Bo Bolɛ 37 - NYANMIƐN NDƐ'N 1998

ZOZƐF I WUN NDƐ Zozɛf i laliɛ b'ɔ cɛnnin be'n

¹ Zakɔb trannin i si i tranwlɛ laa'n nun Kanaan mɛn'n nun lɔ.

² Zakɔb i mma'm bé wun ndɛ'n yɛ. Kɛ Zozɛf dili afuɛ blu-nin-nso'n, ɔ nin i niaan mun yɛ be kankan bua nin boli mun-ɔn. Kɛ ɔ ´yo sɔ'n, wuun Zozɛf tɛ yo gbanflɛn kan, ɔ nin i si i yi Bila nin Zilpa be mma mun yɛ be wo-ɔ. Ndɛ tɛtɛ nga be kan, Zozɛf kan kle bé si.

³ Izraɛl kusu klo Zozɛf tra i mma'm be kwlakwla. Kɛ b'ɔ Zozɛf ti Izraɛl i kpɛnngbɛn nun ba'n ti'n, ɔ kpali wlengbi tralɛ klanman kpa kun mɛnnin i.

⁴ Kɛ i niaan'm be wun kɛ bé si klo i tra be'n ti bé nyin cili i. Be nin i kwla kan-man ndɛ wɛtɛɛ su.

⁵ Kpɛkuun Zozɛf cɛnnin laliɛ kun ɔ kan kleli i niaan mun. Laliɛ sɔ'n ti bé nyin cili i trali su.

⁶ I waan: «An `sie bé su be `tie laliɛ nga n cɛnnin'n.

⁷ E ɔli ble kpɛlɛ, e cicili i sɔlɛ-sɔlɛ kpɛkuun min ble sɔlɛ liɛ'n ɔ'a jaso ɔ'a jran nglo. Amun liɛ'm be bo sin yiali min liɛ'n nan b'a koto i bo.»

⁸ Yɛ i niaan'm be usɛli kɛ: «?Wɔ kpa'n, a bu i kɛ wuun a wa yo famiɛn nan a ´sie e ti-ɔ?» I laliɛ mun nin ndɛ ng'ɔ kan be gua su ti be kpɔli i trali su.

⁹ Zozɛf cɛnnin laliɛ kun ekun nan ɔ'a kan kle i niaan mun. Ɔ seli be kɛ: «M'an cɛn laliɛ kun ekun. Wia nin anglo'n, ɔ nin nzraama blu-nin-kun be kotoli mín bo.»

¹⁰ Ɔ kannin laliɛ sɔ'n kleli i si nan i si ɔ'a kpɛn i su. Ɔ usɛli i kɛ: «?Laliɛ nga a cɛnnin i lɛ'n, i bo'n kle sɛ? ?Nan wuun min nin ɔ́ nin, nin ɔ niaan mun e wa koto ɔ li ɔ́ bo?»

¹¹ I niaan'm bé nyin bloli i wun. I si kusu fali sa sɔ'n sieli i klun.

Zozɛf i atɛ yolɛ

¹² Zozɛf i niaan'm be ɔli Sisɛm lika'n nun lɔ bé si i bua nin boli'm be kankanlɛ.

¹³ Yɛ be si Izraɛl seli Zozɛf kɛ: «Ɔ niaan'm be ɔli nnɛn'm be kankanlɛ Sisɛm, n wa sunman wɔ bé sin.» Zozɛf waan: «Yoo, n tili!»

¹⁴ Izraɛl waan: «Ko nian be osu sɛ be ti juejue o. Nian kɛ nnɛn'm be ti'n, nan bla wa kan kle min.» Kɛ Izraɛl ´sunman Zozɛf'n, wuun be o Ebrɔn kongo'n nun lɔ. Zozɛf juli Sisɛm tiwa lɔ.

¹⁵ Sran kun ´wun Zozɛf-ɔ, ɔ'a mlin ɔ wun-man kɔwlɛ, ɔ su wlan-wlan aawlɛ nun daan. Nan ɔ'a usɛ i kɛ: «?Nguɛ yɛ a kunndɛ-ɔ?»

¹⁶ Zozɛf tɛli i su kɛ: «N su kunndɛ min niaan mun. Yaci, kle min kan be kankan nnɛn mun kɔ'n.»

¹⁷ Sran sɔ'n seli i kɛ: «Be fin wa, n tili be kɛ: ‹E `wɔ Dotan.› » Zozɛf ɔli be kunndɛlɛ nan ɔ'a to be Dotan lɔ.

¹⁸ Kɛ be wunnin i mmua lɔ'n lele b'ɔ fa ju bé wun lɛ'n, wuun b'a cici kɛ be `kun i.

