Bo Bolɛ 30 - NYANMIƐN NDƐ'N 1998

¹ Kɛ Rasɛl wunnin kɛ ɔ wu-man ba man-man Zakɔb'n, i nyin bloli i niaan bla'n wun, ɔ seli Zakɔb kɛ: «Yo man n wu ba. Sɛ ɔ'a yo-man sɔ-ɔ, n ´wu.»

² Nan Zakɔb ɔ'a fɛ i wun ya kpa, i waan: «?Nyanmiɛn bɔ i waan nán a wu ba'n, be wan min-ɔn?»

³ Rasɛl waan: «Min afanniɛn bla Bila yɛ ɔ o lɛ-ɔ. A nin i be `si sua nan ɔ wu ba yasua man min wie.»

⁴ Yɛ ɔ fɛli i afanniɛn bla Bila mannin Zakɔb-ɔ. Zakɔb nin i be sili sua,

⁵ kpɛkuun Bila wunnzɛli ɔ wuli ba yasua kun mannin Zakɔb.

⁶ Rasɛl seli kɛ: «Nyanmiɛn jin min sin. Ɔ tili min srɛlɛ'n ɔ man ɔ'a man min ba yasua kun.» Nan ɔ'a flɛ i Dan .

⁷ Rasɛl i afanniɛn bla Bila wunnzɛli ekun, ɔ wuli ba yasua kun ekun mannin Zakɔb.

⁸ Rasɛl seli ekun kɛ: «Kɛ e nin min niaan bla e tuli anyinbloɛ ngondin'n, min yɛ n kwlɛli i-ɔ.» Ɔ man ɔ tɔnnin ba'n i dunman kɛ Nɛftali.

⁹ Kɛ Lea wunnin kɛ ɔ wu-man ba kun'n, ɔ fɛli i afanniɛn bla Zilpa mannin Zakɔb kɛ ɔ jɛ i.

¹⁰ Zilpa nin Zakɔb be wuli ba yasua kun.

¹¹ Lea waan: «Muae bla o!» Ɔ flɛli ba'n kɛ Gad .

¹² Zilpa nin Zakɔb be wuli ba kun ekun.

¹³ Yɛ Lea waan: «N klun ɔ'a jɔ! Siɛn'n liɛ bla'm be se kɛ min liɛ su ti ye.» Ɔ flɛli ba'n kɛ Azɛr.

¹⁴ Ble i kpɛlɛ blɛ'n nun'n, Ribɛn ɔli bo'n nun, ɔ ko fiteli mandragɔr wie su. Yɛ ɔ kpɛ wie blɛli i nin Lea-a. Kpɛkuun Rasɛl seli Lea kɛ: «Yaci, man min ɔ́ wa'n i mandragɔr'n wie.»

¹⁵ Lea tɛli i su kɛ: «Ɔ li sa! ?Kɛ a fali mín wun'n ɔ ju-man wɔ, kpɛkuun a ´ba mín wa'n i mandragɔr'n i falɛ ekun?» Yɛ Rasɛl waan: «Yoo, man ɔ la ɔ sin ndɛ nan n fa ɔ́ wa'n i mandragɔr'n.»

¹⁶ Nnɔsua kɛ Zakɔb fin fie su ´ba'n, Lea ko kpɛli i atin. Ɔ seli kɛ: «Min sin yɛ a ´la ndɛ-ɔ, n fali mín wa'n i mandragɔr'n n toli wɔ.» Ɔ man le kun sɔ'n, Zakɔb nin i yɛ be lali-ɔ.

¹⁷ Nyanmiɛn tili Lea i srɛlɛ'n. Ɔ wunnzɛli nan ɔ'a wu i wa yasua'm be nnun su'n.

¹⁸ Yɛ Lea seli kɛ: «N fali min afanniɛn bla'n m mannin mín wun'n, Nyanmiɛn kusu ɔ'a tannin min kalɛ.» Ɔ tɔnnin ba'n i dunman kɛ Isakar.

¹⁹ Lea wunnzɛli ekun nan ɔ'a wu i wa yasua'n i nsiɛn su'n.

²⁰ Ɔ seli kɛ: «Nyanmiɛn ɔ'a cɛ min like klanman. Siɛn liɛ'n, mín wun'n ɔ wa nian min nyrun, afin m'an wu ba yasua nsiɛn m'an mɛn i.» Ɔ flɛli ba'n kɛ Zabilɔn.

²¹ I sin ɔ wa wuli ba bla kun nan ɔ'a tɔn i dunman kɛ Dina.

²² Kpɛkuun Nyanmiɛn buli Rasɛl i akunndan, ɔ tili i srɛwa'n nan ɔ'a tike i klun'n.

²³ Ɔ wunnzɛli, ɔ wuli ba yasua kun. Kpɛkuun i waan: «Nyanmiɛn ɔ'a titi min nyrun nyannzuɛn'n.»

²⁴ Ɔ tɔnnin ba'n i dunman kɛ Zozɛf, afin ɔ seli kɛ: «Man Anannganman man min ba yasua kun ekun.»

Zakɔb i wun nyanlɛ

²⁵ Kɛ Rasɛl wuli Zozɛf'n, Zakɔb seli Laban kɛ: «Man min atin man n wɔ mín mɛn'n nun kan n fin lɔ'n.

