Bo Bolɛ 4 - NYANMIƐN NDƐ'N 1998

Kaɛn nin Abɛl

¹ Adam nin i yi Ɛv be sili sua nan Ɛv ɔ'a wunnzɛ, ɔ wuli Kaɛn, ɔ seli kɛ: «Anannganman ukali min man m'an nyan sran kun.»

² I sin ɔ wa wuli Kaɛn i sinma yasua Abɛl. Abɛl yoli nnɛn tafuɛ. Kaɛn yoli fie difuɛ.

³ Kɛ ɔ cɛli lɔuun kan'n, Kaɛn fɛli i fie'n su ninnge'n wie ko mannin Anannganman.

⁴ Abɛl kusu kunnin i bua'm be nun ba klikli mun, ɔ fali be luilui lika mun mannin Anannganman. Anannganman klun jɔli Abɛl wun, ɔ sɔli i like ng'ɔ fa mɛnnin i'n nun klanman .

⁵ Sanngɛ ɔ'a nian-man Kaɛn nyrun, ɔ'a sɔ-mɛn i like liɛ'n ng'ɔ fa mɛnnin i'n nun. I sɔ'n ti Kaɛn fali ya dan kpa. Ɔ mlɛnnin i nyrun tritritri.

⁶ Yɛ Anannganman seli i kɛ: «?Ya dan nga a fa bɔ a mlan ɔ nyrun'n sa'n, ɔ ´yo nguɛ ye yɛ ɔ man wɔ-ɔ?

⁷ Nian, sɛ a nanti kɛ ɔ fata'n sa'n, a ´nyan kɔmin cɛn wie. Sɛ ɔ'a yo-man sɔ'n, sa tɛ'n yɛ ɔ sa wɔ anuan'n nun lɛ-ɔ. Ɔ ´kunndɛ tran ɔ su, sanngɛ wɔ yɛ a ti bɔ a kwlɛ i-ɔ.»

⁸ Kɛ ɔ yoli sɔ'n, Kaɛn seli i niaan bian Abɛl kɛ: «E `wɔ bo'n nun lɔ.» Kɛ be juli lɔ'n yɛ ɔ tɔli i su kunnin i-ɔ .

⁹ Yɛ Anannganman usali Kaɛn kɛ: «?Ɔ niaan bian Abɛl o nin?» Kaɛn tɛli i su kɛ: «M'an wun-man kan ɔ ɔli-ɔ. ?I kpa'n min niaan b'ɔ ti'n, be waan min yɛ n ti i su nianfuɛ-ɔ?»

¹⁰ Yɛ Nyanmiɛn seli i kɛ: «?Ɔ yo sɛ ti yɛ a yoli sɔ-ɔ? Abɛl i mmoja bɔ a guɛli i ase'n ɔ ti kɛ sran yɛ ɔ su kpan flɛ min kɛ n tu i klunngbɔ sa .

¹¹ Kɛ ɔ fin ndɛ'n, sa nga a yoli bɔ man asiɛ'n ɔ'a nɔn ɔ niaan bian'n i mmoja'n ti'n, asiɛ'n nin wɔ b'a nyɛn i.

¹² I sɔ'n ti a wa di asiɛ'n su junman lele ngbɛn, a su nyan-man nun like fi. A wa yo finfinfuɛ, a wa wlan-wlan sa daan lika'n nun cɛn'n kwlaa.»

¹³ Kaɛn seli Anannganman kɛ: «Sa nga n yoli'n i nuan like'n yo nɔnnin ngboko, n su kwla suɛn-mɛn i bo.

¹⁴ A fuan min asiɛ kpa'n su, n ´ko fia ɔ nyrun mmua, n ´yo finfinfuɛ, n ´wlan-wlan asiɛ'n su ngbɛn. Sran kwlaa ng'ɔ nin min yia nun'n, ɔ ´kun min.»

¹⁵ Yɛ Anannganman seli i kɛ: «Sɛ sran wie kun Kaɛn'n, san be ´kun sran kpɛ nso yɛ be fa sie i osu-ɔ.» Yɛ Anannganman fali nzɔliɛ kun sieli i Kaɛn wun kɛ ɔ ´yo nan sɛ sran wie nin i yia nun'n ɔ'a kun-mɛn i'n ti.

¹⁶ Yɛ Kaɛn jasoli Anannganman i wun lɛ ɔli mmua-a. Ɔ ko trannin Nɔd mɛn'n nun lɔ Edɛni fie'n i wia afiliɛ lɔ.

Kaɛn i osu'n nun mma mun

¹⁷ Kaɛn nin i yi'n be wa sili sua, yɛ bla'n wunnzɛli-ɔ. Ɔ wuli Enɔk. Kaɛn kplannin klɔ kun, ɔ fɛli i wa Enɔk i dunman'n yɛ ɔ fa sieli i klɔ'n su-ɔ.

¹⁸ Enɔk wuli Irad, Irad wuli Mɛizaɛl, yɛ Mɛizaɛl wuli Lemɛk.

¹⁹ Lemɛk jali bla nnyɔn, be flɛ kpɛnngbɛn'n kɛ Ada, yɛ be flɛ kasiɛn'n kɛ Zila.

²⁰ Ada wuli Zabal. I yɛ ɔ ti be nga be tran tannin sua nun bɔ be ta nnɛn'n be nannan nin-ɔn.

²¹ Zabal i niaan bian yɛlɛ Zibal. Zibal ti be kwlaa nga be bo gitar nin awɛ'n be nannan.

²² Zila kusu wuli ba yasua kun, be flɛ i kɛ Tibal-Kaɛn, ɔ yoli blalɛ bofuɛ. I yɛ ɔ yoli blalɛ ninnge nin aaba ninnge mun-ɔn. Tibal-Kaɛn i niaan bla yɛlɛ Naama.

²³ Lemɛk seli i yi'm be kɛ: «Ada nin Zila, amun `sie amún su. Lemɛk yi mun, amun `tran koun amun `sie amún su. Sran kun boli min kannin, n kunnin i, gbanflɛn kun boli min fɛ, n kunnin i.

²⁴ Sɛ ɔ fata kɛ be kun sran kpɛ nso be sie Kaɛn osu'n, wuun be ´kun sran kpɛ ableso-nin-nso yɛ be ´fa sie min osu-ɔ.»

²⁵ Adam nin i yi Ɛv be sili sua nan b'a wu ba yasua kun ekun. Ɛv flɛli i kɛ Sɛt. Ɔ seli kɛ: «Nyanmiɛn ɔ'a man min ba yasua kun ekun kɛ n fa sie Abɛl bɔ Kaɛn kunnin i'n i osu.»

²⁶ Sɛt kusu wuli ba yasua kun, ɔ flɛli i kɛ Enɔs. Kɛ ɔ fɛ i lɛ'n, kɛ sran'm be ´srɛ Nyanmiɛn siɛn'n, be flɛ i kɛ Anannganman.