Bo Bolɛ 36 - NYANMIƐN NDƐ'N 1998

Ezau i Edɔm mɛn'n nun tranlɛ

¹ Ezau bɔ i suan dunman yɛlɛ Edɔm'n, i osu nunfuɛ'm be dunman mun yɛ:

² Ezau jali Kanaan bla nnyɔn, kun yɛlɛ Elɔn b'ɔ fin Ɛt'n i wa Ada, kun ekun yɛlɛ Zibɛɔn b'ɔ fin Ɛv'n i wa Ana i klun ba liɛ Ɔɔlibama.

³ Ɔ jali Ismaɛl wa Basmat bɔ i niaan bian yɛlɛ Nɛbazɔt'n.

⁴ Ezau nin Ada be wuli Elifaz, ɔ nin Basmat be wuli Reiɛl.

⁵ Ɔɔlibama kusu wuli Zeis, nin Zaɛlam yɛ Kɔre. Ezau i mma ng'ɔ wuli be Kanaan mɛn'n nun'n be yɛ be o lɛ-ɔ.

⁶ Kpɛkuun Ezau fɛli i yi mun nin i mma yasua mun nin i bla mun ɔli i nyrun. Ɔ fɛli i nnɛn nga be sua trɔ mun, ɔ nin ninnge ng'ɔ nyannin be Kanaan mɛn'n nun'n be kwlakwla ɔli wie. Ɔ yacili i niaan bian Zakɔb ɔ ko trannin mɛn uflɛ nun.

⁷ Afin be ninnge'm be sɔnnin dan, be tran likawlɛ-ɔ ɔ yo-man ye. Be nnɛn'm be ti lika nga be o nun'n ɔ ju-man be.

⁸ Kɛ Ezau i Seir oka'n su tranlɛ'n yoli sa. Ezau kunngba'n yɛ be flɛ i kɛ Edɔm nin-ɔn.

Ezau i anunman mun

⁹ Ezau b'ɔ ti Edɔmfuɛ'm be nannan'n, i anunman mun yɛ: Edɔmfuɛ'm be tran Seir oka'n su.

¹⁰ Ezau i mma'm be dunman mun yɛ: ɔ nin Ada be wuli Elifaz, ɔ nin Basmat be wuli Reiɛl.

¹¹ Elifaz kusu wuli Teman, nin Ɔmar, nin Zɛfo, nin Gaɛtam yɛ Kɛnaz.

¹² Elifaz i soman yɛlɛ Timna. Ɔ nin i be wuli ba kun, be flɛ i kɛ Amalɛk. Ada nin Ezau be mma mun nin be anunman mun yɛ be o lɛ-ɔ.

¹³ Reiɛl kusu wuli Naat, nin Zerak, nin Sama, yɛ Miza. Ezau nin i yi Basmat be anunman mun yɛ be o lɛ-ɔ.

¹⁴ Zibɛɔn wa Ana i klun ba Ɔɔlibama ɔ nin Ezau be wuli Zeis nin Zaɛlam yɛ Kɔre.

¹⁵ Ezau i osu'n nun awlobo kpɛnngbɛn mun yɛ: nannan Teman, nannan Ɔmar,

¹⁶ nannan Zɛfo, nannan Kɛnaz, nannan Kɔre, nannan Gaɛtam yɛ nannan Amalɛk. Be kwlaa nga lɛ'n, be ti Elifaz nga i nin yɛlɛ Ada'n i liɛ mun. Be trannin Edɔm.

¹⁷ Nannan Naat, nannan Zerak, nannan Sama, yɛ nannan Miza, be kusu be ti Reiɛl nga i nin yɛlɛ Basmat'n i liɛ mun. Be trannin Edɔm.

¹⁸ Nannan Zeis, nannan Zaɛlam yɛ nannan Kɔre, be ti Ɔɔlibama nga i nin yɛlɛ Ana'n i liɛ mun.

¹⁹ Ezau i anunman nga be ti Edɔm awlo bo kpɛnngbɛn mun yɛ be o lɛ-ɔ.