²⁶ N ´fa min mma nin mín yi bɔ n dili be ti sia lele mun n ´kɔ.»

²⁷ Laban waan: «Mín sin ninnge'm be waan wɔ ti yɛ Anannganman yo man min ninnge'm be yo ye-ɔ. Ɔ man srɛlɛ yɛ n ´srɛ wɔ-ɔ,

²⁸ kalɛ nga ɔ waan n tannin wɔ'n, kle man n fa man wɔ.»

²⁹ Zakɔb waan: «Ɔ bɔbɔ a si junman nga n dili m mannin wɔ'n. Kɛ m bali'n, a si kɛ ɔ nnɛn'm b'a trɛ b'a ju'n.

³⁰ Kɛ m ´ba'n, wuun ɔ nnɛn'm be ti kaan sa, yɛ b'a trɛ lɛ-ɔ. Kɛ ɔ fin cɛn bɔ mín ja tiali wɔ awlo wa'n, Anannganman ɔ'a yo ɔ ninnge'm be ye dan. ?Yɛ nan cɛn onin yɛ n ´di junman m man mín yi nin min mma mun-ɔn?»

³¹ Laban waan: «?M `man wɔ nguɛ?» Zakɔb waan: «M'an se-man kɛ wɔ yɛ a tannin min kalɛ-ɔ. Sɛ a kplin ndɛ nga n wa kan kle wɔ yɛ'n su'n, n ´kankan ɔ nnɛn mun ekun, n ´nian be su kɛ laa'n sa.

³² Ndɛkɛn n wa nian-nian ɔ nnɛn'm be kwlaa be nun. Bua nga be wunnɛn'n tata nun'n nin nga be ti ble'n, ɔ nin boli nga be wunnɛn'n tata nun'n, n ´fa be ngba. Akatua nga a ko fa ko man min'n yɛ ɔ o lɛ-ɔ.

³³ Sɛ ɔ waan a ´kpɛ min ato bo'n, ainman bla nan nian nga n ´fa'n. Boli nga a wun i b'ɔ ti-man tata nun'n, ɔ nin bua ng'ɔ ti-man ble'n, wuun wualɛ yɛ n wuali-ɔ.»

³⁴ Laban waan: «N tili, e yo i kɛ a kannin'n sa.»

³⁵ Sanngɛ kpɛkuun le kun sɔ'n, Laban kpali boli kpakpuɛ nga be wunnɛn'n tata nun'n nin boli bla nga bleble o be wunnɛn'n su'n, ɔ nin bua nga be ti ble annzɛ bɔ ufue-ufue o be wunnɛn'n su'n, kpɛkuun ɔ fali be li mannin i wa yasua mun.

³⁶ Kan i waan ba sɔ'm be wɔ'n nin kan Zakɔb kankan bua nga mun'n, be afiɛn'n ti cɛn nsan nantilɛ atin.

³⁷ Yɛ Zakɔb fali peplie sama mɔnnɛn nin amandie sama mɔnnɛn, ɔ nin platani sama mɔnnɛn, ɔ klɛklɛli bé wun, ɔ man waka sama sɔ'n be wunnɛn su totoli nun ufue nin ble, ufue nin ble.

³⁸ Waka sama sɔ bɔ be ti ufue tata nun'n, ɔ fa be sieli i nnɛn'm be nyrun nnɛn'm be nzue nɔnwlɛ'n nun. Kɛ nnɛn'm be ba nzue nɔnlɛ'n, be ta be wun fu kpa.

³⁹ Nnɛn'm be fuli be wun waka nga Zakɔb klɛklɛli bé wun'n be wun lɛ. Ɔ man ba nga boli bla'm be wuli be'n be wunnɛn'n tatali nun.

⁴⁰ Bua'm be kusu, Zakɔb fali be sieli i lika uflɛ. Ɔ fali be sieli i Laban i nnɛn nga be wunnɛn'n tata nun nin nga be ti ble'n be nyrun ndɛnman su lɛ. Kɛ ɔ yoli sɔ yɛ ɔ nyɛnnin i nnɛn liɛ-ɔ. Ɔ fɛli i nnɛn liɛ mun sieli be ngunmin. Ɔ'a fa-man be ɔ'a sanngan-man Laban liɛ'm be nun.

⁴¹ Kɛ nnɛn nga be wunnɛn o be wun'n be ´fu be wun'n, Zakɔb fa waka sama ng'ɔ klɛklɛli bé wun'n sie be nyrun be nzue nɔnwlɛ'n nun nan be fu bé wun waka sɔ'm bé wun lɛ.

⁴² Sɛ nnɛn'm be ti kokloo'n, ɔ sie-man waka sama sɔ'm be nyrun lɛ, ɔ man nga be ti kokloo mun yɛ be yoli Laban liɛ-ɔ. Nnɛn kpinndin-kpinndin'm be yoli Zakɔb liɛ.

Zakɔb i wanndilɛ

⁴³ Ɔ man Zakɔb ɔ wa nyɛnnin i wun kpa. Ɔ wa nyannin bua nin boli kpanngban kpa. Ɔ nyannin afanniɛn bla mun nin yasua mun, nin nyɔnngɔnmɛn mun, ɔ nin aflunmun mun.