun nannin kokloo kainkain nso sɔ mun b'a di nannin dandan nglanman nso mun. Yɛ kpli, yɛ Ezipt famiɛn'n tinngeli-ɔ!

⁵ Ɔ wa lafili ekun nan ɔ'a cɛn laliɛ kun ekun.

⁶ Ɔ ´nian-an, ble ja kunngba ɔ'a wlɔ dandan nglanman-nglanman sɔ nso. Kpɛkuun ɔ wlɔli kainkain nso, wia afiliɛ lɔ aunngban klakla'n b'ɔ ´fita'n ɔ man ble mma kasiɛn sɔ'm be kpeseli.

⁷ Kpɛkuun ble mma kainkain sɔ'm b'a mɛn dandan bɔ ba o be nun'n. Yɛ kpli, yɛ Ezipt famiɛn'n tinngeli-ɔ! Kannzu laliɛ yɛ ɔ'a cɛn-ɔn.

⁸ Kɛ aliɛ'n cɛnnin'n, Ezipt famiɛn'n i akunndan'n sanngannin nan ɔ'a flɛ Ezipt lɔ atrɛ yifuɛ nin sa sifuɛ'm be kwlakwla, nan ɔ'a kɛn i laliɛ'n ɔ'a kle be. Sanngɛ be wie fi ɔ'a kwla tu-mɛn i bo ɔ'a kle-mɛn i .

⁹ Yɛ nzan sufuɛ'm be kpɛnngbɛn'n seli Ezipt famiɛn'n kɛ: «Nannan, n wa bo n fɔnlɛ bɔ n fɔnnin'n su kle wɔ.

¹⁰ Kɛ a fali min nin kpaun tɔnfuɛ'm be kpɛnngbɛn'n é wun ya, bɔ a wlali ye ɔ gladi difuɛ'm be kpɛnngbɛn'n i sua'n nun lɔ'n,

¹¹ e sran nnyɔn'n e cɛnnin laliɛ kɔnguɛ kunngba nun, e laliɛ'm bé bo'n ti kunngun.

¹² E nin Ebre kanga gbanflɛn kun yɛ e o lɛ-ɔ. Ɔ ti gladi difuɛ'm be kpɛn'n i kanga. E kannin e laliɛ mun e kleli i, kpɛkuun ɔ tuli bé bo kleli ye. E sran nnyɔn'n e laliɛ'm bé bo'n yoli kunngun.

¹³ Ng'ɔ kannin'n kpɛnnin su. A fali min sieli min osu, a boli kun'n i kɔmin.»

Zozɛf tuli Ezipt famiɛn'n i laliɛ'n bo

¹⁴ Yɛ Ezipt famiɛn'n man be ko flɛli Zozɛf-ɔ. Be yili i bisua'n nun ndɛndɛ fiteli. Ɔ yili i akanza'n, ɔ wlali tralɛ uflɛ, yɛ ɔ ɔli Ezipt famiɛn'n nyrun lɔ-ɔ.

¹⁵ Famiɛn'n seli Zozɛf kɛ: «N cɛnnin laliɛ kun, sran fi kwla tu-mɛn i bo kle-man min. N tili i kɛ sɛ be kan laliɛ be kle wɔ'n, a tu i bo.»

¹⁶ Zozɛf seli famiɛn'n kɛ: «Nannan, nán min yɛ n kwla tu i bo-ɔ. Nyanmiɛn yɛ ɔ kwla tu i bo klanman man wɔ-ɔ.»

¹⁷ Yɛ famiɛn'n waan: «Laliɛ nun'n, n wo nzue ba'n nuan,

¹⁸ kpɛkuun nannin bla dandan nglanman nso be fin nzue'n nun b'a ba didilɛ i nuan su lɛ.

¹⁹ I sin nannin bla nso uflɛ be fin lɔ be bali. Be ti kokloo kainkain kpa. N nian wun-man nannin kainkain kɛ be sa le Ezipt mɛn'n nun wa.

²⁰ Kpɛkuun nannin kokloo kainkain'm b'a di nannin klikli dandan mun.

²¹ Sanngɛ a wun be sa a si-man kɛ b'a di like nan ɔ o be klun. Be tɛ yo kainkain kɛ laa'n sa. Yɛ kpli, yɛ n tinngeli-ɔ!

²² N ´cɛn laliɛ uflɛ-ɔ, m'an wun ble kun bɔ ɔ'a wlɔ nso i ja kunngba'n su. Ba o ble mma nga ble ja'n wlɔli'n be nun. Be ti nglanman.

²³ I sin, ble ja kunngba'n wlɔli nso ekun. Ble mma kasiɛn'm be ti be liɛ tɛtɛ feklefekle sa. Wia afiliɛ lɔ aunngban klakla'n b'ɔ ´fita man be kpeseli.

