Bo Bolɛ 40 - NYANMIƐN NDƐ'N 1998

¹ Be o lɛ kpɛkuun Ezipt famiɛn'n i nzan sufuɛ'n nin i kpaun tɔnfuɛ'n b'a yo be min bian'n i sa kun.

² Famiɛn'n ɔ fali ya i mantanfuɛ nnyɔn sɔ'm bé wun.

³ Yɛ ɔ wlali be bisua i gladi difuɛ'm be kpɛnngbɛn'n i sua lɔ kan be wlali Zozɛf lɛ'n.

⁴ Bisua su kpɛn'n fali be wlali Zozɛf sa nun. I yɛ ɔ nian be lika-a. Be cɛli lɛ kan.

Zozɛf tuli laliɛ nnyɔn bo

⁵ Le kun kɔnguɛ Ezipt famiɛn'n i nzan sufuɛ'n nin i kpaun tɔnfuɛ'n be o bisua lɔ be cɛnnin laliɛ. Be laliɛ nnyɔn'm bé bo ti kunngun.

⁶ Nglɛmun Zozɛf wa nian be-ɔ, be nyrun'n ti sukusuku.

⁷ Yɛ ɔ usali famiɛn'n i mantanfuɛ sɔ'm be kɛ: «?Ɔ yo sɛ ti yɛ amun nyrun'n ti sukusuku sɔ andɛ-ɔ?»

⁸ Yɛ be waan: «E cɛnnin laliɛ e nyan-man sran nan ɔ'a tu i bo ɔ'a man ye.» Yɛ Zozɛf waan: «?Nán Nyanmiɛn sa nun yɛ ninnge kwlaa be bo tulɛ'n fin-ɔn? An `kan kle min man n nian e.»

⁹ Yɛ nzan sufuɛ'm be su kpɛnngbɛn'n kɛnnin i laliɛ'n kleli Zozɛf-ɔ. I waan: «Laliɛ nun n ´nian-an, vinyi waka kun yɛ ɔ o yɛ.

¹⁰ Vinyi waka sɔ'n ɔ lɛ sama nsan, be fɛfɛli, be boli nnyrɛ, kpɛkuun be sɔsɔwa'm be su mma'm be bloli.

¹¹ Kɛ ɔ ´yo sɔ'n, wuun Ezipt famiɛn'n i klowa'n wo ń sa nun. Yɛ n tili vinyi mma'n wie nan m'an cuɛn i nzue'n m'an gua nun. Kpɛkuun n fa wlali Ezipt famiɛn'n i sa nun.»

¹² Yɛ Zozɛf waan: «Ɔ laliɛ sɔ'n i bo'n yɛ ɔ o yɛ. Vinyi sama nsan'n ɔ ti cɛn nsan.

¹³ Ɔ'a ka cɛn nsan Ezipt famiɛn'n wa yo man a ´nyan kɔmin. A wa di ɔ junman laa'n ekun. A ´fa Ezipt famiɛn'n i klowa'n a ´wlɛ i sa nun kɛ a fa yo i laa bɔ be nian yi-man ɔ junman nun'n sa.

¹⁴ Sanngɛ n ´srɛ wɔ kpa ti-ɔ, cɛn nga be yi wɔ bɔ a ´di alaje'n, nán ɔ́ wla fi min. Yo min ye, kan min ndɛ kle Ezipt famiɛn'n. Yo man n fin sua nga nun wa n fite.

¹⁵ Be ko trali min Ebre'm bé mɛn'n nun lɔ. M bali wa, kusu m'an yo-man sa yɛ b'a wla min bisua wa yɛ.»

¹⁶ Kɛ kpaun tɔnfuɛ'm be su kpɛn'n nian bɔ laliɛ'n i bo'n yoli fɛ'n, ɔ seli Zozɛf kɛ: «N kusu, laliɛ nun'n, kpaun gbogbo nsan jin mín ti su.

¹⁷ Gbogbo ng'ɔ o nglo'n, i nun kpaun nin gato fanunfanun'n kwlaa nga Ezipt famiɛn'n klo i'n wo nun. Sanngɛ anunman'm be wa di be ń ti su.»

¹⁸ Zozɛf tɛli i su kɛ: «Laliɛ sɔ'n i bo'n yɛ ɔ o yɛ. Gbogbo nsan'n ti cɛn ba nsan.

¹⁹ Ɔ ka cɛn ba nsan Ezipt famiɛn'n ´man wɔ su nglo, ɔ ´bo ɔ kɔmin waka kun su. Kpɛkuun anunman'm be wa di wɔ.»

²⁰ Le nsan'n su'n, kɛ Ezipt famiɛn'n di i awuliɛ cɛn'n, ɔ flɛli i mantanfuɛ'm be kwlaa kɛ be wa di like, nan ɔ'a man nzan sufuɛ'm be su kpɛnngbɛn'n nin kpaun tɔnfuɛ'm be su kpɛnngbɛn'n bé sa su i mantanfuɛ'm be nyrun.

²¹ Ɔ fali nzan sufuɛ'm be su kpɛn'n sieli i junman laa'n su kɛ ɔ su i nzan'n mɛn i.

²² Kpɛkuun ɔ boli kpaun tɔnfuɛ'm be su kpɛn'n i kɔmin. Ɔ man nga Zozɛf kannin'n kpɛnnin su.

²³ Sanngɛ nzan sufuɛ'm be su kpɛnngbɛn'n i wla ɔ'a kpɛn-man Zozɛf su. I wla fili i su.