Bo Bolɛ 35 - NYANMIƐN NDƐ'N 1998

Zakɔb tuli Sisɛm ko trannin Betɛl

¹ Nyanmiɛn seli Zakɔb kɛ: «Kɛ a ´wanndi ɔ niaan bian Ezau nyrun a ´kɔ'n, Nyanmiɛn ng'ɔ fiteli ɔ nyrun'n yɛlɛ min. Ɔ man jaso kɔ Betɛl ko tran lɔ, kplan min sɔwlɛ kun lɔ man min.»

² Yɛ Zakɔb seli i yi nin i mma nin i sa nun sran'm be kwlaa kɛ: «An `gua amuɛn nga be o amún sa nun'n be ase. An `yo bé wun saun. An `kaci amun tralɛ mun.

³ An `siesie amún wun man e wɔ Betɛl. N ´ko kplan Nyanmiɛn sɔwlɛ kun lɔ m ´man Nyanmiɛn nga min asamian blɛ'n nun ɔ tɛli min su'n, bɔ kusu ɔ ukali min ajalɛ bɔ n tuli'n nun'n.»

⁴ Yɛ be fali amuɛn ng'ɔ o bé sa nun'n kwlaa nin be asunmanndi mun mannin Zakɔb-ɔ. Nan Zakɔb ɔ'a fa ninnge sɔ mun ɔ'a wla be ase sɛni waka ng'ɔ o Sisɛm lɛ'n i bo.

⁵ Kɛ Zakɔb nin i mma'm be ´tu lɛ be kɔ'n, Nyanmiɛn man srɛ kunnin klɔ nga be mantan lɛ'n be sufuɛ mun. Ɔ man b'a kan-man be su sulɛ ndɛ.

⁶ Zakɔb nin i sa nun sran'm be juli Kanaan mɛn'n nun klɔ nga be flɛ i kɛ Liz bɔ i dunman yɛlɛ Betɛl siɛn'n, i su.

⁷ Zakɔb kplannin Nyanmiɛn sɔwlɛ kun lɛ, kpɛkuun ɔ flɛli lika sɔ'n kɛ Betɛl Nyanmiɛn. Afin kɛ ɔ wanndi i niaan bian'n nyrun kɔ'n, lɛ yɛ Nyanmiɛn fiteli i nyrun nin-ɔn.

⁸ Bla ng'ɔ tali Rebeka bɔ be flɛ i kɛ Debora'n, ɔ wa wuli. Be sieli i Betɛl i ja ngua sɛni waka kun bo lɛ. Be flɛli sɛni kɛ i sunwlɛ sɛni.

⁹ Kɛ Zakɔb fin Mezopotami i nglo lɔ ´ba'n, Nyanmiɛn fiteli i nyrun ekun nan ɔ'a yrɛ i nguan.

¹⁰ Ɔ seli i kɛ: «Wɔ dunman laa'n yɛlɛ Zakɔb, sanngɛ be flɛ-man wɔ sɔ kun. Siɛn'n, ɔ dunman yɛlɛ Izraɛl.» Nyanmiɛn flɛli i kɛ Izraɛl.

¹¹ Nyanmiɛn seli i kɛ: «Nyanmiɛn b'ɔ kwla like kwlaa yo'n yɛlɛ min. Wu ba kaka man ɔ osu'n ɔ trɛ ɔ kaci nvle wunmuan kun. I kpa'n ɔ ´kaci nvle sunman. Wɔ anunman sɔ'm be wie ´yo famiɛn.

¹² Mɛn nga n fa mannin Abraam nin Izaak'n, n ´fa man wɔ nin wɔ anunman mun.»

¹³ Nyanmiɛn jasoli lika ng'ɔ ijɔ kleli Zakɔb lɛ'n nun ɔli.

¹⁴ Kpɛkuun Zakɔb takali yɛbuɛ lika sɔ'n nun lɛ. Ɔ guali yɛbuɛ sɔ'n i su ngo nin nzan. Ɔ man yɛbuɛ sɔ'n yoli Nyanmiɛn i yɛbuɛ.

¹⁵ Ɔ tɔnnin lika sɔ'n bɔ Nyanmiɛn ijɔ kleli i lɛ'n i dunman kɛ Betɛl. Betɛl i bo'n yɛlɛ Nyanmiɛn i sua.

Bɛnzamɛn i awuliɛ yɛ Rasɛl i wulɛ

¹⁶ Kɛ be fɛ i Betɛl lɛ bɔ be wa ju Efrata'n, yɛ Rasɛl wuli ba-a. I ba wulɛ sɔ'n yoli kekle.

¹⁷ Kɛ Rasɛl ´fɛ dan'n, bla ng'ɔ ukɛ i be wu ba'n seli i kɛ: «Nán srɛ kun wɔ, ba yasua-a.»

¹⁸ Kɛ Rasɛl wa ka nun'n, ɔ tɔnnin ba'n i dunman kɛ Bɛn-Ɔni. Bɛn-Ɔni i bo'n yɛlɛ nyrɛnnɛn nun ba. Sanngɛ i si flɛli i kɛ Bɛnzamɛn. Bɛnzamɛn i bo'n yɛlɛ bé sa fama su ba.

¹⁹ Kɛ Rasɛl i wie'n yoli sa. Be sieli i atin ng'ɔ kɔ Efrata bɔ i dunman uflɛ'n yɛlɛ Bɛtleɛm'n i nuan.

²⁰ Zakɔb takali yɛbuɛ kun i ndia'n su. Ndɛ nin ndɛ be tɛ flɛ i kɛ Rasɛl i ndia su yɛbuɛ.

²¹ Izraɛl fɛli i lɛ ko boli i nanmue'n Migdal-Edɛr i kɔmin sin lɔ.

²² Be o lɛ kpɛkuun Ribɛn wa wluli i si i soman Bila sin, ɔ nin i be lali, kpɛkuun i si Izraɛl tili. Zakɔb wuli ba yasua blu-nin-nnyɔn.

²³ Ɔ nin Lea be liɛ kpɛnngbɛn'n yɛlɛ Ribɛn, i sin liɛ mun yɛlɛ Simeɔn, nin Levi, nin Zida, nin Isakar, yɛ Zabilɔn.

²⁴ Ɔ nin Rasɛl be wuli Zozɛf yɛ Bɛnzamɛn.

²⁵ Ɔ nin Rasɛl i afanniɛn bla Bila be wuli Dan yɛ Nɛftali.

²⁶ Yɛ ɔ nin Lea i afanniɛn bla Zilpa be wuli Gad yɛ Azɛr. Zakɔb i mma ng'ɔ wuli be Mezopotami lɔ'n be yɛ be o lɛ-ɔ.

²⁷ Zakɔb juli i si Izaak i wun Mamre lɔ. Mamre'n wo Kirzat-Arba nga i dunman uflɛ'n yɛlɛ Ebrɔn'n i wun lɔ. Abraam nin Izaak be trannin lɔ laa.

²⁸ Izaak dili afuɛ ya afuɛ ablaɔcuɛ

²⁹ nan ɔ'a wu. Kpɛnngbɛn'n tili i kpa nan ɔ'a wu ɔ'a ɔ i nannan'm be sin. I wa Ezau nin Zakɔb be sieli i.