Bo Bolɛ 33 - NYANMIƐN NDƐ'N 1998

Zakɔb nin Ezau be afiɛn siesielɛ

¹ Zakɔb ´mɛn i nyin'n su-ɔ, Ezau yɛ ɔ ´ba yɛ, ɔ nin sran ya nnan yɛ be ba-a. Zakɔb fali ba'n wie mannin Lea, ɔ fali wie mannin Rasɛl. Ɔ fali wie kusu mannin afanniɛn bla nnyɔn mun.

² Afanniɛn bla'm be nin be mma'm be dun mmua, Lea nin i mma'm be su be su. Kpɛkuun Rasɛl nin Zozɛf be o siɛn.

³ I bɔbɔ dunnin be kwlaa be mmua, ɔ kotoli kpɛ nso kwlaa ka nan ɔ nin i niaan bian'n b'a yia.

⁴ Ezau wanndi wa kpɛli i atin, ɔ tɔli i nun. Kpɛkuun be sran nnyɔn'm be su sun.

⁵ Kɛ Ezau wunnin bla nin ba mun'n, ɔ usali kɛ: «?Wan mun yɛlɛ be nga be su wɔ su yɛ'n?» Zakɔb waan: «Ba nga Nyanmiɛn fa mannin min mun-ɔn.»

⁶ Yɛ afanniɛn bla'm be nin be mma mun be wunngeli i wun lɛ be kotoli-ɔ.

⁷ Lea kusu nin i mma liɛ'm be wunngeli lɛ be kotoli, kpɛkuun Rasɛl nin Zozɛf be wunngeli lɛ be kotoli.

⁸ Ezau usali Zakɔb kɛ: «?Nnɛn beblebe nga e nin be e yiali lɛ'n a ´fa yo nguɛ?» Zakɔb waan: «N waan n ´fa man wɔ nan a si min aunnvuɛ.»

⁹ Yɛ Ezau waan: «Min niaan, n like liɛ nga n lɛ i'n ɔ sɔnnin, fa ɔ liɛ'n.»

¹⁰ Zakɔb kusu waan: «Cɛcɛ, yaci, sɛ ɔ waan a ´si min aunnvuɛ'n, ɔ li sɔ min ninnge bɔ n fa be man wɔ'n be nun. Ɔ nyrun wa julɛ'n yoli kɛ Nyanmiɛn nyrun julɛ sa. Kɛ n toli wɔ bɔ ɔ kusu a sɔ min nun klanman'n,

¹¹ yaci, sɔ min ninnge nga n fa be man wɔ'n be nun. Nyanmiɛn ɔ'a yo min ye lele ɔ'a tratra su. Like fi mian-man min.» Ɔ kɛnnin i lele, ɔ man Ezau sɔli nun.

¹² Kpɛkuun Ezau waan: «E `san nun e wɔ.»

¹³ Zakɔb tɛli i su kɛ: «Ɔ bɔbɔ a si kɛ ba'm be nantilɛ yo ya. Bua nin nannin nga ba o bé sin'n, n kwla fa be kɔ-man ndɛndɛ. Sɛ e waan e ´kpli e ´ju lɔ andɛ'n, nnɛn'm be kwlaa be ´wie wu mín sa nun.

¹⁴ I sɔ'n ti, dun mmua, n ´su nnɛn mun nin mantuan'm be su m ´ba min liɛ blɛblɛ, e ko to wɔ Seir mɛn'n nun lɔ.»

¹⁵ Yɛ Ezau waan: «Yoo, man n yaci sran nga be bali min sunmanlɛ'n, wie ɔ́ wun wa e!» Zakɔb waan: «?Nguɛ sa ti-ɔ? ?A sɔ min nun klanman kwlaa nin-ɔn, nguɛ yɛ n kunndɛ ekun-ɔn?»

¹⁶ Nan le kunngba sɔ nun'n, Ezau ɔ'a fa Seir atin'n ɔ'a ɔ.

¹⁷ Zakɔb kusu ɔli Sikɔt. Ɔ kplannin sua, i bɔbɔ i liɛ. Ɔ sisili i nnɛn'm bé kuku. I ti yɛ be flɛli lika sɔ'n kɛ Sikɔt nin-ɔn. Sikɔt i bo'n yɛlɛ kuku.

Zakɔb tran mantannin Sisɛm klɔ'n

¹⁸ Kɛ Zakɔb fin Mezopotami i nglo lɔ ´ba'n, like fi ɔ'a yo-mɛn i yɛ ɔ juli Kanaan mɛn'n nun lɔ klɔ nga be flɛ i Sisɛm su-ɔ. Ɔ boli nanmue klɔ'n wun lɛ.

¹⁹ Ɔ toli lika ng'ɔ kplannin i nanmue'n lɛ'n. Ɔ toli i Amɔr nga i liɛ yɛlɛ Sisɛm klɔ'n i osu'n nunfuɛ'm bé sa nun jɛtɛ ufue ya.

²⁰ Ɔ kplannin Nyanmiɛn sɔwlɛ kun lɛ. Ɔ tɔnnin i dunman kɛ Ɛl-Elɔe-Izraɛl .