²⁴ Kpɛkuun kanngan tɛtɛ sɔ'm be mɛnnin nglanman mun. N kannin laliɛ sɔ'n n kleli atrɛ yifuɛ mun, be wie fi ɔ'a kwla tu-mɛn i bo ɔ'a kle-man min.»

²⁵ Yɛ Zozɛf seli famiɛn'n kɛ: «Nannan, ɔ laliɛ'n ti-man nnyɔn, ɔ ti kunngba. Nyanmiɛn waan ɔ ´yi sa ng'ɔ wa yo'n i nglo kle wɔ.

²⁶ Nannin nglanman nso'm be ti afuɛ nso, ble ja b'ɔ wlɔli nso bɔ i su ba'm be ti nglanman nso'n be kusu be ti afuɛ nso, sanngɛ laliɛ kunngba nin-ɔn.

²⁷ Nannin koklo kainkain nso nga be ka siɛn bali'n be ti afuɛ nso, ble ja b'ɔ wlɔli nso bɔ wia afiliɛ lɔ aunngban klakla'n yrɛli i'n bɔ i ti i mma'm be ti fekle'n, ɔ ti afuɛ nso. Afuɛ nso sɔ'm be ti awe afuɛ nso.

²⁸ Nan famiɛn, yɛ n kɛnnin i icra nin-ɔn. Nyanmiɛn waan ɔ ´fa like ng'ɔ wa yo'n kle wɔ.

²⁹ Afuɛ nso wa ba. I sɔ afuɛ nso liɛ'n nun'n, ninnge'm be ´yo ye kpa Ezipt mɛn'n nun.

³⁰ I sin, afuɛ nso ng'ɔ wa ba'n, ɔ ti awe blɛ. I blɛ sɔ nun'n, bé wla ɔ ´fi afuɛ nga ninnge'm be yoli ye dan Ezipt mɛn'n nun'n be su. Awe sɔ'n ɔ ´saci mɛn'n.

³¹ Kɛ afuɛ nso sɔ'n ko ju'n, sɛ be se sran kun kɛ aliɛ ɔ'a tɔ nvati Ezipt mɛn'n nun le'n, ɔ su fa-man, awe ng'ɔ wa kpɛn'n i kekle b'ɔ ´yo'n ti.

³² Kɛ a cɛnnin laliɛ kunngba'n kpɛ nnyɔn lɛ'n, ɔ kle kɛ Nyanmiɛn kaci i-ɔ ɔ yo-man ye, nan ɔ su sisi-mɛn i bo i yolɛ'n nun.

³³ I sɔ'n ti nannan, kunndɛ sran ng'ɔ si ngwlɛlɛ kpa'n fa sie i Ezipt mɛn'n su.

³⁴ Sie sran mun Ezipt mɛn'n nun. Afuɛ nso bɔ aliɛ'n ´tɔ nvati'n, man be dede wie be sie. Sran kun i aliɛ ng'ɔ nyɛnnin i'n, be `bubu nun nnun nan be `fɛ i nun bubuwa'n kun be sie nan be fa nnan be man sran'n.

³⁵ Man be tian blɛ sɔ'n nun aliɛ i nuan. Ɔ bɔbɔ nian ble nin aliɛ fanunfanun nga be ´tiɛntiɛn i nuan klɔ'm be su'n i su.

³⁶ Man aliɛ tran mɛn'n nun minndɛ afuɛ nso awe ng'ɔ wa kpɛn Ezipt su'n, nan awe'n ɔ'a saci-man Ezipt mɛn'n.»

Zozɛf ɔ'a yo Ezipt famiɛn i mantanfuɛ

³⁷ Ndɛ nga Zozɛf kan guali su'n, ɔ yoli Ezipt famiɛn'n nin i mantanfuɛ'm be fɛ.

³⁸ Famiɛn usali be kɛ: «?Sran nga Nyanmiɛn wawɛ'n wo i nun kɛ gbanflɛn nga sa'n, ninfan cɛ yɛ e ´nyan uflɛ-ɔ?»

³⁹ Famiɛn'n seli Zozɛf kɛ: «Wɔ bɔ Nyanmiɛn yili sa nga i kwlakwla i nglo kleli wɔ'n, m'an wun-man sran fi b'ɔ si ngwlɛlɛ dan kɛ wɔ sa-a.

⁴⁰ Ɔ man wɔ yɛ a ´nian mín mɛn'n su-ɔ. Ndɛ nga a kan'n yɛ min nvlefuɛ'm be ´ti-ɔ. Famiɛn bia bɔ n ti su'n, i kunngba cɛ yɛ man ngbaciɛ tran e nin wɔ ye afiɛn-ɔn.»

