Bo Bolɛ 34 - NYANMIƐN NDƐ'N 1998

Simeɔn nin Levi be niaan bla bɔ be kuɛkuɛli i'n i su klunngbɔ tulɛ

¹ Be flɛ ba bla nga Lea nin Zakɔb be wuli i'n kɛ Dina. Cɛn kun Dina ɔli mɛn sɔ'n nun lɛ talua wie mun bé wun wunlɛ.

² Kpɛkuun Amɔr b'ɔ ti Evfuɛ'm be kpɛnngbɛn'n i wa Sisɛm ɔ'a wun i. Ɔ trɛli i, ɔ nin i be lali kekle nun.

³ Ɔ kloli Zakɔb wa sɔ'n dan, ndɛ ng'ɔ ko kan nan ɔ'a nyɛn i'n, ɔ kan kleli i.

⁴ Ɔ seli i si Amɔr kɛ: «Ja talua sɔ'n man min.»

⁵ Kɛ Zakɔb ´ti i kɛ Sisɛm ɔ'a sokpɛ i wa'n, wuun i mma yasua'm b'a ɔ blo, nnɛn'm be kankanlɛ, i ti ɔ'a tɛ-man su ka nan b'a ba.

⁶ Kpɛkuun Sisɛm i si Amɔr ɔ'a a to Zakɔb kɛ ɔ ´bo aja ndɛ'n su kle i.

⁷ Kɛ Zakɔb i mma yasua'm be fin blo lɔ bali bɔ be tili sa nga Sisɛm yoli'n, ɔ'a yo-man be fɛ mlɔnmlɔn. Afin wafa nga Sisɛm nin Zakɔb i wa bla'n be lali'n, nán i atin su-ɔ. Ɔ ti tete yɛ ɔ'a bo i Izraɛl mɛn'n nun-ɔn, i ti be fali ya dan kpa.

⁸ Amɔr seli be kɛ: «Mín wa Sisɛm ɔ klo amun niaan bla'n dan. An `yaci, an `fɛ i be mɛn i man ɔ jɛ i.

⁹ Amun man e nuan sɛ ndɛ nga e wa kɛn i yɛ'n su: Man e ja amun mma bla mun, man amun kusu an ja e liɛ mun.

¹⁰ Amun nin e `tran wa. E mɛn'n yɛ ɔ o lɛ-ɔ. An `tran wa, an `di aata, nan an `to amun bɔbɔ amun asiɛ.»

¹¹ Sisɛm bali-ɔ, ɔ wa seli Dina i si nin i niaan'm be kɛ: «An `yaci, like kwlaa nga amun waan an ´de min'n, n ´fa man amun.

¹² Amun li, an `fa talua'n be man min. An `bo i aja like'n dan kpa, man i sin ninnge'n sɔn, ngasi nun-man nun, n ´fɛ i kwlaa m ´man amun.»

¹³ Kpɛkuun Zakɔb i mma'm be fali gblɛ be fa tɛli Sisɛm nin i si Amɔr be su sokpalɛ bɔ Sisɛm sokpali be niaan bla Dina'n ti.

¹⁴ Be seli be kɛ: «E fa e niaan bla'n e man yasua nga b'a wlɛ-mɛn i klɛn nin-ɔn, ɔ yo-man ye. Ɔ ti é nyin ase gualɛ.

¹⁵ Sɛ an ´wun kɛ e ´fa ndɛ nga an kan'n su'n, wuun amun nvle'n nun lɔ yasua'm be kwlaa b'a wla klɛn kɛ e sa.

¹⁶ I liɛ'n, e ´fa é wa bla mun e ´man amun an ´ja be, yɛ kusu e ´ja amun lɔ bla. Yɛ e nvle nnyɔn'n e ´tran likawlɛ, e ´kaci nvle kun.

¹⁷ Nan sɛ amu'an wla-man klɛn'n, e ´fa e niaan bla'n e ´kɔ.»

¹⁸ Amɔr nin i wa Sisɛm be kplinnin ndɛ nga be kannin'n su.

¹⁹ Klolɛ bɔ gbanflɛn'n klo Zakɔb i wa bla'n ti, ɔ'a sisi-mɛn i bo sa sɔ'n i yolɛ nun. Kusu i si i awlo'n nun'n, i yɛ ɔ lɛ nyrun tra be ngba-a.

²⁰ Amɔr nin Sisɛm be ɔli klɔ'n i anuan'n nun lɔ kan be kan ndɛ lɛ'n, nan b'a se be klɔ sufuɛ'm be kɛ:

²¹ «Minniɛn sɔ'm be klo e sa. Man be ka é mɛn'n nun wa be di aata. E `yaci e lika'n lɛ e `man be. Man e `ja be lɔ bla nan be kusu be `ja é wa bla.

²² Sanngɛ be waan sɛ e waan e nin be e ´kaci nvle kun'n, wuun é wa yasua'm be kwlakwla b'a wla klɛn kɛ be sa.

²³ I liɛ'n be nnɛn nin bé bo ninnge'm be ´yo e liɛ mlɔnmlɔn. Nan i ti-ɔ, amun man e kplin nga be kannin'n su nan be nin e tran.»

²⁴ Be kwlaa nga be ɔli ndɛ kanwlɛ lɔ klɔ'n i anuan'n nun lɔ'n, be kplinnin Amɔr nin Sisɛm be ndɛ'n su, ɔ man klɔ'n su yasua'm be kwlaa be wlali klɛn.

²⁵ I le nsan'n su'n, bɔ be keje be wun-ɔn ɔ yo-man ye'n, Zakɔb i mma'm be nun nnyɔn, Simeɔn nin Levi bɔ be nin Dina bé nin ti kun'n, kun fali tokofi kun, kun fali tokofi kun, be wluli klɔ'n nun blɛlɛlɛ kpɛkuun be kunnin yasua'm be kwlaa.

²⁶ Be kunnin Amɔr nin i wa Sisɛm wie nan b'a fa Dina b'a ba. Be fɛli i Sisɛm i sua'n nun lɔ.

²⁷ Zakɔb i mma nga mun be fali be nga be kunnin be'n bé bo ninnge mun. Be fɛnnin klɔ'n su ninnge'm be kwlaa be niaan bla bɔ be sokpɛli i'n ti.

²⁸ Be fali be bua nin bé boli nin be nannin ɔ nin be aflunmun mun. Be fali klɔ wa ninnge nin blo lɔ liɛ mun.

²⁹ Be fali bé bo ninnge kpakpa'm be ngba. Be fali bé yi nin be mma mun, ɔ nin sua'm be nun ninnge mun.

³⁰ Zakɔb seli Simeɔn nin Levi be kɛ: «Amun man m'an mian. Amun ti man mɛn nga nun sran mun, Kanaanfuɛ nin Ferezfuɛ mun bé nyin wa ci min. Mín sa nun sran'm be ti ba nnyɔn cɛ. Mɛn nga nun sran sɔ'm be wa ju gua mín wun, be ´kwla min, yɛ be ´nunnun min nin min awlofuɛ mun.»

³¹ Kpɛkuun be tɛli i su kɛ: «?Wuun tekle bla yɛlɛ e niaan bla'n yɛ man be yo i sɔ-ɔ?»