¹⁹ Be seli be wiengu kɛ: «An `nian laliɛ cɛnfuɛ'n yɛ ɔ ´ba lɔ lɛ-ɔ.

²⁰ Sɛ ɔ ju wa'n, man e kun i. I sin e `fɛ i fuɛn'n e yi i kunman nga'm be nun kun nun nan e se kɛ nnɛn wlɛfuɛ wie dili i. I liɛ'n, kɛ i laliɛ'n i bo ´fa gua'n yɛ e wa wun i-ɔ.»

²¹ Be ´kan-an, Ribɛn ɔ'a ti. I yɛ ɔ deli i bé sa nun-ɔn. Ɔ seli be kɛ: «Nán e se kɛ e ´kun i.»

²² Ribɛn seli be kɛ: «Nán an kun i, an `fɛ i be yi i kunman ng'ɔ o aawlɛ flɛnnɛn'n nun yɛ'n i nun. Nán amún sa kɛn i.» I waan ɔ ´yo sɔ nan ɔ ´de i bé sa nun nan ɔ ´fɛ i ´sɛ i sin i si wun lɔ.

²³ Kɛ Zozɛf juli i niaan'm bé wun lɛ cɛ'n, yɛ be trɛli i be yili i wun tralɛ klanman b'ɔ wlɛ i wun nin-ɔn.

²⁴ Kpɛkuun be fɛli i be yili i kunman'n nun. Kɛ ɔ ´yo sɔ'n, wuun kunman sɔ'n nun ɔ'a wu kee nzue nun-man nun kun.

²⁵ Kɛ be wa trannin ase bɔ be ´di like'n, be ´nian-an, Ismaɛlfuɛ wie'm be nin be nyɔnngɔnmɛn mun yɛ be fin Galaad mɛn'n nun b'a kpɛ aawlɛ flɛnnɛn'n yɛ be su sin kɔ Ezipt yɛ. Ayre fannin, nin kpakpalɛ ninnge, nin mir o nyɔnngɔnmɛn'm bé sin.

²⁶ Yɛ Zida seli i niaan'm be kɛ: «?Sɛ e kun e niaan bian'n, nan e fɛ i fuɛn'n e fia'n, e ´nyan nun nzu?

²⁷ Man e yo i atɛ Ismaɛlfuɛ'm bé sa nun, nán é sa kɛn i. Afin kannzɛ ɔ yo sɛ é niaan-an, e nin i e ti sran kunngba.» I niaan'm be fɛli i ndɛ'n su.

²⁸ Kɛ Madian aata difuɛ'm be ´sin'n, Zozɛf i niaan'm be yili i kunman'n nun fiteli nan b'a yo i atɛ Ismaɛlfuɛ sɔ'm bé sa nun. Sran sɔ'm be toli i jɛtɛ mma ablaɔn nan be nin i b'a ɔ Ezipt.

²⁹ Ribɛn ko nian gbo'n nun-ɔn, vlein, Zozɛf nun-man nun kun, yɛ ɔ titili i wun tralɛ'n nun-ɔn.

³⁰ Ɔ ko toli i niaan mun, ɔ seli be kɛ: «?Ba'n nun-man kunman'n nun kun, yɛ n ´yo nga sɛ?»

³¹ Nan b'a kun boli kpakpuɛ kun b'a fa Zozɛf i tralɛ'n b'a fa wlɛ i mmoja'n nun.

³² Kpɛkuun be sunmannin sran kun bé si wun lɔ ɔ nin tralɛ klanman'n kɛ be se i kɛ: «Like bɔ e wunnin i'n yɛ. Nian sɛ ɔ́ wa'n i tralɛ liɛ nin a o.»

³³ Zakɔb wunnin i wlɛ, i waan: «Uuu! Mín wa'n i tralɛ nin-ɔn. Nnɛn wlɛfuɛ wie cɛ yɛ ɔ ´di i-ɔ. Kɛlɛ ɔ titili Zozɛf nun.»

³⁴ Yɛ Zakɔb ´titi i tralɛ'n nun yɛ ɔ ´wla bajɛ tralɛ-ɔ. Ɔ yoli i wa'n i sɛ'n cɛli lɔun kpa.

³⁵ I mma'm be kwlakwla be sɔli i kpatalɛ lele ngbɛn. I waan: «N ´sun lele san n ´to i blɔlɔ lɔ.» Ɔ man ɔ'a yaci-mɛn i sunlɛ le.

³⁶ Madianfuɛ'm be kusu be fali Zozɛf be ɔli Ezipt, be yoli i atɛ Ezipt famiɛn'n i mantanfuɛ kun i sa nun. Be flɛ bian sɔ'n kɛ Potifar. Ɔ ti gladi difuɛ'm be su kpɛn.