⁴¹ Famiɛn'n seli Zozɛf kɛ: «M'an fa wɔ m'an sie Ezipt mɛn wunmuan'n su.»

⁴² Famiɛn'n yili i sama ti nga'n ɔ fa wlali Zozɛf sa. Ɔ fali lɛn tralɛ kplɔkɔɔ fa wlɛli i wun. Ɔ wlɛli i njuaba .

⁴³ Ɔ fɛli i trannin kakaklolo ng'ɔ ti i mantanfuɛ'n i liɛ'n nun, be dun mmua i nyrun, be kpan kɛ: «Be `jaso atin'n nun, siefuɛ'n ba.» Zozɛf i sielɛ bɔ Ezipt famiɛn'n sie i Ezipt wunmuan'n su'n, kɛ ɔ yoli sa.

⁴⁴ Famiɛn'n seli Zozɛf kɛ: «Min yɛ n ti Ezipt famiɛn nin-ɔn, sanngɛ sran fi kwla yo-man like kun Ezipt mɛn wunmuan'n nun sɛ a mɛn-mɛn i wun atin'n.»

⁴⁵ Ezipt famiɛn'n tɔnnin Zozɛf dunman kɛ Zafnat-Paɛneak. Ɔ fali Potifera b'ɔ ti Eliopolis amuɛn i nyrun tranfuɛ i wa bla'n bɔ be flɛ i kɛ Asnat'n, mɛnnin i kɛ ɔ jɛ i. Kɛ ɔ yoli sɔ'n, Zozɛf wlannin Ezipt mɛn wunmuan'n nun siɛn'n.

⁴⁶ Kɛ Zozɛf ´kɔ famiɛn'n i nyrun'n, wuun ɔ'a di afuɛ ablasan.

⁴⁷ Afuɛ nga be nyannin aliɛ kaka'n, ninnge'm be yoli ye kekleke.

⁴⁸ Zozɛf man be tiantiannin afuɛ nso sɔ'm be nun aliɛ'n i nuan Ezipt klɔ dandan'm be su. Klɔ kun i asa'n su fie'm be su ninnge liɛ'n, ɔ man be tiɛntiɛnnin i nuan klɔ sɔ'n su.

⁴⁹ Ble nga Zozɛf man be tiɛnnin i nuan'n, i like bɔ be fa sunnzun i ɔ yo ye'n yɛlɛ jenvie nuan aunnyan'n. Sɔnlɛ dan bɔ ble sɔ'n sɔnnin'n ti be yacili i kalɛ siɛn'n, b'a kwlɛ-mɛn i ka kun.

⁵⁰ Zozɛf nin i yi Asnat b'ɔ ti Eliopolis amuɛn nyrun tranfuɛ Potifera i wa bla'n be wuli ba yasua nnyɔn ka nan awe'n ɔ'a kpɛn.

⁵¹ Zozɛf tɔnnin kpɛnngbɛn'n i dunman kɛ Manase . Afin ɔ seli kɛ: «Nyanmiɛn man mín wla ɔ'a fi min afɛ'n kwlakwla nin nun tilɛ nga e nin min osufuɛ mun e tili nun'n be su.»

⁵² Yɛ ɔ flɛli i sinma'n kɛ Efraim. I waan: «Nyanmiɛn man m'an nyan ba mɛn nga m'an wun nyrɛnnɛn nun yɛ'n i nun.»

⁵³ Aliɛ blɛ afuɛ nso'n i nuan'n sinnin Ezipt lɔ.

⁵⁴ Awe blɛ afuɛ nso'n boli balɛ bo kɛ Zozɛf fa kannin'n sa. Awe'n kpɛnnin mɛn'm be kwlaa be nun, san Ezipt mɛn'n nun yɛ be nyan aliɛ-ɔ.

⁵⁵ Kɛ awe'n kpɛnnin Ezipt mɛn'n nun'n, Eziptfuɛ'm be sun kleli Ezipt famiɛn'n kɛ ɔ man be aliɛ. Ezipt famiɛn'n seli be kɛ: «An `wɔ Zozɛf sin. Ng'ɔ kan'n, wuun yɛ ɔ ti i-ɔ.»

⁵⁶ Kɛ awe'n kpɛnnin mɛn wunmuan'n nun'n yɛ Zozɛf tikeli aliɛ sua'm be anuan-an. Ɔ yoli ble atɛ Eziptfuɛ'm bé sa nun. Awe'n yoli dan ɔli i nyrun titi Ezipt lɔ.

⁵⁷ Kusu sran'm be fin mɛnmɛn'm be nun be ba ble tolɛ Zozɛf sa nun. Afin ɔ lɛ-man mɛn nga awe'n kun-man sran mun kekle lɔ-ɔ.