^20-21 Seir b'ɔ fin Ɔr'n i mma mun bɔ be yɛ be dun mmua trannin mɛn sɔ'n nun'n, be kpɛnngbɛn mun yɛlɛ: Lɔtan, Sɔbal, Zibɛɔn, Ana, Disɔn, Ɛzɛr, yɛ Disan.

²² Lɔtan i mma mun yɛlɛ Ɔri nin Eman. I niaan bla yɛlɛ Timna.

²³ Sɔbal kusu i wa liɛ mun yɛlɛ Alvan, Manaat, Ebal, Sɛfo, ɔ nin Ɔnam.

²⁴ Zibɛɔn i mma mun yɛlɛ Aza yɛ Ana. Ana sɔ'n yɛ kɛ ɔ ´kɛnkɛn i si Zibɛɔn i aflunmun mun ɔ ko fiteli nzue ti wie su aawlɛ flɛnnɛn'n nun lɔ nin-ɔn.

²⁵ Ana i wa yasua yɛlɛ Disɔn, i wa bla yɛlɛ Ɔɔlibama.

²⁶ Disɔn kusu i wa liɛ mun yɛlɛ Ɛmdan, Ɛsban, Zitran yɛ Kɛran.

²⁷ Ɛzɛr kusu i wa liɛ mun yɛlɛ Bilan, Zavan yɛ Akan.

²⁸ Disan i mma mun yɛlɛ Iz nin Aran.

²⁹ Ɔrfuɛ'm be kpɛnngbɛn nga be sie be Seir mɛn'n nun lɔ mun, yɛlɛ nannan Lɔtan, nannan Sɔbal, nannan Zibɛɔn, nannan Ana,

³⁰ nannan Disɔn, nannan Ɛzɛr, yɛ nannan Disan.

³¹ Famiɛn nga be sieli Edɔm ka nan Izraɛlfuɛ'm b'a nyan be famiɛn liɛ'n yɛlɛ

³² Bɛɔr i wa Bela, i klɔ'n yɛlɛ Dinaba.

³³ Kɛ Bela wuli'n, Zerak Zɔbab yɛ ɔ sinnin i osu-ɔ. I klɔ'n yɛlɛ Bɔzra.

³⁴ Kɛ Zɔbab wuli'n, Isam b'ɔ fin Temanfuɛ'm be akpasua'n su'n yɛ ɔ sinnin i osu-ɔ.

³⁵ Kɛ Isam wuli'n, Bɛdad i wa Adad yɛ ɔ sinnin i osu-ɔ. Adad yɛ ɔ kwlali Madianfuɛ mun Moab mɛn'n nun lɔ nin-ɔn. I klɔ'n yɛlɛ Avit.

³⁶ Kɛ Adad wuli'n, Samla b'ɔ fin Masreka'n yɛ ɔ sinnin i osu-ɔ.

³⁷ Kɛ Samla wuli'n, Sail b'ɔ fin Reobɔt nzue ba'n i nuan'n yɛ ɔ sinnin i osu-ɔ.

³⁸ Kɛ Sail wuli'n Akbɔr i wa Baal-Anan yɛ ɔ sinnin i osu-ɔ.

³⁹ Kɛ Baal-Anan wuli'n, Adar yɛ ɔ sinnin i osu-ɔ. I klɔ'n i dunman yɛlɛ Pai. Be flɛ i yi'n kɛ Mɛetabeɛl. Mezaab i wa bla Matrɛd i klun ba-a.

⁴⁰ Ezau i anunman nga be ti awlobo kpɛnngbɛn lika kunngun'm be nun'n be dunman mun yɛ: nannan Timna, nannan Alva, nannan Zɛtɛt,

⁴¹ nannan Ɔɔlibama, nannan Ela, nannan Pinɔn,

⁴² nannan Kɛnaz, nannan Teman, nannan Mibzar,

⁴³ nannan Magdiɛl, yɛ nannan Iram. Edɔmfuɛ'm be tranwlɛ kunngun'm be su kpɛnngbɛn mun yɛ be o lɛ-ɔ. Edɔmfuɛ'm be nannan Ezau i wun ndɛ'n yɛ ɔ o lɛ-ɔ.